လ္ဂုၚ်၊ ဂျောန် (၄)
ဗၞိက်ပၠောပ်နၚ် နူကဵုဍုၚ်သ္အာၚ် မပၠောပ်ပ္တိုန်ဒၟံၚ် အပ္ဍဲဍုၚ်ဗၟာတံဂှ် သွက်ဂွံပသောၚ်ကဵုလှုဲ နကဵုဗာန်သၟးဂှ် ကမ္မတဳကောပ်ကာဲသြန်ဍုၚ်သ္အာၚ် တိုက်သြန်ဗဟဵု မၞုံသၟဝ်သြဇာကံၚ်ဇြဳပၞာန်တံ စၞောန်ပ္ညုၚ်ကၠုၚ်လဝ်ရောၚ် ဂွံတီကေတ် ဇရေၚ်တၠကမၠောန်ဗၞိက်ပၠောပ်တံရ။
နကဵုရဲပၠောပ်ဗၞိက်ဂမၠိုၚ် နူကဵုဂၠံၚ်ဍာ်ကဵုဒှ်၊ နူကဵုပယျဵုကဵုဒှ် သွက်ကပေါတ်ဗၞိက် မပၠောပ်ပ္တိုန်နၚ် နူကဵုဍုၚ်သ္အာၚ်တံဂှ် ကလိဂွံလာၚ်ဇြေန်တုဲ ပ္ဍဲအရာပသောၚ်လှုဲတံဂှ် ရာန်ကေတ် နူကဵုတိုက်သြန်အပ္ဍဲဍုၚ်ကဵုဒှ် နူကဵုသြန်ဂွံနၚ် နူဗၞိက်ပလံၚ်ပ္တိတ်တံကဵုဒှ် သွက်ဂွံပသောၚ်ကဵုကေတ် နကဵုဗာန်သၟးဂှ် စၞောန်ပ္ညုၚ်ကၠုၚ်ရ။
ဟိုတ်နူစၞောန်ပ္ညုၚ်ကၠုၚ် သွက်ဂွံပသောၚ်လှုဲ နကဵုဗာန်တံဂှ်ရ နကဵုသၟာဗၞိက်ပလံၚ်ပ္တိတ် ပ္ဍဲပယျဵုတံ သွက်ဂွံရာန်ကေတ်ဒဝ်ဠာဂှ် အခက်အခုဲနွံမာန်တုဲ ဒှ်ဒၟံၚ်အကာဲအရာ ဒးအာတ်ပ္တိုန်စရၚ် လာၚ်ဇြေန် သွက်ဗၞိက်ပလံၚ် ဗၞိက်ပၠောပ်တံ ဟွံဒေါအ်ဟွံဂွံရောၚ်ဂှ် တၠကမၠောန်ဗၞိက်ပလံၚ်ဗၞိက်ပၠောပ်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“ပ္ဍဲကဵုကမၠောန်ဗၞိက်ပၠောပ် ဗၞိက်ပ္တိတ်တံဂှ် ဒစးဒုၚ်တုဲ ဒးရာန်လဝ်ဂှ်နွံရ။ ဒးအာတ်ပ္တိုန်စရၚ် လာၚ်ဇြေန်ကၠာဏောၚ်။ ဟွံဂွံလာၚ်ဇြေန်မွဲသာ် မုကပေါတ်မှ ပၠောပ်ဟွံဂွံပုဟ်။ ပ္ဍဲအရာအာတ် ပ္တိုန်လာၚ်ဇြေန်ဏံရ လာၚ်ဇြေန်ဂှ် ဒှ်အာအဓိက။ သွက်ဂွံဂွံလာၚ်ဇြေန်ဗၞိက်ပၠောပ်ဂှ် ဒှ်ဒၟံၚ်အဓိကဏောၚ်။ ယဝ်ရကၠောန် Import မ္ဂး ဒးပ္တိုန်လာၚ်ဇြေန်ကၠာဟီုတှ်ေ သွက်ပယျဵုဂှ် ဒးရာန်သၠုဲကၠာဏောၚ်။ သွက်တရဴဍာ်မ္ဂး ပ္တိုန်လာၚ်ဇြေန်တုဲ ဒးလှဲသၠုဲဏောၚ်ဟီုဂှ်ရ အရာၜါဏံဂှ် တၞဟ်ခြာအာရ” သာ်ဝွံ ညးသ္ဂးရ။
ပ္ဍဲပရေၚ်ကူသာန်သွံရာန်ပယျဵုတံဂှ် ဗက်ကဵုဒေသတုဲ သြန်ယောန်ကြုက်၊ သြန်ၝာတ်သေံတံဂှ် ကဵုကေတ် တိုက်ရိုက်တံ ကၠောန်သ္ပဒၟံၚ်တုဲ ပ္ဍဲကဵုမွဲဒမြိပ် ပရေၚ်သွံ ရာန်ဗၞိက် အိန္ဒိယ−ဗၟာဂှ် သွက်ဂွံပသောၚ်ကဵု ရူပဳ ကေုာံ သြန်ဒ္ကေဝ် တိုက်ရိုက်မာန်ဂှ် ရေၚ်တၠုၚ်ဒၟံၚ်လေဝ် နွံဒၟံၚ်ရ။
အတိုၚ်တၚ်နၚ် ဌာနဝန်ဇၞော်ကူသာန်သွံရာန် ကံၚ်ဇြဳပၞာန် ဂှ်မ္ဂး အပ္ဍဲသၞာံဘဏ္ဍာ ၂၀၂၃−၂၄ ပွိုၚ်ၜါဂိတုဏံ ကလိဂွံ လဝ် ပမာဏဗၞိက်ပၠောပ် ဒဝ်ဠာအမေရိကာန် (၂ ဒဿမ ၇၉) ဗဳလျာန်တုဲ အခိၚ်လၟုဟ်ဂှ် နူကဵုဍုၚ်သ္အာၚ်ဂှ် ပၠောပ်ပ္တိုန်ဒၟံၚ် ပရေၚ်ဓလိုက်တမ်ရိုဟ်တံ၊ ကပေါတ်ဗၞိက် အပြောံ အရပ်စပ်မၞိဟ်တံကီု သီုကဵုကပေါတ် အရပ်စပ်မၞိဟ် ကေုာံ ကပေါတ်ဗၞိက် CMP တံရောၚ်ဂှ် သ္ဂးလဝ်ရ။

တိုက်သြန်ဗဟဵုဂှ် စၞောန်ပ္ညုၚ်လဝ် ကုတၠကမၠောန် ပလံၚ်ပ္တိတ်ဗၞိက်တံ ပ္ဍဲကဵုသြန်လုပ်ဂွံနၚ် နူကဵုဗၞိက် ပလံၚ်ပ္တိတ် နကဵုသြန်ဍုၚ်သ္အာၚ် (၆၅) တၟံကၠံဂှ် ဟွံဒေါအ်ဟွံဂွံ ဒးလှာဲကဵုသြန်ဒ္ကေဝ်ဗၟာရောၚ်တုဲ သှ်ေ (၃၅) တၟံကၠံဂှ် သွံတြးအတိုၚ်ၚုဟ်မ္ၚးဏံမာန်ရောၚ် ကဵုလဝ်အခေါၚ်ရ။
မွဲလ္ပာ်ပၠန်ဂှ် သွက်ၚုဟ်ဒဝ်ဠာဂွံညိၚ်ဝတ်ဂးတုဲ တိုက်သြန်ဗဟဵုဂှ် ပြံၚ်လှာဲအာ ၚုဟ်နှေန်လှာဲလှုဲ မစၞောန်လဝ်တံဂှ် ဟွံသေၚ်တုဲ ပ္ဍဲကဵုဒၞါဲလှာဲလှုဲ ပ္ဍဲဗာန်တံဂှ် သၠုၚ်ပ္တိုန်သွံတြးအာကဵု သြန်တၞးဍုၚ်သ္အာၚ်တံဏောၚ်ဂှ် ပ္ဍဲဂိတုမေ (၂၆) တေံ လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)
ဗီုဓာတ်−CJ

