ကအ်ကြိက်၊ ဂျောန်(၇)
နူဒပ်ကံၚ်ဇြဳပၞာန် ကၠုၚ်ဂြာတ်ထောံဖျေံဗုံ ပ္ဍဲကွာန်သာန်ဖလာ ဂကောံကွာန်ခုဒုံ ပွိုၚ်ဍုၚ်ကအ်ကြိက် တိဍာ်ဒပ်မဟာ(၆) ဗော်သွးကောန်ဂကူကရေၚ် KNU နကဵုက္ၜၚ်ကျာရဂှ် ဌာနလလောၚ်ပရိုၚ် ခရိုၚ်ဒူပလာယာ လလောၚ်တြးလဝ် ပရိုၚ်ရ။
ပ္ဍဲကွာန်သာန်ဖလာ တိဍာ်အုပ်ဓုပ်ကဝ်ဒူလေဝ်ဂှ် ဂိတုဂျောန် စၟတ်တ္ၚဲ (၆) အခိၚ်နူဂယး ၜိုတ် (၂) နာဍဳ နူကဵုဒပ်ပၞာန်ကျာနေပျဳဒဝ် ကၠုၚ်ဂြာတ်ထောန်ဖျေံလဝ်ဗုံ ကလေတ်သတာ ကဵုက္ၜၚ်ကျာရဂှ် ဓမံက်လဝ် ပ္ဍဲတၚ်လလောၚ်တြးရ။

ဟိုတ်နူကံၚ်ဇြဳပၞာန် ဂြာတ်ထောံဖျေံလဝ်ဗုံတုဲ ပ္ဍဲအရှာမ်ဘာဗ္တောန်လိက်တန်မူလ ကွာန်သာန်ဖလာဂှ် ဗုံဒတုံစှ်ေပါ်ခတိုဟ်လဝ် (၂)မတုဲ ပၞော်ဗ္တၚ်ဘာ၊ ပါၚ်တြၚ်၊ ကၟဳ၊ ဗ္ဒၚ်၊ ဖ္ဍာန်၊ ဂတဵုတၟံ၊ ဒယိုၚ်ဘာ၊ ဍာ်နုၚ်သွုၚ် ကေုာံ စက်စာန်(ပန်ကာ) ဗ္ဂပ်စုတ်လဝ် ပ္ဍဲဘာတအ်ဂှ်တအ် ဇီုကပိုက်ဒးလီုလာ်လဝ်ရဂှ် လလောၚ်တြးလဝ်ရ။
သ္အာၚ်နူဂှ်ပၠန် ပ္ဍဲသၠာတ်ဝါ မၞုံလကြဴဘာဗ္တောန်လိက်ဂှ် ဗုံ (၁၀)မ ဒတုံစှ်ေပါ်ခတိုဟ်လဝ်တုဲ ပ္ဍဲအကြာကၠအ်တဵုလဝ်လေဝ် ဟိုတ်နူဗုံဒတုံစှ်ေ ခတိုဟ်လဝ်ဂှ်ရ သ္ၚိဒၟံၚ်ကောန်ကွာန်ညးဒေသ(၄)မ ကေုာံ တၞံသတ်ဆုတဵုလွဳပ္ဍဲကၠအ်လ္ၚဵုဂှ် ဇီုကပိုက်ဒးကဝေက်ဗုံ ဒးလီုလာ်လဝ်ရဂှ် ဓမံက်ထ္ၜးလဝ်ရ။

ဒပ်ကံၚ်ဇြဳပၞာန်ဂှ် သီုပေါဲဗတိုက်ဟၟဲမွဲသာ် ပ္တဝ်လဝ်ကဵုကောန်အရာပ်ညးဍုၚ်ကွာန်တုဲ ပန်ဖျေံလဝ် သီုတၚ်ရန်တၟံနွံနွံတုဲ ဂြာတ်ထောံဖျေံဗုံ ပ္ဍဲကွာန်သာန်ဖလာ ပွိုၚ်ဍုၚ်ကအ်ကြိက်ဂှ် ၜိုန်ရညးဒေသတအ် ဟွံဇီုကပိုက်ဒးလဝ်ကီုလေဝ် ဒၟာနူဘာဗ္တောန်လိက် ဇီုကပိုက် လီုလာ်အာလဝ်ဂှ်ရ ကောန်ကွးဘာတအ် ဟွံဂံၚ်ဆက်တိုန်ဘာတုဲ ဒးကၟာတ်လဝ်ဘာရဂှ် ညးဒေသမွဲတၠ ဟီုသ္ဂးလဝ်ရ။
ပ္ဍဲပွိုၚ်ဍုၚ်ကအ်ကြိက်ဂှ် ဒပ်ကံၚ်ဇြဳပၞာန် ၜံက်ခရိုဟ်ပလီုပလာ်လဝ် ဂၠံၚ်ဍာန် ညးဍုၚ်ကွာန်ကောန် ဒေသတအ် သုၚ်စောဲအာကၠုၚ်ဒၟံၚ်ဂှ် ညံၚ်အာကၠုၚ်ဟွံဂွံ ၜံက်ခရိုဟ် ပလီုပလာ်လဝ် နကဵုစက်ယန္တရာကီု ပန်ဖျေံဒၟံၚ်လွဟ်ဇၞော် ပ္ဍဲကွာန်ကြာန်ကြာန်ကီု သီုကဵုဂြာတ်ထောံဖျေံဒၟံၚ်ဗုံ ထံက်ဒၟံၚ်ပရိုၚ် ခြာဟွံလအ်ဟွံလအ် ကၠောန်သ္ပဒၟံၚ်ရ။
ပရိုၚ်-သြၚ်လောန်တိုၚ်(မ်)
ဗီုရုပ်- KNU

