ညးပန်ဂစိုတ်လဝ် သၟာဒယှ်ေဒွက် လဳလဳနိုၚ်ဂျဝ် ကဵုဒၟံၚ်ဇြဟတ်ကုဒပ်ပၞာန်ဂှ် ဒးဒုၚ်ရပ်ဒက်ထိၚ် ဒဝ်လဝ်ရဂး

လဂုၚ် – ဂျောန်(၆)

ရးဒေသလဂုၚ်၊ ပ္ဍဲပွိုၚ်ဍုၚ်ယာန်ကေန် ရပ်ဂွံလဝ် ညးပန်ဂစိုတ်လဝ် သၟာဒယှ်ေဒွက် လဳလဳနိုၚ်ဂျဝ်ရဂှ် ညးစုက်လုက်ကဵု ဒပ်ဗၠာဲသၟိၚ်ရးဒေသလဂုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။

ဂိတုဂျောန် တုဲကၠုၚ် စၟတ်တ္ၚဲ (၄) အခိၚ်နူဂယး (၃)နာဍဳကဝက်ဂှ် ဒးဒုၚ်ရပ်ဂွံလဝ် ပ္ဍဲဗ္ဒမ် မၞုံပ္ဍဲလ္ဂောဝ်ဒိုၚ် (လှည်းတန်း)ဂှ်တုဲ ပလံၚ်ဗစိုပ်လဝ် ဒၞာဲပရေၚ်စၟဳစၟတ်ရဂှ် ဂွံတီကေတ်ရ။

ကိုဝ်ဖိုဝ်ပျိ ညးဒးဒုၚ်ရပ်လဝ်ဂှ် ကြဴနူရေၚ်တၠုၚ်လဝ် Mission တုဲ ၜိုန်ရကလေၚ်စွံလဝ်သော် အတိုၚ်ပကတိကီုလေဝ် ပ္ကိတ်ကဵုတၚ်တၞဟ်တုဲ ဒးဒုၚ်ရပ်လဝ်ရဂှ် ညးစုက်လုက်ကဵုဗၠာဲ သၟိၚ်ရးဒေသ လဂုၚ်မွဲတၠ ဟီုသ္ဂးလဝ်ရ။

သ္အာၚ်နူဂှ်ပၠန် သွက်ဂွံရပ်ကေတ်ဂွံဂှ် နူကဵုကေမ္မရာ သ္ၚိ၊ ဆေၚ် ကေုာံ YBS မွဲကဆံၚ် ကလေၚ်ဂၠိုက်ဂၠာဲ စၟဳစၟတ်လဝ်ရဂှ် ညးဟီုသ္ဂးလဝ်ရ။

လဳလဳနိုၚ်ဂျဝ် သၟာဒယှ်ေဒွက်ကဵုဒၟံၚ်ဇြဟတ်ကုဒပ်ပၞာန်ဂှ် ပ္ဍဲဂိတုမေ စၟတ်တ္ၚဲ (၃၀) တုဲကၠုၚ်တေံ ဒးဒုၚ်ပန်ဂစိုတ်လဝ် ပ္ဍဲဂတသ္ၚိဒၟံၚ်ညးတုဲ ၜိုန်ရပလံၚ်ဗစိုပ်လဝ်ရုၚ်ဂဥုဲ နဒဒှ်ကာတၟေၚ်ကီုလေဝ် အခိၚ်တက် CT Scam ဒးချိုတ်လဝ်ရဂှ် ဂွံတီကေတ်ရ။

ပ္ဍဲကဵုဂိတုတုဲကၠုၚ်ဏံ ဥူတေန်လွေန် ညးချဳဒရာၚ်ကတိုၚ်ကၟဟ်ပရေၚ်ကောန်ဂကူ ကေုာံ သၟာဒယှ်ေဒွက် လဳလဳနိုၚ်ဂျဝ်တအ် ဒးဒုၚ်ဂစိုတ်လဝ်တုဲဂှ် သွက်ဂွံဗ္ဂပ်ကဵု ညးလုပ်ဂကောံ မ.ဘ.သ တအ် လွဟ်လက်နက် ကံၚ်ဇြဳပၞာန်ဟီုဂးဒၟံၚ်ကီု က္ဍိုပ်သ္ကိုပ်ပၞာန် ကဵုပရေၚ်ဂီုကၠီုဟွံမာန်ဂှ်လေဝ် ဒးဒုၚ်ဟီုဂးပါ်ပါဲဒၟံၚ်ရ။

ပရိုၚ် – သြၚ်လောန်တိုၚ်(မ်)

ဗီုရုပ် – Lily Naing Kyaw (Facebook)

Leave a Reply

Your email address will not be published. Required fields are marked *