တယျေတ်ချောၚ်၊ ဂျောန်(၇)
ရးဒေသဇၞော်တၞၚ်သြဳ၊ ပွိုၚ်ဍုၚ်တယျေတ်ချောၚ်၊ ပ္ဍဲကဵုကွာန်ဥတ္တူကဵု ကွာန်ကျောက်လှေကာဂှ် ဒပ်ကံၚ်ဇြဳပၞာန် ထ္ပက်လုပ်ပၞာန်တုဲ ဒၟာနူစံၚ်ပလီုဒၟံၚ် သ္ၚိဌာန်ညးဍုၚ်ကွာန်တအ်ဂှ်ရ ညးဍုၚ်ကွာန် ၁၀၀၀ ပြၚ် ဒးဂြိပ်ဒဴပါဲဓလေတ်ဒၟံၚ်ရဂှ် ညးဒေသတအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ကရောၚ်ပၞာန် ဇြဟတ်မၞုံ ၁၅၀ ပြၚ် ၜါကရောၚ်ပၞာန်ဂှ် ပ္ဍဲဂိတုဂျောန် စၟတ်တ္ၚဲ (၆) သ္ပတံနူအခိၚ်နူဂယးတုဲ ပန်ဖျေံလွဟ်ဇၞော် ပ္ဍဲကွာန်ဥူတ္တူကဵု ကွာန်ကျောက်လှေကာတုဲ ထ္ပက်လုပ်ကၠုၚ်လဝ်ကရောၚ်ပၞာန်ရ။
ကရောၚ်ပၞာန်ကံၚ်ဇြဳ ပန်ဖျေံလွဟ်ဇၞော်တုဲ လုပ်ကၠုၚ်လဝ်ဂှ် စံၚ်ပလီုကွာန်ဥတ္တူတုဲ ပြဟ်ဟ်ဏံ သ္ၚိဒၟံၚ် (၂)မ တူပၟတ်ဒးလီုလာ်လဝ်ကီု ပ္ဍဲကွာန်ကျောက်လှေကာဂှ်မ္ဂး ဟိုတ်နူလွဟ်ဇၞော်တုဲ သ္ၚိဒၟံၚ်လ္ၚဵုဂှ် ပရေၚ်ဒးဇီုကပိုက်လီုလာ်လဝ် နွံကၠုၚ်ရ။

ဟိုတ်နူကရောၚ်ပၞာန် ဒပ်ကံၚ်ဇြဳပၞာန် လုပ်စိုပ်ကၠုၚ်တုဲ ညးဒေသ နူကွာန်ဥတ္တူကဵု ကွာန်ကျောက်လှေ ကာ ၁၀၀၀ ပြၚ်တအ် ဒးဂြိပ်ဒဴပါဲဓလေတ်ဒၟံၚ် ပ္ဍဲဒၞာဲဗၠးဘဲ ကေုာံပ္ဍဲကၠအ် မကြပ်ညောန်တအ်ရဂှ် ဂွံတီကေတ်ရ။
အခိၚ်လၟုဟ်ဏံမ္ဂး ကရောၚ်ပၞာန်ကံၚ်ဇြဳဂှ် ဆက်ဖျေံလဝ်ဗဒိုပ် ပ္ဍဲကွာန်တအ်တုဲ ကၠောန်သ္ပဒၟံၚ် ပရေၚ် ပန်ဖျေံလွဟ်ဇၞော် ပ္ဍဲကွာန်ဇိုၚ်ၚ်ကရပ်ဏံ နွံဒၟံၚ်ရ။
ဟိုတ်နူကရောၚ်ပၞာန်ကံၚ်ဇြဳပၞာန် ထ္ပက်လဝ်ပၞာန်ဂှ်တုဲ စဵုကဵုအခိၚ်လၟုဟ်ဏံ ၜိုန်ရပေါဲဗတိုက်ၜါလ္ပာ် ဟွံဂွံက္တဵုဒှ်လဝ်ဏီလေဝ် အကာဲအရာပရေၚ်ပၞာန် ကြံၚ်မ္ၚိုဟ်ဒၟံၚ်ရဂှ် ဂကောံဇြဟတ်ပၠန်ဂတးတအ် ဟီုသ္ဂးလဝ်ရ။
ပ္ဍဲဂိတုဨဗြဴ စၟတ်တ္ၚဲ (၁၁)တုဲကၠုၚ်တေံလေဝ် ဒၟာနူဒပ်ကံၚ်ဇြဳပၞာန် ထ္ပက်လုပ်ကၠုၚ်ပၞာန် ပ္ဍဲပွိုၚ်တိုၚ်တောၚ် ပျောက် ပွိုၚ်ဍုၚ်တယျေက်ချောၚ်တုဲ ညးဒေသနူကွာန် ၇ ကွာန် ဒးဂြိပ်ဒဴပါဲဓလေတ်လဝ်ဒၟံၚ် ဗွဲမဂၠိုၚ် တအ်ဂှ် စဵုကဵုအခိၚ်လၟုဟ် ဟွံဂွံကလေၚ်စဴ ဌာန်ဒၟံၚ်ဏီရဂှ် ဂွံတီကေတ်ရ။
ပရိုၚ်-သြၚ်လောန်တိုၚ်(မ်)
ဗီုရုပ် – CJ

