မတ်မလီု၊ ဂျောန် (၄)
ကမၠောန်ဟဝ်တေဝ် အပ္ဍဲတွဵုရးဍုၚ်မန်တံဝွံ စနူကၞောတ် သၞာံတုဲကၠုၚ်တေံတဲ အပ္ဍဲသၞာံဏံဂှ် ကမၠောန်ဂေတ်ဂြိပ် မၞုံကၠုၚ် စဵုကဵု (၇၀) တၟံကၠံဂှ်ရ စကလေၚ်ယိုပ် ယာကၠုၚ်ယျဂှ် တၠကမၠောန်ဟဝ်တေဝ်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကမၠောန်ဟဝ်တေဝ်တံဝွံ ကြဴနူဒပ်ပၞာန်သီအဝဵုတုဲ ဒၟါနူကၟုဲဍုၚ်သ္အာၚ်တံ လုပ်စိုပ်ဟွံမွဲဂှ်ရ ဒးဗ္ဒဗ္ဒါဲဒၟံၚ် လ္တူကၟုဲအာတရဴ အပ္ဍဲဍုၚ်တံသၟးရ။
ဟဝ်တေဝ် မရန်တၟံကဵု ကၟုဲအာတရဴကောန်ဍုၚ်သ္အာၚ်ကဵု သေဌဳတံဂှ် ဒဵုကဵုအခိၚ်လၟုဟ် ပံက်ဟွံမာန်ဏီကီုလေဝ် ဟဝ်တေဝ် မရန်လဝ် သွက်ကၟုဲအာတရဴအပ္ဍဲဍုၚ်တံဂှ် ဂေတ်ဂြိပ်ဒၟံၚ် ၜိုတ် (၇၀) တၟံကၠံယျရောၚ်ဂှ် ဂွံတီကေတ် ဇရေၚ်တၠကမၠောန်ဟဝ်တေဝ်တံရ။

“COVID တုဲဒှ်အာတုဲ ပ္ဍဲကၞောတ်သၞာံ ၂၀၂၂ ဂှ် ကလေၚ်တိုန်ကၠုၚ်ညိညပၠန်။ တ္ၚဲဏံဟီုမ္ဂး အသိၚ်ဍေံ ဟွံစိုပ်အာသၠုၚ်ၚ်ကီုလေဝ် ဍေံဟွံစှ်ေအာပုဟ်၊ ဒှ်သဘဴကလေၚ်တိုန်ကၠုၚ်ညိညရ။ ဒးကေတ်အခိၚ် ၜိုတ်ဒးရးဏောၚ်၊ တၟော်လဝ်သာ်ဏံတုဲတုဲရ။ မူဟိုတ်ရောဟီုတှ်ေ အခိၚ်ကၠောန် ကမၠောန် ဟဝ်တေဝ် တှ်ေ ကမၠောန်အာတရဴဂှ် ဒှ်အဓိကဇၞော်အိုတ်ရ။ ညံၚ်အသိၚ်ကမၠောန်အာတရဴဏံ ဂွံကလေၚ်သၠုၚ် တိုန်ကၠုၚ်ပၠန် နူကဵုဂကောံဟဝ်တေဝ်ပိုယ်တံဏံ ဂ္စါန်ဒၟံၚ်ညိညအိုတ်ရ” သာ်ဝွံ တၠကမၠောန်ဟဝ်တေဝ်မွဲတၠ သ္ဂးရ။
ကမၠောန်ဟဝ်တေဝ်တံဝွံ ဒၟါနူကဝ်ဝေဒ်ကီု သီုကဵုဒပ်ပၞာန် သီအဝဵုကလေၚ်မွဲဝါပၠန်တံတုဲ ကမၠောန်အာတရဴ ဒးဒေါအ်ဒေၚ်လဝ်ဂှ်ရ ပ္ဍဲကဵုဟဝ်တေဝ် မၞုံအပ္ဍဲတွဵုရး ဍုၚ်မန်တံဂှ် မၞိဟ်ကၠုၚ်စိုပ်ဇူဒီု ယအ်စှ်ေအာတုဲ ဒၟါနူစေဝ်ပၞောန် ကံၚ်ဇြဳပၞာန် မပတေၚ်ဓရတ် လဝ်တံဂှ်တုဲလေဝ် ကၟုဲထဳကၠုၚ်စိုပ် အောန်စှ်ေအာဂှ်ရ ဒးဆေၚ်လဝ်မုက်ကျဗြံ ၜိုတ်ပိသၞာံရ။
ဟိုတ်နူအကာဲအရာဏံတုဲ ကမၠောန်ဟဝ်တေဝ်ဂမၠိုၚ် ဒေါအ်ဇူကၠုၚ်ဂှ် ဟဝ်တေဝ်လ္ၚဵုတံမ္ဂး ဒၟါနူဖအောန် ဖျေံလဝ် ညးယိုက်ဝန်တံဂှ်ရ ကောန်သ္ၚိကၟိန်ဂၠိုၚ်ကဵုကၠံ မ္ဒးဒတူလိုၚ်ဗ္ဒဗ္ဒါဲဒၟံၚ် လ္တူကမၠောန်ဏံ ဒးဂဗလဝ် ပြသၞာကမၠောန်ဟွံမွဲတံအိုတ်ရ။

ၜိုန်ရကၟိန်ဍုၚ် ဟွံညိၚ်ဝတ်ဏီကီုလေဝ် ဟဝ်တေဝ် မရန်လဝ် သွက်ညးအာတရဴအပ္ဍဲဍုၚ်တံဝွံ ပ္ဍဲတ္ၚဲမ္ၚဵုတ္ ၚဲပြဲတံဂှ်မ္ဂး ဟိုတ်နူညးအာတရဴ လုပ်စိုပ်ဇူဒီုတံကဵု ကိစ္စကမၠောန်တံဂှ်တုဲ အသိၚ်လုပ်စိုပ်ဇူဒီုတံလေဝ် သၠုၚ်တိုန်ကၠုၚ်လဝ်ရောၚ် ဂွံတီကေတ် ဇရေၚ်တၠ ကမၠောန်ဟဝ်တေဝ်တံရ။
ပ္ဍဲတွဵုရးဍုၚ်မန်ဂှ် ဟဝ်တေဝ်၊ မိုဝ်တေဝ် ကေုာံ ဗ္ဒမ်ဇူဒီုတံ နွံဒၟံၚ် ဟွံအောန်နူကဵု (၇၀) တုဲ ကမၠောန်ဟဝ် တေဝ် ဂမၠိုၚ်ဝွံ ကြဴနူဒပ်ပၞာန်သီအဝဵုတုဲ ဟိုတ်နူပၟတ်ဓာတ်လလဳ ပိုတ်ပၠိုတ်ဒၟံၚ်မွဲဏှမွဲဏှဂှ်ရ ဒးဆေၚ်လဝ်မုက်ကဵု ၚုဟ်ကပေါတ်ဗၞိက်အရပ်စပ်သၠုၚ်တိုန် ဗွဲမဇၞော် ကဵုဇြဟတ်ရ။
ပရိုၚ်−သြၚ်လောန်တိုၚ်(မ်)
ဗီုဓာတ်−CJ

