ရေဝ်၊ ဂျောန် (၁)
ပ္ဍဲပွိုၚ်ဍုၚ်ရေဝ် တွဵုရးဍုၚ်မန် မလလောၚ်တြးလဝ်ပရေၚ်အုပ်ဓုပ်ပၞာန် ဗ္ဒါဲကွာန်အံၚ်တပျေဂှ် အပ္ဍဲပေါဲဗ္တိုက် မက္တဵုဒှ်လဝ် ပ္ဍဲဂိတုမေ (၃၀) တေံ ညးဍုၚ်ကွာန်ကောန်အရာပ်မွဲတၠ ဒးမကမ်ချိုတ်အာ လဝ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲကဵုတ္ၚဲဂှ် ပယျာံနူဂယးဂှ် ဂကောံဒပ်ဒမၠုက်ညးဍုၚ်ကွာန်ဒံၚ်ညဵုတံ နူကဵုကြတ်ဗ္တိုက်လဝ် ရေၚ်ကွဳစက် ဇွောံမကံၚ်ဇြဳပၞာန် နူပွိုၚ်ဍုၚ်ဇြပ်ဗု မဒဳလုပ်ကၠုၚ် အပ္ဍဲပွိုၚ်ဍုၚ်ရေဝ်ဂှ်တုဲ လ္တူဂၠံၚ်ကွဳစက် မတ်မလီု−ရေဝ် ဂှ် မွဲတ္ၚဲဓဝ် က္တဵုဒှ်လဝ် ပေါဲဗ္တိုက် (၃) ဝါရ။
အပ္ဍဲပေါဲဗ္တိုက် မက္တဵုဒှ်လဝ် ဗ္ဒါဲကွာန်အံၚ်တပျေ ဂှ် ဟိုတ်နူဂွံမိၚ်ကေတ်ဗရုရမျာၚ် ပန်ပှော်ကဵု သေနာတ် ဂှ်ရ မၞိဟ်တြုံ အာယုက် ၅၀ သၞာံ မဒှ်ညးဒေသဂှ်မွဲတၠဝွံ အခိၚ်မစှ်ေကၠုၚ် နူကဵုလ္တူသ္ၚိ သွက်ဂွံလုပ်အောပ် ပ္ဍဲအုံမၚ် မၞုံသၟဝ်သၟိဂှ် ဒးမကမ်သေနာတ်တုဲ ချိုတ်အာလဝ်ရ။
အတိုၚ်ဂလာန်ညးဒေသတံဂှ်မ္ဂး မၞိဟ်တြုံ မချိုတ်အာဂှ်ဝွံ ကြဴနူ PDF ပန်ပှော်ရေၚ်ကွဳစက် ကံၚ်ဇြဳပၞာန်တုဲဂှ် ဒးအာမကမ် နူကဵုဒပ်ပၞာန် ကလေၚ်ပန်ပှော်နၚ်တံဂှ်တုဲ ချိုတ်အာလဝ်ရောၚ် သ္ဂးရ။
အပ္ဍဲပေါဲဗ္တိုက် မက္တဵုဒှ်လဝ် တ္ၚဲဂှ်ဂှ် လ္ပာ်ကံၚ်ဇြဳပၞာန် (၃) တၠ ချိုတ်တုဲ (၇) တၠ ကလိဂွံလဝ်ဝပ်ရောၚ် ဂကောံဒပ်ဒမၠုက်ညးဍုၚ်ကွာန်ဒံၚ်ညဵုတံ လလောၚ်ပ္တိတ်လဝ် ပ္ဍဲဂိတုမေ (၃၁) တေံရ။
ပ္ဍဲပေါဲဗ္တိုက်ၜါလ္ပာ်ဂှ် ဟိုတ်နူပရေၚ်ပန်ပှော်ဒပ်ကံၚ်ဇြဳပၞာန်တုဲ ညးဍုၚ်ကွာန်ကောန်အရာပ်မွဲတၠ ချိုတ်အာလဝ်ရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
အတိုၚ်စရၚ် နူကဵုသြၚ်လောန်တိုၚ်(မ်) ကံက်ကပှ်ဂွံလဝ်ဂှ်မ္ဂး အပ္ဍဲကာလဒပ်ပၞာန်သီအဝဵု ပွိုၚ် (၂) သၞာံဂှ် ဟိုတ်နူပရေၚ်ပန်ပှော် သ္ကုတ်ဂၠံၚ်ရေဝ်−ဇြပ်ဗုတံတုဲ ညးဍုၚ်ကွာန်အာတရဴ ဟွံအောန်နူကဵု (၁၀) တၠ ချိုတ်အာလဝ်တုဲ ဗ္ဒါဲ (၃၀) တၠ ကလိဂွံလဝ်ဝပ်ရ။
ပရိုၚ်−သြၚ်လောန်တိုၚ်(မ်)
ဗီုဓာတ်−KNU
sanlontai