တၞၚ်သြဳ၊ ဂျောန်(၆)
ညးဍုၚ်ကွာန်ပါဲဒဴဘဲပၞာန် ပ္ဍဲပွိုၚ်ဍုၚ်တၞၚ်သြဳ ရးဒေသဇၞော်တၞၚ်သြဳ မလလောၚ်တြးလဝ် ပရေၚ်အုပ်ဓုပ် ပၞာန်တအ်ဂှ် ဟိုတ်နူစိုပ်ကၠုၚ်အခိၚ်ကသီုတုဲ ဒးဒှ်ဒၟံၚ်ယဲဇွဟ်ရာသဳ ဖအုံဖအုံ ဗွဝ်ဗွဝ် နွံဒၟံၚ်ရဂှ် ညးကဵုဒၟံၚ် အရီုဗၚ် ညးပါဲဘဲပၞာန်တအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ညးဍုၚ်ကွာန်ပါဲဘဲပၞာန်တအ်ဂှ် သ္ပတံနူ ဂိတုမေ ဒုတိယသတ္တာဟတုဲ ယဲဇွဟ်ရာသဳ စဒှ်ကၠုၚ်တုဲ အခိၚ်လၟုဟ်ဏံ ညးဍုၚ်ကွာန် ပါဲဓလေတ်ဘဲပၞာန် ဒှ်ဒၟံၚ်ယဲ စဵုကဵု (၃၀၀) တၠပြၚ်ကီု ဂကောံကၟိန်အိန် ထံၚ်လ္ၚဵုတအ်ဂှ် ဒးဒှ်ဒၟံၚ်ယဲ သီုအလုံမွဲသ္ၚိကၟိန်အိန်ထံၚ် နွံရ။

သ္အာၚ်နူဂှ် ညးဍုၚ်ကွာန်ပါဲဓလေတ်ဘဲပၞာန်တအ် မ္ၚးနူယဲဇွဟ်ရာသဳတုဲ သီုဒးဒှ်ဒၟံၚ် ယဲဇွဟ်အိက်ဂစေံ ကေုာံ ယဲဂၞဴတုဲ ဒၟာနူပရေၚ်ကၠောံထၞာန်နွံဒၟံၚ်ဂှ်ရ ဒှ်ကၠုၚ် စဵုကဵုအကာဲအရာ ဒးမၚ်ရံၚ်ကျောဝ်ရဂှ် ဟီုသ္ဂးလဝ်ရ။
ညးတာလျိုၚ်ဂကောံရီုဗၚ်ညးပါဲဘဲပၞာန် တွဲလေတ်ညဳညဳ (တွဲလက်ညီညီ)ဂှ်မ္ဂး ပ္ဍဲကဵုညးပါဲဘဲပၞာန်ဂှ် ယဲဇွဟ်ရာသဳ ဒှ်ဒၟံၚ် ဖအုံဖအုံ ဗွဝ်ဗွဝ် ဒးဆေၚ်ဒၟံၚ်မုက်ကဵု ပြသၞာဂဥုဲဇဗဟွံရုမ်ဂပ်ရဂှ် ဟီုသ္ဂးလဝ်ရ။
ဟိုတ်ဂှ်ရ နကဵုညးဍုၚ်ကွာန်တအ် သွက်ဂွံရီုဗၚ်ကဵု ဂဥုဲဇဗနွံဒၟံၚ်ပၟိက် သွက်ညးပါဲဒဴဘဲပၞာန် ၜိုတ်သ္ပမာန်ကီု နကဵုဂကောံမဆေၚ်စပ်တအ်လေဝ် သွက်ဂွံကဵုရီုဗၚ်ဗ္စာရဏာပရေၚ်မၞိဟ်ဂှ်လေဝ် ဗတိုက်ဖ္အောဝ်လဝ်ရ။

မွဲလ္ပာ်ဂှ်မ္ဂး ညးဍုၚ်ကွာန်ပါဲဘဲပၞာန် ပ္ဍဲကဵုပွိုၚ်ဍုၚ်တၞၚ်သြဳတအ် ဟိုတ်နူဒပ်ကံၚ်ဇြဳပၞာန် ပိုၚ်ခြာလဝ် အခေါၚ်ပ္ဍိုက်ဏာနၚ် ဇွောံမဂဥုဲဇဗတုဲ ဒးဆေၚ်ဒၟံၚ်မုက်ကဵု တၚ်ခက်ခုဲနာနာသာ်ရ။
ပ္ဍဲပွိုၚ်ဍုၚ်တၞၚ်သြဳဂှ် ပ္ဍဲမွဲကာလဒပ်ပၞာန်သီအဝဵုပွိုၚ် (၂) သၞာံပြၚ်ဏံ ဟိုတ်နူဒပ်ကံၚ်ဇြဳပၞာန် ပန်ဖျေံ လဝ်လွဟ်ဇၞော်ကီု ဟိုတ်နူပေါဲဗတိုက်တအ်ကီု ညးဒေသဗ္ဒာဲ (၈၀၀၀) တၠ ဒးဂြိပ်ဒဴပါဲဓလေတ်ဒၟံၚ်ရဂှ် ဂွံတီကေတ် နူညးကဵုဒၟံၚ်အရီုဗၚ် ညးပါဲဘဲပၞာန်တအ်ရ။
ပရိုၚ်-သြၚ်လောန်တိုၚ်(မ်)
ဗီုရုပ်-Social Media

