ပ္ဍဲပွိုၚ်ဍုၚ်ရေဝ် ကေုာံ ပွိုၚ်ဍုၚ်သဓီုဂှ် ကောန်အရာပ်(၂)တၠ ဒးမာၚ်တုဲ က္လိဂွံဝပ်

ရေဝ်၊ ဂျောန်(၇)

တွဵုရးဍုၚ်မန်၊ ပ္ဍဲပွိုၚ်ဍုၚ်ရေဝ်ကေုာံ ပွိုၚ်ဍုၚ်သဓီုတံ ဟိုတ်နူမာၚ် ကေုာံ မာၚ်တိုပ်တိ ဗ္တိုဟ်ထ္ကးတုဲ ကောန်အရာပ်(၂)တၠ ဇီုကပိုက်က္လိဂွံလဝ်ဝပ်ရောၚ် ညးဒေသတံ ကေုာံ ဂကောံရီုဗၚ်ပရေၚ်မၞိဟ်တံ ဟီုကဵုဌာန်ပရိုၚ်သြၚ်လောန်တိုၚ်မ်ရ။

ဂိတုဂျောန်၊ စၟတ်တ္ၚဲ(၆) အခိၚ်နူဂယး (၁၁) နာဍဳဂှ် ပ္ဍဲပွိုၚ်ဍုၚ်သဓီု၊ ဂကောံကွာန်ကမာဇြိုၚ်၊ ကွာန်ကဠိ ကျောန် လ္တူဂၠံၚ်ကွဳစက် လဂုၚ်-မတ်မလီုဂှ် ညးဒေသ(၂)တၠ အဃောဍိုက်ကၠုၚ် ကွဳလိုန်ဓာတ်ဂှ် ဒးဒုၚ်တံၚ်ခတိုဟ်လဝ်မာၚ်ရ။

ပ္ဍဲပွိုၚ်ဍုၚ်ရေဝ် ကေုာံ ပွိုၚ်ဍုၚ်သဓီုဂှ် ကောန်အရာပ်(၂)တၠ ဒးမာၚ်တုဲ က္လိဂွံဝပ်
ပ္ဍဲပွိုၚ်ဍုၚ်ရေဝ် ကေုာံ ပွိုၚ်ဍုၚ်သဓီုဂှ် ကောန်အရာပ်(၂)တၠ ဒးမာၚ်တုဲ က္လိဂွံဝပ်

ဟိုတ်နူဒးဒုၚ်တံၚ်ခတိုဟ်မာၚ်တုဲ ဥူခိုၚ်ထောန် ဒၟံၚ်ကွာန်ကဠိကျောန်ဂှ် ဟိုတ်နူဇီုကပိုက်ဒးလဝ် ကဝေက်မာၚ် ပ္ဍဲဗုၚ်တုဲ က္လိဂွံလဝ်ဝပ်ဂှ်ရ ပလံၚ်ဗစိုပ်ဏာလဝ် ရုၚ်ဂဥုဲပွိုၚ်တိုက်ဒုၚ်သုက်ရောၚ်ဂှ် ဂွံတီကေတ်ရ။

ပ္ဍဲဂိတုဂျောန် စၟတ်တ္ၚဲ(၅) အခိၚ်နူဂယး(၁၁)နာဍဳဂှ်လေဝ် ပွိုၚ်ဍုၚ်ရေဝ်၊ ဍုၚ်လၟိုၚ်၊ ကွာန်ဗဳကလုဲ ပ္ဍဲဗ္ဒါဲဒဒန် ဇုက်ဂှ် ညးဒေသရဲကၠအ်မွဲတၠ လိုန်ဒးလဝ်မာၚ်တိုပ်တိရ။

မာံဆာန်မန် အာယုက်(၂၄)သၞာံ ဒၟံၚ်ကွာန်တၟအ်ကၞေၚ်ဂှ်လေဝ် ဟိုတ်နူလိုန်ဒးမာၚ်တိုပ်တိတုဲ ကအ်ဇိုၚ် လ္ပာ်ပုၚ် ဒးဝပ်ပိုတ်အာတုဲ ပလံၚ်ဗစိုပ်ဏာလဝ် ရုၚ်ဂဥုဲမတ်မလီုရ။

ပ္ဍဲတွဵုရးဍုၚ်မန် တုဲကၠုၚ်ပ္ဍဲဂိတုမေဂှ် ဟိုတ်နူလၟေၚ်ဒဒှ် ဒးဒုၚ်တံၚ်ခတိုဟ်မာၚ်တုဲ ညးအာတရဴကေုာံ ညးဒေသ (၂)တၠ ဒးပြဟ်လလုဲလဝ်တုဲ ဟွံအောန်နူကဵု (၆)တၠ ကလိဂွံလဝ်ဝပ်ဂှ် ဂွံတီကေတ်ရ။

ပရိုၚ် – သြၚ်လောန်တိုၚ်မ်

ဗီု – ယှိုဲဟေန်တာ ဂကောံပရဟိတရီုဗၚ်ပရေၚ်မၞိဟ်

Leave a Reply

Your email address will not be published. Required fields are marked *