လဂုၚ် – ဂျောန်(၆)
ရးဒေသလဂုၚ်၊ ပွိုၚ်ဍုၚ်ကျောက်တတာ အရာပ်(၄)၊ ဂၠံၚ်ပါန်ဇြောတာန် ရုၚ်သ္ကိုပ်က္ဍိုက်က္ဍိုပ်အကံက်အခေါန်အဇာလ္ဒောဝ် (၃)၊ ပ္ဍဲဌာနအကံက်အခေါန် ဆေၚ်စပ်ကဵုကုမ္ပဏဳ မၞုံပ္ဍဲထပ်မရနုက်ကဵု (၃)ဂှ် ပရေၚ်ပါ်ခတိုဟ် က္တဵုဒှ်လဝ်တုဲ ဒးအာဘဲဝပ် (၆)တၠရဂှ် လ္ပာ်ကံၚ်ဇြဳပၞာန် လလောၚ်တြးလဝ်ရ။
ပရေၚ်ဒဒှ်ဂှ် တ္ၚဲဏံ ဂိတုဂျောန် စၟတ်တ္ၚဲ (၅) အခိၚ်ဒေါဝ်တ္ၚဲ (၁၂)နာဍဳပြၚ်ဂှ် ပရေၚ်ပါ်ခတိုဟ် က္တဵုဒှ်လဝ် ပ္ဍဲသ္ကဲခုၚ်ဂ္ဇအ်ညးဍုၚ်ကွာန်ဂှ်ရ။

ဟိုတ်နူပရေၚ်ပါ်ခတိုဟ်တုဲ မဖျိုဝ်ဖျိုဝ်အောၚ် (ဒုသ္ကိုပ်က္ဍိုက်က္ဍိုပ်)၊ မမျေတ်မှူခေန်၊ ဒဝ်ခေန်လေတ်၊ မအဉ္စန ညးမဒှ်သ္ဇိုၚ်ဝန်ဌာနအကံက်အခေါန်ကီု မသုနှေန်ဥူ၊ မချေဝ်ရဳ ညးကၠုၚ်စိုပ် ပ္ဍဲဌာနအကံက်အခေါန်တအ် ဇီုကပိုက်ဒးလဝ်ဘဲဝပ်ရဂှ် ဂွံတီကေတ်ရ။
ညးဇီုကပိုက်ဒးလဝ်ဘဲဝပ်တအ်ဂှ် ပလံၚ်ဗစိုပ်လဝ် ရုၚ်ဂဥုဲဇၞော်လဂုၚ်တုဲ ပ္ဍဲဒၞာဲပရေၚ်ပါ်ခတိုဟ် က္တဵုဒှ်လဝ်ဂှ် ဒပ်သၟဝ်တဲကံၚ်ဇြဳပၞာန်တအ် ကၠုၚ်စိုပ်ပသောၚ်သ္အးလဝ်ရဂှ် လလောၚ်တြးလဝ်ရ။

စပ်ကဵုပရေၚ်ပါ်ခတိုဟ်ဏံတုဲ ဂကောံလဵု ကၠောန်သ္ပလဝ်ရောဂှ် ၜိုန်ရဟွံဂွံလလောၚ်တြးလဝ်ဏီကီုလေဝ် လ္ပာ်ကံၚ်ဇြဳပၞာန်ဂှ် ဟီုစောတ်စောဲလဝ် NUG ကဵု PDF တအ် ကၠောန်သ္ပလဝ် နွံဒၟံၚ်ရ။
ပရိုၚ်-သြၚ်လောန်တိုၚ်(မ်)
ဗီုရုပ် – မဳဒဳယာတြးဝါဒကံၚ်ဇြဳပၞာန်

