သွက်ဂွံထိၚ်ဒက် မိုဝ်ဗျေဝ်မာန်ဂှ် ကံၚ်ဇြဳပၞာန် ပ္တိတ်ကၠုၚ်ဇြဟတ် ဗွဲမသ္ကာတ်မြဟ်

မိုဝ်ဗျေဝ်၊ ဂျောန် (၆)

သွက်ဂွံထိၚ်ဒက် ဍုၚ်မိုဝ်ဗျေဝ် ပယျဵုတွဵုရးကရေၚ်ဍာဲကဵု တွဵုရးသေံသၠုၚ်ကျာ မဒှ်ဒၞါဲပဋိပက္ခပရေၚ်ပၞာန် သ္ကာတ်မြဟ်ဒၟံၚ်ဂှ်တုဲ လ္ပာ်ကံၚ်ဇြဳပၞာန် ပ္တိတ်ဇြဟတ်ပလေဝ်ပလေတ်ကၠုၚ် ဗွဲမသ္ကာတ်မြဟ်ဂှ် ဂကောံဇြဟတ်ပၠန်ဂတးဗလးတိတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ဒပ်ကံၚ်ဇြဳပၞာန်တံ သွက်ဂွံထပ်ဖျေံသ္ဇိုၚ် လ္တူဍုၚ်မိုဝ်ဗျေဝ် မဒှ်ဒၞါဲပၟိက်ဇၞော် သွက်ပရေၚ်ပၞာန်ဂှ်ပၠန်ဂှ် စနူဂိတုဂျောန်စတေံတုဲ သွက်ဂွံလုပ်စိုပ်ထ္ပက်ကၠုၚ်ပၞာန် နကဵုကရောၚ်ပၞာန် ၃ ဂှ် ပ္တိတ်ဒၟံၚ်ဇြဟတ်တုဲ မ္ၚးဍုၚ်ဂှ်လေဝ် မၚ်ဒၟံၚ် နကဵုကရောၚ်ပၞာန်မွဲပၠန် မဒှ်ရ။

မွဲလ္ပာ်ပၠန်ဂှ် တမ်ဒပ်ခလရ (၄၂၂) ကံၚ်ဇြဳပၞာန် ဖျေံသ္ဇိုၚ်မိုဝ်ဗျေဝ်ဂှ်ဝွံ အရိုဟ်ဒဒှ်တ္ၚဲ ပန်ပှော်ဒၟံၚ် လွဟ်ဇၞော် လ္တူဍုၚ်မိုဝ်ဗျေဝ်ဂှ်တုဲ ပ္ဍဲဂိတုဂျောန် (၄) မွဲတ္ၚဲဓဝ်ဂှ် ပန်ပှော်စုတ်လဝ် လွဟ်ဇၞော် ဟွံအောန်နူကဵု (၃၀) ဝါရ။

ကိုဝ်ဟာန်ယဳ နူကဵုဒပ်စြေက်(ကျွဲချို) ဒပ်စဵုဒၞါညးဍုၚ်ကွာန်မိုဝ်ဗျေဝ်ဂှ် ကံၚ်ဇြဳပၞာန် ပလေဝ်ပလေတ်ပရေၚ်ပၞာန်ဂှ်ဝွံ ဒှ်အရာဂ္စါန်သွက်ဂွံထိၚ်ဒက် ဍုၚ်မိုဝ်ဗျေဝ်တုဲ ကၠောန်ဒၟံၚ် သွက်ဂွံထပိုတ် ဂၠံၚ်တရဴဇွောံမ ဂကောံဒပ်စဵုဒၞါညးဍုၚ်ကွာန်တံရောၚ်ဂှ် ဟီုရ။

“လ္ဂောံကဵုပရိုၚ်အပ္ဍဲဒပ်တံဂှ်မ္ဂး မိက်ဂွံထိၚ်ဒက်ဍုၚ်မိုဝ်ဗျေဝ်ရဏောၚ်။ ညံၚ်ဂကောံဒပ်စဵုဒၞါ ညးဍုၚ်ကွာန်မိုဝ်ဗျေဝ်တံ လုပ်ဍုၚ်ဟွံဂွံ၊ ညံၚ်ဗ္တိုက်ဟွံဂွံတုဲ ကံၚ်ဇြဳပၞာန်ဂှ် သွက်ဂွံလုပ်ဖျေံသ္ဇိုၚ် အပ္ဍဲဍုၚ်ဂှ် ပ္တိတ်ဒၟံၚ်ဇြဟတ် အရိုဟ်တ္ၚဲရ။ ဂၠံၚ်တရဴလွိုၚ်ကဝ်၊ ဒဳမအ်သဵုကၟာတ်အာတုဲ ဇွောံမညး ဍုၚ်ကွာန်တံကဵု ဇွောံမဂကောံပၠန်ဂတးတံဂှ် ဒှ်ဒၟံၚ်ဗီုပြၚ် ဒးပလံၚ်ဒၟံၚ် နူကဵုမွဲဒၞါဲဓဝ်ဏောၚ်” သာ်ဝွံ သ္ဂးရ။

သ္အာၚ်နူဂှ်ပၠန် ဒပ်ကံၚ်ဇြဳပၞာန်ဝွံ နကဵုတၚ်ခယျ လ္တူဍုၚ်မိုဝ်ဗျေဝ် ပဳဒဳအာဖ်တံ နွံမာန်ဏောၚ်ဂှ် လၟေၚ်ဒဒှ်တ္ၚဲ ဗ္တိုက်ဂြာတ်ဒၟံၚ်ဗုမ် လ္တူဍုၚ်ဂှ် နကဵုက္ၜၚ်ကျာတံ၊ ပန်ပှော်ဗ္တိုက်ကၠုၚ်လွဟ်ဇၞော်တံဂှ်ရ ညးဍုၚ်ကွာန် ဇီုကပိုက်ချိုတ်ဂျိုၚ်တံ နွံဒၟံၚ်ရ။

ၜိုန်ရဒးဒုၚ်ဗ္တိုက်ဒၟံၚ် ကုဒပ်ကံၚ်ဇြဳပၞာန်တံ သာ်ဏံကီုလေဝ် ညးဒေသမိုဝ်ဗျေဝ်တံဝွံ တိသ္ဇက်ဂွံဂြိပ် ဟွံမွဲဂှ်ရ ဒးမံၚ်တန်တဴဒၟံၚ် ပ္ဍဲသ္ၚိဇကုတံရဂှ် ညးဒေသတံ သ္ဂးအိုတ်ရ။

ဒပ်ကံၚ်ဇြဳပၞာန်ဝွံ လၟေၚ်ဒဒှ်တ္ၚဲ ပန်ပှော်ဗ္တိုက်ဒၟံၚ် လ္ပာ်မိုဝ်ဗျေဝ် ပယျဵုတွဵုရးကရေၚ်ဍာဲ−သေံဂှ်ကဵု လ္ပာ်သ္ကုတ်ဗၟံက်ဒဳမအ်သဵုတံ နကဵုက္ၜၚ်ကျာတံဂှ်တုဲ ပ္ဍဲဂိတုမေ မွဲဂိတုဓဝ်ဂှ် ဗ္တိုက်လဝ် (၁၀၀) ဝါဟွံကရ။

အခိၚ်လၟုဟ်ဂှ် သီုမိုဝ်ဗျေဝ် သီုသ္ကုတ်ဗၟံက်ဒဳမအ်သဵုတံဂှ် ပေါဲဗ္တိုက်တံ သ္ကာတ်မြဟ်ဒၟံၚ်တုဲ လ္တူဍုၚ်ဒဳမအ် သဵု ဒၞါဲလ္ၚဵုတံဂှ် ကံၚ်ဇြဳပၞာန် ကလေၚ်ဂွံလဝ်ရောၚ် ဂွံတီကေတ် နူကဵုပရိုၚ်တမ်ရိုဟ်အပ္ဍဲဒေသတံရ။

ပရိုၚ်−သြၚ်လောန်တိုၚ်(မ်)

ဗီုဓာတ်−Social Media

Leave a Reply

Your email address will not be published. Required fields are marked *