ရေဝ်၊ ဂျောန်(၆)
တွဵုရးဍုၚ်မန် သၞေဟ်ကၚ်စၟဳစၟတ်ကံၚ်ဇြဳပၞာန် ပံက်စွံလဝ် ပ္ဍဲဂၠံၚ်ကွဳစက် ရေဝ် – မတ်မလီု အာတ်ကေတ် ဒၟံၚ်သြန် နူညးအာတရဴတအ် ဗ္ဒာဲကဵုဠက် နွံကၠုၚ်ရဂှ် ညးအာတရဴကီု သီုသၟာဒဳကွဳစက်တရဴဇမ္ၚောဲတအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ကံၚ်ဇြဳပၞာန် ထ္ၜးဟိုတ်ကဵုပရေၚ်ဂီုကၠီုတုဲ ပံက်စွံဂလိုၚ်ပတိုန်လဝ် သၞေဟ်ကၚ်စၟဳစၟတ် ပ္ဍဲဂၠံၚ်ကွဳစက် ရေဝ်-မတ်မလီုတုဲ အာတ်ကေတ်ဒၟံၚ်သြန် နူညးဍုၚ်ကွာန်အာတရဴတအ် လောန်ၜက်နူဗၞတ်ဗ္ၜတ်ရ။
ညးဍုၚ်ကွာန်အာတရဴတအ်ဂှ် ပ္ဍဲသၞေဟ်ကၚ်စၟဳစၟတ် မွဲမွဲသၞေဟ်မ္ဂး နူကဵု (၁၀၀၀) စဵုကဵု (၃၀၀၀) လ္ၚီဒကေဝ် ဒးကဵုဒၟံၚ်သြန်တုဲ ညးအာတရဴ တၞးကာဒ်ကောန်ဍုၚ် တွဵုရးဍုၚ်မန်ဟွံသေၚ်ဂှ် မွဲတၠမ္ဂး နူ (၂၀၀၀) ဒ္ကေဝ် စဵုကဵု (၅၀၀၀) ဒ္ကေဝ် ဒးကဵုဒၟံၚ်ရ။

ညးဍုၚ်ကွာန်အာတရဴမွဲတၠဂှ်မ္ဂး သၞေဟ်ကၚ်စၟဳစၟတ်ဒဒန်ဇုက် ပ္ဍဲဂၠံၚ်ရေဝ်-မတ်မလီုဂှ် ဒှ်အကာဲအရာ ပရေံအိုတ်တုဲ ပ္ဍဲအရာကံက်ကေတ်သြန်လေဝ် တိုန်စိုပ်ကၠုၚ် ဒဵုကဵုလ္တူကွဳစက်တုဲ အာတ်ကေတ်ဒၟံၚ် မွဲတၠမ္ဂး စဵုကဵု ၃၀၀၀ ဒ္ကေဝ်ရဂှ် ဟီုသ္ဂးလဝ်ရ။
သၞေဟ်ကၚ်စၟဳစၟတ်ဒဒန်ဇုက်၊ သၞေဟ်ကၚ်စၟဳစၟတ်ကွာန်အရုတ္တံၚ်၊ သၞေဟ်ကၚ်စၟဳစၟတ်လုပ်ဍုၚ်ကဵု သၞေဟ်ကၚ်စၟဳစၟတ်ဂၠံၚ်အာကျာ်ပိ ပ္ဍဲဂၠံၚ်ရေဝ်-မတ်မလီုတအ်ဂှ် ဒှ်သၞေဟ်ကၚ်အာတ်ကေတ်ဒၟံၚ်သြန် နူညးဍုၚ်ကွာန်အာတရဴ လောန်ၜက်နူသၞောတ်ဗ္ၜတ်တုဲ သၞေဟ်ကၚ်စၟဳစၟတ်သှ်ေနူဂှ်လေဝ် အာတ်ကေတ် ဒၟံၚ်သြန် နူကွဳစက်ပ္ဍိုက်ဗၞိက် ကွဳစက်ပ္ဍိုက်ညးအာတရဴတအ် နွံရ။
ညးဒေသရေဝ်မွဲတၠဂှ်လေဝ် ကၠာတေံတှ်ေ ပ္ဍဲသၞေဟ်ကၚ်စၟဳစၟတ်ဂှ် ၜိုန်ရပရေၚ်အာတ်ကေတ်သြန် နူသၞေဟ်ကၚ်ဂှ် ၜိုန်ဟၟဲကီုလေဝ် သ္ပတံနူတုဲကၠုၚ် မွဲၜါဂိတုဏံတုဲ အာတ်မိက်ကၠုၚ်သြန်ကီု နူဍုၚ် ယဝ်စဴကွာန်မ္ဂး ဒးကဵုသြန် ၁၀၀၀၀ ရဂှ် သ္ဂးလဝ်ရ။

ပရေၚ်အာတ်ကေတ်ဒၟံၚ်သြန် ပ္ဍဲသၞေဟ်ကၚ်စၟဳစၟတ်တအ်ဂှ် ၜိုန်ရပတိုန်ထ္ၜးလဝ်ကဵု ကံၚ်ဇြဳပၞာန်ကီုလေဝ် ပရေၚ်ရပ်စပ်ကေတ်အရေဝ် မမိက်ကဵုမွဲမွဲ ရေၚ်တၠုၚ်ကဵုလဝ် ဟၟဲရဂှ် ဂွံတီကေတ် နူဇရေၚ်သ္ဇိုၚ်ဝန် ဌာမဆေၚ်စပ်ကံၚ်ဇြဳပၞာန်တအ်ရ။
တံဒပ်ကံၚ်ဇြဳပၞာန်၊ ဗဒိုပ်ပၞာန် ကေုာံ ရုၚ်ဌာနမဆေၚ်စပ်တအ် ဒးဒုၚ်ဗတိုက်ဒၟံၚ်ခြာဟွံလအ်ဟွံလအ် ပ္ဍဲတွဵုရးဍုၚ်မန် ပွိုၚ်ဍုၚ်ရေဝ်ဂှ် သ္ပတံနူဂိတုဖေဖဝ်ဝါရဳ စၟတ်တ္ၚဲ (၂) တေံ ကံၚ်ဇြဳပၞာန် လလောၚ်တြး လဝ် နဒဒှ်ပရေၚ်အုပ်ဓုပ်ပၞာန်တုဲဂှ် ပတေၚ်ဂြတ်လဝ် ပရေၚ်ဂီုကၠီုကီု ပံက်စွံကၠုၚ် သၞေဟ်ကၚ်စၟဳစၟတ် ဗွဲမဂၠိုၚ်ဂၠေၚ်ရ။
ပရိုၚ်-သြၚ်လောန်တိုၚ်(မ်)
ဗီုရုပ်-CJ

