သၟာဒယှ်ေဒွက် လဳလဳနိုၚ်ဂျဝ် ထံက်ဒၟံၚ်ဂလာန်ကံၚ်ဇြဳပၞာန်ဂှ် ဒးချိုတ်အာဍာံဍာံယျ

လဂုၚ်- ဂျောန်(၇)

ရးဒေသလဂုၚ်၊ ပ္ဍဲပွိုၚ်ဍုၚ်ယာန်ကေန် သၟာဒယှ်ေဒွက်ထံက်ဂလာန်ကံၚ်ဇြဳပၞာန် လဳလဳနိုၚ်ဂျဝ် ဒးဒုၚ်ပန်လဝ်တုဲ ပ္ဍဲဂိတုဂျောန် စၟတ်တ္ၚဲ (၅) အခိၚ်နူဂယးၜိုတ် (၅)နာဍဳ ဒးချိုတ်အာလဝ်ရဂှ် ဓမံက်ထ္ၜးလဝ် ပ္ဍဲမဳဒဳယာတြးဝါဒကံၚ်ဇြဳပၞာန်ရ။

ပ္ဍဲဂိတုမေ တုဲကၠုၚ် စၟတ်တ္ၚဲ (၃၀) ဂှ် ကြဴနူဒးဒုၚ်ပန်လဝ် ပ္ဍဲဂတမုက်သ္ၚိညးတုဲ ပလံၚ်ဗစိုပ်ဏာလဝ် သၟာဒယှ်ေဒွက်လဳလဳနိုၚ်ဂျဝ် ညးထံက်ဂလာန်ဒပ်ပၞာန် ပ္ဍဲရုၚ်ဂဥုဲဒပ်ပၞာန် နဒဒှ်ကာတၟေၚ်ရ။

“ကဵုထောံသမ္တီ သီုညးဖအိုတ်ညိ။ လဳလဳနိုၚ်ဂျဝ် ပြဟ်လလုဲအာယျ၊ တ္ၚဲဏံ အခိၚ်နူဂယး ၅ နာဍဳပြၚ်တုဲ ပြဟ်လလုဲအာလဝ်ရ” ဂှ် ယှိုဲတာန်ဇြေန် ဥူဝေန်မဝ် ဟီုလဝ်ကဵု မဳဒဳယာတြးဝါဒကံၚ်ဇြဳပၞာန်ရ။

ညးမၞုံယၟုကိုဝ်ဖျိုဝ်ပျိ မံၚ်ဒၟံၚ်ပ္ဍဲဗ္ဒမ် မၞုံလှေဝ်တာန် ပွိုၚ်ဍုၚ်ကၟာရတ် ဍုၚ်လဂုၚ်ဂှ် နကဵုတၚ်စောတ်စောဲ ပန်ဂစိုတ်လဝ် သၟာဒယှ်ေဒွက် လဳလဳနိုၚ်ဂျဝ် ရပ်ကေတ်လဝ် ပ္ဍဲတုဲကၠုၚ်မွဲၜါတ္ၚဲဏံရ။

သၟာဒယှ်ေဒွက် လဳလဳနိုၚ်ဂျဝ်ဂှ် သဝ်ဝန်ဇၞော်ရုၚ်ဂဥုဲဒပ်ပၞာန် ပ္တိတ်ဇြဟတ်လွဳလွတ်ကဵုလဝ်တုဲဂှ် တ္ၚဲဏံ အခိၚ်နူဂယးဂှ် ဒးချိုတ်အာလဝ်ရဂှ် ချူတြးလဝ် ပ္ဍဲမဳဒဳယာတြးဝါဒ ကံၚ်ဇြဳပၞာန်ရ။

ပ္ဍဲကဵုဂိတုတုဲကၠုၚ်တေံ ဥူတေန်လွေန် ညးချဳဒရာၚ်ကတိုက်ကၟဟ်ပရေၚ်ကောန်ဂကူကဵု သၟာဒယှ်ေဒွက် လဳလဳနိုၚ်ဂျဝ်တအ် ဒးဒုၚ်ပန်ဂစိုတ်လဝ်တုဲဂှ် သွက်ဂွံဗ္ဂပ်ကဵုလွဟ်လက်နက် ညးလုပ်ဂကောံ မ.ဘ.သ တအ်ဟီုလဝ်ကဵု ကံၚ်ဇြဳပၞာန်ကီု က္ဍိုပ်သ္ကိုပ်ပၞာန် စဵုဒၞာကဵုလဝ်ဟွံမာန်ဂှ်လေဝ် ပရေၚ်ဟီုဂးပါ်ပါဲ နွံကၠုၚ်ရ။

ပရိုၚ်-သြၚ်လောန်တိုၚ်(မ်)

ဗီုရုပ် – Lily Naing Kyaw (Facebook)

Leave a Reply

Your email address will not be published. Required fields are marked *