ဟိုတ်နူပရေၚ်ကၠတ်ဂစိုတ်စုတ်ဂျိတုဲ ပ္ဍဲဘာတန်မူလ အာဖဂါန်နေဿတာန်ဂှ် ကွးဘာညးဗြဴ ဗ္ဒါဲ (၈၀) တၠ ဒးအာဂျိ

ကာပူ(လ်) ၊ ဂျောန် (၆)

အပ္ဍဲပရေၚ်ဗ္တိုက်ၜါဝါ မက္တဵုဒှ်အာလဝ် ပ္ဍဲဘာတန်မူလ မၞုံအာဖဂါန်နေဿတာန်တံဂှ် ကွးဘာညးဗြဴ ဗ္ဒါဲ (၈၀) တၠ စၞဒှ်ဂျိတုဲ ဒးပ္တိုန်လဝ်ရုၚ်ဂဥုဲရောၚ် ညးတာလျိုၚ်မွဲတၠ ဟီုရ။

ပ္ဍဲသၞာံ ၂၀၂၁ ဂိတုအဝ်ဂါတ် နူစတာလဳဗာန်တံ သီအဝဵုတုဲဂှ် ကြဴနူပါ်ထ္ကးဍဵုဍိုက် အခေါၚ်ဗၠးၜး သၟတ်ဗြဴ ကေုာံ ညးဗြဴအာဖဂါန်တံတုဲဂှ် ပရေၚ်ဗ္တိုက်သာ်ဏံဝွံ ဒှ်အလန်ပထမကၠာအိုတ်ရောၚ် သ္ဂးရ။

အခေါၚ်ဗ္တောန်ပညာ သၟတ်ဗြဴ မတိုန်စိုပ်ဒၟံၚ်တန်ဆဌမ လ္ပာ်လ္တူဂှ်ကီု သီုကဵုတက္ကသိုလ်တံဂှ် ကၟာတ်လဒဵုလဝ်တုဲ အခေါၚ်ကၠောန်ကမၠောန် ပ္ဍဲကဵုဝေၚ်ကမၠောန်တံကဵု ဒၞါဲမဆေၚ်စပ်ကဵုညးဂမၠိုၚ်တံဂှ်လေဝ် ကၟာတ်လဒဵုလဝ် ညးဗြဴတံရ။

ပ္ဍဲကဵုတွဵုရး သာအဳပဝ်(လ်) ခရိုၚ်သာန်ချာရာတ်ဂှ် ပ္ဍဲတ္ၚဲသ္ၚိသဝ် ကဵု တ္ၚဲအဒိုတ်တေံ ဒဒှ်ရကွးဘာညးဗြဴ ဗ္ဒါဲ (၈၀) တၠ ဒးအာလဝ်ဂျိဂှ် ဇၞော်သ္ကိုပ် ဌာနပရေၚ်ပညာတွဵုရး ရာမ်မနဳ ဟီုရ။

“ဘာတန်မူလၜါဘာဂှ်ဝွံ မွဲကုမွဲ စုက်ဒၟံၚ်ဂှ်ရ ဒးဒုၚ်စွံလဝ်ပွန်ရ။ ပိုယ်တံ ပလံၚ်လဝ်ကွးဘာတံ ရုၚ်ဂဥုဲတုဲ လၟုဟ်ဂှ် ပြေပြံၚ်အာအိုတ်ယျ” သာ်ဝွံ ဟီုဂးလဝ်ကဵု ဌာန်ပရိုၚ်အေပဳရ။

ညးမရပ်လဝ်ဇုက်လက္ကရဴ ပရေၚ်ပရောဒးဂျိဏံဂှ် လ္ဂောံကဵုပရေၚ်ပူဂဵု ဒဒှ်ရအာဃာတပၞတ်လဝ်စိုတ်နွံဂှ် သၞာဲဒဴပရေၚ်ပညာတံ ဟီုပ္တိတ်လဝ်ကီုလေဝ် ဗွဲလစှ်ေ ဂှ် ဟီုပ္တိတ်လဝ်ဟွံမွဲရ။

မေဿတာရာမ္မနဳဂှ် အာယုက်အပိုၚ်အခြာ သၟတ်ဗြဴဒးအာဂျိတံဂှ် ဟွံထ္မံက်ထ္ၜးလဝ်တုဲ ညးတံဝွံ ဒှ်နူကဵု ၁ တန် စဵုကဵု ၆ တန်ဂှ် ဟီုဂးလဝ်ရ။ သ္အာၚ်နူဂှ်ပၠန် ဗီုလဵုဒးဒုၚ်စုတ်လဝ်ဂျိရောဂှ်ကဵု အကာဲအရာယဲဂှ်လေဝ် ဟီုပ္တိတ်လဝ်ဟွံမွဲရ။

ပ္ဍဲဍုၚ်အဳရာန် မဒှ်ဍုၚ်ဇိုၚ်ဝုတ်ဒိုဟ်ဂှ်လေဝ် စနူဂိတုနဝ်ဝေမ်ဗာတုဲကၠုၚ်တေံတုဲ ပရေၚ်ပရူဒးဂျိ ပ္ဍဲကဵုဘာသၟတ်ဗြဴတံဂှ် က္တဵုဒှ်ချဳဇတဝ်အာလဝ် နကဵုအသိၚ်အလိုန်သ္ကာတ်တ်ရ။

Ref: Skynews

Leave a Reply

Your email address will not be published. Required fields are marked *