ညးဒေသ နူပွိုၚ်ဍုၚ်မုၚ် KNU (၄၀၀၀) ပြၚ် ထပ်ဒးဂြိပ်ဒဴဒၟံၚ်

မုၚ်၊ ဂျောန် (၆)

ပ္ဍဲကဵုပွိုၚ်ဍုၚ်မုၚ်၊ တိဍာ်ဒပ်မဟာ (၃) ခရိုၚ်ညံၚ်လေဝ်ပေန် ဗော်သွးကောန်ဂကူကရေၚ် KNU ဂှ် ဟိုတ်နူဒပ်ကံၚ်ဇြဳပၞာန် ပန်ပှော်လွဟ်ဇၞော်တုဲ ညးဒေသ (၄၀၀၀) ပြၚ် ဒးဂြိပ်ဒဴပါဲဒလေတ်ဒၟံၚ်ရောၚ် KNU ဗဟဵု လလောၚ်ပ္တိတ်လဝ်ရ။

ညးဒေသ နူပွိုၚ်ဍုၚ်မုၚ် KNU (၄၀၀၀) ပြၚ် ထပ်ဒးဂြိပ်ဒဴဒၟံၚ်

ပ္ဍဲဂိတုမေ (၂၉) အခိၚ်ဗ္တံ ၜိုတ် (၈) နာဍဳကဝိုက်တုဲကၠုၚ်တေံ နူကဵုဒပ်ကံၚ်ဇြဳပၞာန် ပန်ပှော်စုတ်လဝ် လွဟ်ဇၞော် အပ္ဍဲကွာန်မဳတိုၚ်တဝ် ပွိုၚ်ဍုၚ်မုၚ်ဂှ် (၁) မ၊ အပ္ဍဲကွာန်အံၚ်ဆာန်တာဂှ် (၁) မတုဲ ပ္ဍဲဂိတုမေ (၃၀) ဂှ်လေဝ် ပန်ပှော်စုတ်လဝ် လွဟ်ဇၞော် အပ္ဍဲကွာန်တာဇြဳဂှ် (၅) မ၊ အပ္ဍဲကွာန် (ကြက်တတ် ညောၚ်ပၚ်) ဂှ် (၁၀) မရောၚ် ပါလုပ် ပ္ဍဲတၚ်လလောၚ်တြးဂှ်ရ။

ဒပ်ကံၚ်ဇြဳပၞာန် ဟိုတ်နူပန်ပှော်စုတ်လဝ် နကဵုလွဟ်ဇၞော်တံ ဟွံပိုတ်သ္ကုတ်ဂှ်ရ သ္ၚိဒၟံၚ် (၁) မ ဒးလီုလာ် အာလဝ်တုဲ ညးဍုၚ်ကွာန်ဒေသဂမၠိုၚ်ဝွံ ဖေက်ဂၟံက်တုဲ ဒးဂြိပ်ဒဴပါဲဒလေတ်ဒၟံၚ် အလုံကွာန်မွဲရောၚ် KNU သ္ဂးလဝ်ရ။

ဟိုတ်နူဒပ်ကံၚ်ဇြဳပၞာန် ပန်ပှော်ဗ္တိုက်လဝ် ညးဍုၚ်ကွာန်တံဂှ်တုဲ ကွာန်တာဇြဳ၊ ကွာန်(ကြက်တက် ညောၚ်ပၚ်) ၊ ကွာန်နှဴတဝ်၊ ကွာန်ကညေန်ကျ၊ ကွာန်တမာန်ကျေန် အပ္ဍဲပွိုၚ်ဍုၚ်မုၚ် KNU တံဂှ် ဒှ်ကွာန်ဒးဂြိပ်ဒဴပါဲဒလေတ်ဒၟံၚ်တံတုဲ လၟိဟ်မၞိဟ်အပံၚ်ဖအိုတ် (၄၂၄၃) တၠ သ္ပဒတဴဒၟံၚ်အိုတ်ရောၚ် ဂွံတီကေတ် အတိုၚ်တၚ်လလောၚ်တြးတံရ။

ညးဍုၚ်ကွာန်ဒေသဂမၠိုၚ်ဝွံ ဟိုတ်နူဒးထောံလသာဌာန်ဒၟံၚ်တုဲ ဒးဂြိပ်ဒဴပါဲဒလေတ်ဒၟံၚ်ဂှ်ရ သွက်ဂွံကၠောန်ကမၠောန်ဂှ် ဟွံပြေပြံၚ်ရတုဲ နွံပၟိက်ဒၟံၚ် အရီုဗၚ်ပရေၚ်ဗ္စာရဏာမၞိဟ်ကာတၟေၚ်ဂှ်ကီု၊ အခိၚ်လၟုဟ်ဝွံ ဒၟါနူဒှ်ရာသဳဗြဲဂှ်ရ ညးဍုၚ်ကွာန်ပါဲဒဴဘဲပၞာန်ဂမၠိုၚ်ဝွံ ဒးဂဗဒၟံၚ် အခက်အခုဲပြသၞာ ဗွဲမဂၠိုၚ်ဂၠေၚ်တုဲ နွံပၟိက်ဒၟံၚ်ကဵု အရီုဗၚ်ဇွောံမစၞစ၊ ဒၞါဲမံၚ်စံၚ်၊ ပရေၚ်ထတ်ယုက် ကေုာံ ဂီုကၠီုဘဝတံ ကာတၟေၚ်ရောၚ်ဂှ် KNU သ္ဂးရ။

ပ္ဍဲပွိုၚ်ဍုၚ်မုၚ်ဂှ် စဵုကဵုဂိတုမေ (၁၀) တုဲကၠုၚ်တေံ လၟိဟ်ညးပါဲဒဴဘဲပၞာန် နွံဒၟံၚ် (၂၈၀၀၀) ပြၚ်တုဲ အခိၚ်လၟုဟ်ဂှ် လၟိဟ်ညးပါဲဒဴဘဲပၞာန် ထပ်ပဵုတိုန်ကၠုၚ် (၄၀၀၀) ပြၚ်ဂှ်ရ လၟိဟ်ညးပါဲဒဴဘဲပၞာန် အပံၚ်ဖအိုတ် ဒှ်အာ (၃၂၀၀၀) ပြၚ်ယျဂှ် KNU ဗဟဵု လလောၚ်ပ္တိတ်လဝ်ရ။

ပရိုၚ်−သြၚ်လောန်တိုၚ်(မ်)

ဗီုဓာတ်−KNU

Leave a Reply

Your email address will not be published. Required fields are marked *