သေတ်တွေ၊ ဂျောန်(၁)
ဘာပရေၚ်ပညာသ္ဇိုၚ် မၞုံတွဵုရးရခေၚ် ဒးဒုၚ်လဝ်ဘဲဒဏ်လဗိုတ်ကျာမိုဝ်ခါ ဇၞော်ကဵုဇြဟတ်ဂှ် ပ္ဍဲဂိတုဂျောန် ပထမသတ္တာဟ ရာသဳပံက်ဘာဏံ ညံၚ်ဂွံဂတာပ်အခိၚ် ပံက်အာဘာ မွဲအခိၚ်ဓဝ်မာန် ဟွံသေၚ်တုဲ ဗက်ကဵုဂကောံတုဲ ပံက်အာကဵုက္ဍိုပ်ရောၚ်ဂှ် ဌာန ပရေၚ်ပညာကံၚ်ဇြဳပၞာန် ဟီုသ္ဂးလဝ်ရ။
ဘာပရေၚ်ပညာသ္ဇိုၚ် မၞုံအလုံမွဲကၟိန်ဍုၚ်ဂှ် ပ္ဍဲဂိတုဂျောန် စၟတ်တ္ၚဲ(၁)ဏံ ၜိုန်ရပံက်ဘာကီုလေဝ် ဘာပရေၚ်ပညာသ္ဇိုၚ် မၞုံတွဵုရးရခေၚ်ဂှ်မ္ဂး ပံက်အာစဵုကဵုတၟံကၠံပေၚ်ပေၚ် မာန်ဟွံသေၚ်တုဲ ပ္ဍဲဂိတုဂျောန် ဂှ် ပါ်ဏာဂကောံတုဲ ပံက်အာဘာရောၚ်ဂှ် ဌာနဝန်ဇၞော်ပရေၚ်ပညာကံၚ်ဇြဳပၞာန် ဟီုသ္ဂးလဝ် ပ္ဍဲဂိတုမေ စၟတ်တ္ၚဲ(၂၉)ဂှ်ရ။
ဟိုတ်နူဘဲဒဏ်လဗိုတ်ကျာမိုဝ်ခါတုဲ ဘာမၞုံသ္ကုတ်သၟဝ်ကျာရခေၚ်ဗွဲမဂၠိုၚ် ဒးလီုလာ်လဝ်တုဲ သွက်ဂွံ ကလေၚ်ပလေဝ်ပလေတ်မာန်ဂှ်လေဝ် အရီုဗၚ်ပရေၚ်မၞိဟ်တအ် ဂွံကၠုၚ်စိုပ်ဂှ် ဟိုတ်နူတၚ်ခက်ခုဲ နွံဒၟံၚ်ဂှ်ရ ပါ်ဂကောံတုဲ ပံက်အာဘာရောၚ်ဂှ်လေဝ် ဂွံတီကေတ်ရ။
ပ္ဍဲတွဵုရးရခေၚ် ပွိုၚ်ဍုၚ်နွံ (၁၇) ပွိုၚ်ဍုၚ်တုဲ ဘာပရေၚ်ပညာကဆံၚ်တန်သၠုၚ် (၄၈၇) ဘာ၊ ကဆံၚ်တန် ဒေါဝ် (အလက၊ အလက(ပါ်)၊ မူလောန်) (၁၁၇၁)ဘာ ကေုာံကဆံၚ်တန်မူလ (၁၅၃၅)ဘာ ပံၚ်ဖအိုတ် ဘာပရေၚ်ပညာသ္ဇိုၚ် (၃၁၉၃)ဘာနွံတုဲ ဘာပံက် ပ္ဍဲဂိတုဂျောန် စၟတ်တ္ၚဲ(၁)မာန် ကေုာံ ဘာပံက် ပ္ဍဲဂိတုဂျောန် ၜိုတ်တတိယသတ္တာမာန်ဂးတုဲ ပါ်လဝ်ဂကောံ ၜါဂကောံတုဲ ပံက်အာဘာရောၚ်ဂှ် ဂွံတီကေတ်ရ။
ကံၚ်ဇြဳပၞာန်ဂှ်မ္ဂး ဘာဒးခရိုဟ်လီုလဝ် ဟိုတ်နူဘဲဒဏ်လဗိုတ်ကျာမိုဝ်ခါဂှ် ဗၞတ်ဗ္ၜတ်စရိတ်ဒးက္လေၚ် ပလေဝ်ပလေတ် ဂၠိုၚ်လောန်တုဲ စဵုကဵုအခိၚ်လၟုဟ်ဏံ ပလေဝ်ပလေတ်လဝ် ၜိုန်(၆၀)တၟံကၠံဟေၚ်ဓဝ်ရဂှ် ဟီုသ္ဂးလဝ်ရ။
ညးဒေသရခေၚ်သၟဝ်ကျာဂှ်မ္ဂး ပရေၚ်ဒးဒုၚ်လဝ်ဘဲဒဏ်လဗိုတ်ကျာဂှ် ဒးကလေၚ်ပလေဝ်ပလေတ်ဒၟံၚ် က္ၜံၚ်ဇကုဇကုဒတူ စဵုကဵုအခိၚ်လၟုဟ်ဂှ်ရ ၜိုန်ရကလေၚ်ပံက်ဘာလေဝ် ဘာလ္တူဍုၚ်တအ်ဟေၚ် လောဲသွာတုဲ ပ္ဍဲလ္ပာ်ဒေသကွာန်ရးဂှ် ဝါတ်ဂါတ်ဒၟံၚ်ဏီရောၚ် ဟီုသ္ဂးဒၟံၚ်အိုတ်ရ။
“ပ္ဍဲဍုၚ်သာန်တွဲကဵု ဍုၚ်တၞဟ်တှ်ေ ဒုၚ်တဲပ္အပ်ဒၟံၚ်ကွးဘာရ။ အဓိကဂှ် ပ္ဍဲသ္ကုတ်သၟဝ်ကျာလ ဒၞာဲဗိုတ်ကျာ လုပ်လဝ်ဂှ် သွက်ဂွံပံက်ဘာလ္ပဟီုဏီ အာစာ အာစာၝောံတအ် ဂွံအာဘာလေဝ် ဝါတ်ဂါတ်ဒၟံၚ်။ ပ္ဍဲကွာန်သ္ကုတ်သၟဝ်ကျာ လ္ပာ်ပ္ဍဲတေံဂှ် သွက်ဂွံပံက်ဘာ ဝါတ်ဒၟံၚ်ဏီဏောၚ်။ ဘာနွံဒၞာဲဒးလဝ်မိုဝ်ခါဂှ်တှ်ေ ညးဂှ်လေဝ် ဟွံဒုၚ်တဲဏီပုဟ်။ ၜိုတ်ဘာလတူဍုၚ်ရ ဒုၚ်အာတဲကၠာဂွံဏောၚ်။ ဘာပ္ဍဲကွာန်တအ်ဂှ်တှ်ေ ဂွံဗ္တောန်လိက် ဟွံလောဲဏီ။ ဍာ်ကြုၚ် ကၟိုဟ်မံၚ်၊ လၟက်သရီုသှ်ေၜက်ဒၟံၚ်။ ဒးကြဴကြာတ်ဒၟံၚ်လၟက်သရီုဂှ်၊ ပ္ဍဲအခိၚ်ကသီုဍာ်ကြုက်ကၟိုဟ်ဒၟံၚ်တုဲ ဂွံတိုန်ဘာ ဟွံလောဲဏီပုဟ်”ဂှ် ညးဒေသဍုၚ်သေတ်တွေမွဲတၠ ဟီုသ္ဂးလဝ်ရ။
ပ္ဍဲဘာပရေၚ်ပညာသ္ဇိုၚ်ဂှ် သ္ပတံနူဂိတုမေ စၟတ်တ္ၚဲ (၂၃) တုဲ ဒုၚ်ဒၟံၚ်တဲပ္အပ်ကွးဘာတုဲ စဵုကဵုဂိတုမေ စၟတ်တ္ၚဲ (၂၅) လၟိဟ်ကွးဘာသီုဖအိုတ် ပံၚ် (၁၃)ကိုတ်ပြၚ် (၁၃၄၃၀၃၇)တၠ ကၠုၚ်အပ်လဝ်ဘာရဂှ် ဂွံတီကေတ် အတိုၚ်မူဌာနဝန်ဇၞော်ပရေၚ်ပညာကံၚ်ဇြဳပၞာန် လလောၚ်တြးလဝ်ရ။
ပရိုၚ်-သြၚ်လောန်တိုၚ်(မ်)
ဗီုရုပ်-MOI
sanlontai