ကံၚ်ဇြဳပၞာန် ကေုာံ ဂကောံမဟာမိတ်ကောဒေံပိဂကောံ ဆဵုဂဗညးသ္ကအ်ဂှ် ပရေၚ်ဇီုကပိုက် လ္တူပၠန်ဂတးက္ဍိုပ်က္ညၚ်ဏံ နွံကၠုၚ်မာန်

မိုၚ်လာ၊ ဂျောန် (၁)

ဟိုတ်နူကြုက် လုပ်အကြာပ္ညဳပ္ညပ်ကဵုလဝ်တုဲ ဂကောံသဳကၠဳပရေၚ်ၜိုဟ်လလမ် ကံၚ်ဇြဳပၞာန် (NSPNC) ကေုာံ ဂကောံဒပ်ရပ်လွဟ်ကောန်ဍုၚ်အရၚ် မဟာမိတ်ပိဂကောံတံ ဆဵုဂဗညးသ္ကအ်ဂှ်ဝွံ အရာမဇီု ကပိုက်ကၠုၚ် လ္တူပၠန်ဂတးက္ညၚ်ဏံ နွံကၠုၚ်မာန်ရောၚ် ညးခါတ်အကာဲပရေၚ်ဍုၚ်ကွာန်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ညးစၞး နူကဵုဂကောံမဟာမိတ်ကောဒေံပိဂကောံ ဒပ်ပၞာန်ရခေၚ် (AA) ၊ ဒပ်ပၞာန်ဗၠးၜးကောန်ဂကူ တအာၚ် (ပလံၚ်) (TNLA) ကေုာံ ဂကောံကဝ်က ဒပ်မဟာမိတ် ဒဳမဝ်ကရေတ်တေတ်ကောန်ဂကူ (MNDAA) တံဝွံ သွက်ဂွံဆဵုဂဗကဵုကံၚ်ဇြဳပၞာန်ဂှ် ပ္ဍဲဂိတုမေ (၃၀) တေံ စိုပ်ကၠုၚ် ဍုၚ်မိုၚ်လာ ဒေသတၟေၚ်(၄) သ္ကုတ်ဗၟံက်တွဵုရးသေံရ။

ညးစၞး နူကဵုဂကောံမဟာမိတ်ကောဒေံတံကဵု နူကဵုကမ္မတဳပ္ညဳပ္ညပ် ထ္မံက်ရုပ်ရဴ ပရေၚ်ၜိုဟ်လလမ် ကေုာံ ပရေၚ်ညဳသၟဟ်ဂကူ (NSPNC) တံဝွံ ဒၟါနူကြုက် လုပ်အကြာပ္ညဳပ္ညပ်လဝ်တုဲ ပ္ဍဲဂိတုဂျောန် (၁) စဵုကဵု (၃) တေံ သွက်ဂွံဆဵုဂဗအာညးသ္ကအ်ဂှ် နွံဒၟံၚ်ရ။

ညံၚ်ပေါဲသဳကၠဳဏံ ဂွံက္တဵုဒှ် ဗွဲမအံၚ်ဇၞးဂှ် မေဿတာကဝ်ပံၚ် ကလုတ်တမာန်တၟေၚ် ကာဍုၚ်သ္အာၚ် တွဵုရးယူနာန်၊ ဍုၚ်ကြုက်ဂှ်လေဝ် စိုပ်ဒၟံၚ်ဍုၚ်မိုၚ်လာတုဲ ပါလုပ်အာ နဒဒှ်ညးစၞးကြုက်ဏောၚ်ဂှ် ဂွံတီကေတ်ရ။

ဂကောံမိုၚ်လာ ဒပ်ပၞာန်ဒပ်မဟာမိတ်ဒဳမဝ်ကရေဇြဳကောန်ဂကူ (NDAA) ဂှ် သွက်ညးစၞး မတိုန်စိုပ်အာ ပေါဲသဳကၠဳတံဂှ် ကေတ်အာတာလျိုၚ် ပရေၚ်စသုၚ်မံၚ်စံၚ် ကေုာံ ပရေၚ်ဂီုကၠီုတံဏောၚ်ဂှ် လလောၚ်ပ္တိတ်လဝ်ရ။

စပ်ကဵုပရေၚ်ဆဵုဂဗဏံတုဲ ညးလ္ၚတ်သ္ၚဳဂၠိပ်ပရေၚ်ဍုၚ်ကွာန် ဥူတာန်သဵုနာၚ်ဂှ် အခိၚ်ဂကောံဇြဟတ် ပၠန်ဂတးတံ ပလေဝ်ပလေတ်ဒၟံၚ်ပၞာန်ထ္ပက် သွက်ဂွံပလှ်ဖျေံ ကံၚ်ဇြဳပၞာန်မာန်ဂှ် အကာဲအရာသာ်ဏံဝွံ သွက်ပၠန်ဂတးက္ညၚ်ဂှ် ဒှ်ပွတာဒၞါဇၞော်ဇၞော်ရောၚ် သ္ၚဳဂၠိပ်လဝ်ရ။

“အခိၚ်ပလေဝ်ဒၟံၚ် သွက်ဂွံကၠောန်သ္ပပၞာန်ထ္ပက် ညံၚ်ဂွံပလှ်ဖျေံကံၚ်ဇြဳပၞာန်မာန် ညံၚ်ကဵုတ္ၚဲဏံဂှ် အကာဲအရာသာ်ဏံ မံက်ဂတဝ်ကၠုၚ်ဂှ်ဝွံ သွက်ပၠန်ဂတးက္ညၚ်ဂှ် ဒှ်ပွတာဒၞါဇၞော်ဇၞော်ရ။ ၜိုန်ဂှ်ကီုလေဝ် ကၠောန်သ္ပသာ်ဏံ မွဲအခိၚ်ဓဝ်ဂှ်ဝွံ မူဟိုတ်ဂွံက္တဵုဒှ်ကၠုၚ်ရောဟီုမ္ဂး ကြုက် ပါလုပ်ပထုဲပလာပ် အပ္ဍဲပရေၚ်ဍုၚ်ကွာန်ဍုၚ်ဗၟာဂှ်ဝွံ လောန်ၜက်အာသၞောတ်ဗ္ၜတ်တံတုဲ သွက်ဂွံပံၚ်တောဲကဵုကံၚ်ဇြဳပၞာန် ဗွဲမလောန်ကာဲဂှ်ကီု၊ ညံၚ်ကံၚ်ဇြဳပၞာန် ဂွံဆက်တန်တဴအာဂှ် ကၠောန်ဒၟံၚ်ဂှ်ရ ဒှ်ပြဝကရဴလဝ်စး ကုညးဍုၚ်ကွာန်တံရောၚ်” သာ်ဝွံ ညးသ္ဂးရ။

ဟိုတ်ဂှ်ရ ပ္ဍဲအရာသောၚ်ကလး ပရေၚ်ဍုၚ်ဗၟာဂှ် လ္တူကြုက် လုပ်စိုပ်ပထုဲပလာပ်ဒၟံၚ်ဂှ် နကဵုဂကောံ ဇြဟတ်ဒဳမဝ်ကရေဇြဳဂမၠိုၚ် သီုအမေရိကာန် သီုကဵုဍုၚ်ဥရဝ်ပရးပလိုတ်တံဂှ် တိုန်မွဲကဆံၚ်တုဲ သွက်ဂွံကၠောန်သ္ပ ထံက်ပၚ်ကဵု အရာမနွံပၟိက်တံမာန်ဂှ် ဒှ်အခိၚ်ထေက်ကဵုဒးပ္တိတ်ဇြဟတ်ယျဂှ် ဥူတာန်သဵုနာၚ် ထံက်ထ္ၜးလဝ်ရ။

လ္ပာ်ကံၚ်ဇြဳပၞာန်ဂှ် စပ်ကဵုပရေၚ်ဆဵုဂဗသဳကၠဳ ဂကောံမဟာမိတ်ကောဒေံပိဂကောံတံကဵု ဂကောံသဳကၠဳ ပရေၚ်ၜိုဟ်လလမ် (NSPNC) တံတုဲ စဵုကဵုဂိတုမေ (၃၁) တေံဂှ် လလောၚ်ပ္တိတ်ကၠုၚ်လဝ် မွဲမွဲသာ် ဟွံမွဲဏီရ။

ညးစိုန်သ္ကီု ပရေၚ်ကြုက် ဒံက်တာလှကျဝ်ဇြဝ်ဂှ် ပရေၚ်သဳကၠဳကံၚ်ဇြဳပၞာန် ကုဂကောံမဟာမိတ် ပိဂကောံဂှ်ဝွံ နကဵုဂကောံရပ်လွဟ်ကောန်ဍုၚ်အရၚ်ဂမၠိုၚ် အရာညးတံနွံပၟိက်တံဂှ် ၜိုန်ရဟီုကၠုၚ် နူကဵုကြုက်မွဲကဆံၚ်ဂွံကီုလေဝ် လ္တူပရေၚ်ပၠန်ဂတးဂှ် ဇီုကပိုက်ကၠုၚ်မွဲမွဲသာ် နွံမာန်ဏောၚ် သ္ၚဳဂၠိပ်လဝ်ရ။

“နကဵုဂကောံရပ်လွဟ်ကောန်ဍုၚ်အရၚ်ဂမၠိုၚ် ညးတံမုနွံပၟိက်ရောဟီုဂှ် ဟီုကၠုၚ် နူကဵုကြုက်မွဲကဆံၚ်ဂွံဒၟံၚ်ဏောၚ်။ ညအ်ဂှ် သွက်ဂကောံပၠန်ဂတးရပ်လွဟ်တံဂှ် ဒှ်တၚ်ဂွံဇြဟတ်မွဲရ။ တၚ်ဍိုန်လျဂှ်တှ်ေ သွက်ကောန်သ္ဂံၚ် အပ္ဍဲဍုၚ် မကၠောန်ဒၟံၚ်ပၠန်ဂတးရပ်လွဟ်တံဂှ် ဇီုကပိုက်ကၠုၚ် မာန်ဏောၚ်။ မူဟိုတ်ရောဟီုမ္ဂး ဟိုတ်နူကြုက် ထရိုဟ်ပလံၚ်ဒၟံၚ် လ္တူခုၚ်တက်ကျာ ပေါဲသဳကၠဳပရေၚ် ၜိုဟ်လလမ်ဂှ်ရ နကဵု EAO ဂမၠိုၚ် ဒးကဵုဇြဟတ် ကုညးမသ္ပလဝ်ဇြဳဒဳအာမ် မသှ်ေဒၟံၚ်တံ၊ ကုပဳဒဳအာဖ် နူကဵုပၠန်ဂတးက္ညၚ်တံဂှ် ယံၚ်အာညိညဂှ် နွံဏောၚ်” သာ်ဝွံ ညးသ္ဂးရ။

ညးမၞုံအခေါၚ်ဟီုဂး ရုၚ်သ္ကိုပ်ဝန်ဇၞော် အလဵုအသဳညဳသၟဟ်ဂကူ NUG ဥူနေဖုၚ်လာတ်ဂှ် ပရေၚ်ဆဵု ဂဗဏံဝွံ ဟိုတ်နူအကာဲအရာမွဲမွဲသာ် ဟွံသေၚ်မ္ဂး ဟိုတ်နူဇြဟတ်ဂရိုဟ်မွဲမွဲတုဲ ဒှ်မာန်ရောၚ် သာ်ဝွံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“ ဒၟါနူအကာဲအရာမွဲမွဲသာ် ဟွံသေၚ်မ္ဂး ဟိုတ်နူဇြဟတ်ဂရိုဟ်မွဲမွဲတုဲ မ္ဒးဆဵုဂဗညးသ္ကအ်လေဝ် ဒှ်မာန်ဏောၚ်။ ဆဵုဂဗညးသ္ကအ်သာ်ဏံမွဲဓဝ်သၟးဟွံက အခိၚ်ဆဵုဂဗတေံ မုဟီုဂးသဳကၠဳလဝ်ရော၊ ပရူပရာသာ်လဵု သဳကၠဳလဝ်ရော။ တုဲပၠန် တၚ်တုပ်စိုတ်သာ်လဵု ကလိဂွံလဝ်ရော ကိစ္စတံဏံဂှ် ဆက်တုဲ ဒးမၚ်ရံၚ်ဒၟံၚ်ဏီဏောၚ်။ အခိၚ်ဟွံဂွံတီကေတ် ဟီုဂးသဳကၠဳညးသ္ကအ်သာ်လဵုတုဲ ဂွံတၚ်တုပ်စိုတ် သာ်လဵုရောဟီုဂှ် သွက်ဂွံလဴထ္ၜးကဵုလစွံစိုတ်ပိုယ်မွဲမွဲဂှ် ဝါတ်ဂါတ်ညိဏောၚ်” သာ်ဝွံ သ္ဂးရ။

ဂကောံမဟာမိတ်ကောဒေံပိဂကောံဝွံ ကဵုဒၟံၚ်တန်ဗ္တောန်ကွတ်ပၞာန် ကုဂကောံဒပ်စဵုဒၞါညးဍုၚ်ကွာန် (PDF) မပၠန်ဂတးရပ်ဒၟံၚ်လွဟ်တံဂှ်တုဲ ရီုဗၚ်ထံက်ပၚ်ကဵုဒၟံၚ် လွဟ်လက်နက်မကမ်တံတုဲ ပံၚ်တောဲကဵု ဂကောံပၠန်ဂတးလ္ၚဵုတံဂှ်တုဲ သွက်ဂွံဗ္တိုက်ပ္တိတ် သၞောတ်တၠအဝဵုပၞာန်မာန်ဂှ် ဆက်ရေၚ်တၠုၚ်အာဏောၚ် ပ္ဍဲဂိတုဂျာန္နဝါရဳ (၁) တုဲကၠုၚ်တေံ လလောၚ်တြးလဝ်ရ။

မွဲလ္ပာ်ပၠန်ဂှ် ကမ္မတဳပ္ညဳပ္ညပ်သဳကၠဳ ပရေၚ်ကၟိန်ဍုၚ် (FPNCC) ပါလုပ်သီုကဵု ဂကောံမဟာမိတ် ကောဒေံပိ ဂကောံဂှ်လေဝ် သွက်ပဋိပက္ခအပ္ဍဲဍုၚ် မက္တဵုဒှ်ဒၟံၚ် အပ္ဍဲဍုၚ်ဗၟာဏံ ဂွံၜိုဟ်လလမ်ပြေပြံၚ်အာဂှ် ဒုၚ်တၠုၚ်ထံက်ဂလာန်ဒၟံၚ် ကုပရေၚ်ကြုက် မရေၚ်တၠုၚ်အကြာတံဂှ်ရောၚ် ပ္ဍဲဂိတုမာတ်ချ် သတ္တာဟဒုတိယတေံ လလောၚ်ပ္တိတ်လဝ်ရ။

ကမ္မတဳပ္ညဳပ္ညပ်သဳကၠဳ ပရေၚ်ဍုၚ်ကွာန်ကၟိန်ဍုၚ် (FPNCC) ဂှ် ပံၚ်ကောံလဝ် နကဵုဂကောံရပ်လွဟ် ကောန်ဍုၚ်အရၚ် (၇) ဂကောံ နူကဵုဒပ်ပၞာန်ညဳသၟဟ်ဂကူ “ဝ” (UWSA) မသ္ကိုပ်သ္ကဂှ်တုဲ သ္ပဟိုတ်ကဵု တွဵုဒၞက်စုက်လုက်ဒၟံၚ်ကဵု တိဍာ်ဍုၚ်ကြုက်ဂှ်ရ ပရေၚ်ဆက်ဆောံခိုဟ်တံ နွံဒၟံၚ်ရ။

ဒပ်ပၞာန်ညဳသၟဟ်ဂကူ “ဝ” (UWSA) ၊ ဂကောံမိုၚ်လာ (NDAA) ကေုာံ ဗော်တောတက်ရးသေံ (SSPP) မဒှ်ဂကောံမဟာမိတ်သၟဝ်ကျာ FPNCC တံဝွံ ဆဵုဂဗသဳကၠဳလဝ်ကဵု ကံၚ်ဇြဳပၞာန် ဟွံအောန်နူကဵု (၄) ဝါရ။

အခိၚ်လၟုဟ်ဂှ် ဂကောံမဟာမိတ်ကောဒေံ မဒှ်ကောန်ဂကောံ FPNCC ပိဂကောံဂှ် ဟိုတ်နူသဳကၠဳအာ ကုကံၚ်ဇြဳပၞာန်ဂှ်ရ သွက်ဂွံသဳကၠဳကဵုကံၚ်ဇြဳပၞာန်ဂှ် ဒပ်ပၞာန်ဗၠးၜးကချေၚ် (KIA) မပါလုပ်ဒၟံၚ် ပ္ဍဲပၠန်ဂတး ပေၚ်ၚ် မွဲဂကောံဓဝ်ဟေၚ် သှ်ေဒၟံၚ်ရောၚ် မဒှ်ရ။

ပရိုၚ်−သြၚ်လောန်တိုၚ်(မ်)

ဗီုဓာတ်−Social Media