လ္ဂုၚ်၊ ဂျောန် (၇)
ကံၚ်ဇြဳပၞာန် မလလောၚ်တြး တ္ၚဲကၠောန်ဗဒှ်ပေါဲရုဲမာဲဟွံမာန်ဏီဂှ် ၜိုန်ရဖျေံကဵုဒၟံၚ်လိက် မပ္တိုန်လဝ် စရၚ်တံ ကုဗော်ပရေၚ်ဍုၚ်ကွာန်တံဂှ်ကီုလေဝ် ဗော်ပရေၚ်ဍုၚ်ကွာန်တံ လမျီုဟွံလုပ်ပုဟ်ဂှ် ညးခါတ် အကာဲပရေၚ်ဍုၚ်ကွာန်တံ ဟီုဂးလဝ်ရ။
ကမ္မယှေန်ပေါဲရုဲမာဲကၟိန်ဍုၚ် သၟဝ်တဲကံၚ်ဇြဳပၞာန်ဝွံ စနူဂိတုဨပရဴ (၂၀) တုဲ စဵုကဵုဂိတုဂျောန် သတ္တာဟ ပထမဏံ အပ္ဍဲပွိုၚ်မွဲဂိတုပြၚ်ဂှ် ကဵုလဝ်အခေါၚ်ပ္တိုန်စရၚ် ကုဗော်ပရေၚ်ဍုၚ်ကွာန် စဵုကဵု (၂၂) ဗော်ရ။
ပ္ဍဲကဵုဏံ ပ္ဍဲဂိတုဂျောန် (၅) တေံဂှ် ဖျေံကဵုလဝ်လိက်ပ္တိုန်စရၚ် ကုဗော်ပၠတရဴညးဍုၚ်ကွာန် နူကဵုသၟဝ် ပၠတရဴ ဒံက်တာတိတ်တ်ခိုၚ် မဒှ်ဝန်ဇၞော်လလောၚ်ပရိုၚ် ကေုာံ ရီုဗၚ်မှာဇန် ကံၚ်ဇြဳပၞာန် မခါန်ကၞက်လဝ် ဂှ်ကဵု ဗော်ဒဳမဝ်ကရေဇြဳ ကောန်ဍုၚ်အရၚ်ဓနုတံရ။
ဆ္ဂး ဗော်ပရေၚ်ဍုၚ်ကွာန်ဂမၠိုၚ်ဝွံ ပ္ဍဲလက်ထက်ကံၚ်ဇြဳပၞာန်ဏံဂှ် ဒှ်ဒၟံၚ်အကာဲအရာ အခေါၚ်သ္ဂောံပံၚ်တောဲပါလုပ်ရေၚ်တၠုၚ်၊ အခေါၚ်သ္ဂုတ်သွာတ် ကေုာံ အစောံစရာဲရေၚ်တၠုၚ်ချဳဒရာၚ် လ္ဂောံကဵုပရေၚ်ဍုၚ်ကွာန်တံ ဟွံမွဲရပုဟ်ဂှ် ညးခါတ်အကာဲပရေၚ်ဍုၚ်ကွာန်တံ ပါ်ပါဲလဝ်ရ။
ညးလ္ၚတ်သ္ၚဳဂၠိပ်ပရေၚ်ဍုၚ်ကွာန် ဥူတာန်သဵုနာၚ်ဂှ် နကဵုဗော်ပရေၚ်ဍုၚ်ကွာန်ဂမၠိုၚ် ၜိုန်ရကံၚ်ဇြဳပၞာန် ဖျေံလဝ်ကဵုလိက် မပ္တိုန်လဝ်စရၚ်တံဂှ်ကီုလေဝ် ဟိုတ်နူပဋိပက္ခပရေၚ်ပၞာန် မက္တဵုဒှ်ဒၟံၚ်လၟုဟ်တံဂှ်တုဲ ဗော်လဵုမွဲမှ စန်ဒက်ချဳဒရာၚ်ဟွံမာန်ပုဟ်ဂှ် ထံက်ထ္ၜးလဝ်ရ။

“နတဲဏံဂှ်တှ်ေ ရးသက်ကိုၚ်ဟီုတှ်ေ ယဝ်ရၜက်အာကျာ်(ကောင်းမှုတော်) မၞုံဍုၚ်သက်ကိုၚ်ဂှ်ဟီုမ္ဂး ညးလဵုမွဲမှ ဟွံဂံၚ်အာကၠုၚ်ရပုဟ်။ ပ္ဍဲကဵုရးဒေသ ကေုာံ ဒေသရေၚ်ဒဵုတၞဟ်ဟ်တံလေဝ် ဒှ်ဒၟံၚ်ပေါဲပၞာန် ကီုဂှ်ရ ညးလဵုမွဲမှ ချဳဒရာၚ်စန်ဒက်ဂှ် ဟွံမွဲပုဟ်။ ဟိုတ်ဂှ်ရ အခေါၚ်ဂှ်ရဂွံလဝ်တုဲ ဗော်ချဳဒရာၚ်မာန် နကဵုပရေၚ်ဍုၚ်ကွာန်တံဂှ် ဟွံမွဲပုဟ်။ ဗော်ကျခိုၚ်ယျေရဂှ် ချဳဒရာၚ်စန်ဒက် ဟွံမာန်ပုဟ်။ မွဲပၠန်ဂှ် ထိၚ်ဒက်လဝ်တိဍာ် ၜိုတ် (၆၀) တၟံကၠံဟွံမာန်မွဲသာ် ပ္ဍဲကဵုအကာဲအရာ ပဋိပက္ခပရေၚ်ပၞာန်သ္ကာတ် မြဟ်ဒၟံၚ်တံဂှ် တ္ၚဲလဵုကၠောန်ဗဒှ်ပေါဲရုဲမာဲဏောၚ်ဟီုဂှ်လေဝ် ကံၚ်ဇြဳပၞာန် လလောၚ်တြးဟွံမာန်ပုဟ်” သာ်ဝွံ ညးသ္ဂးရ။
မွဲလ္ပာ်ပၠန်ဂှ် ဗော်ပရေၚ်ဍုၚ်ကွာန်ဂမၠိုၚ်ဝွံ လ္ဂောံကဵုသၞောဝ်ဗော်ပရေၚ်ဍုၚ်ကွာန် ကံၚ်ဇြဳပၞာန်တံဂှ်မ္ဂး ယဝ်ရဗော်စန်ဒက်အာ ပ္ဍဲတွဵုရးမွဲမွဲ ဟွံသေၚ်မ္ဂး ရးဒေသမွဲမွဲရဟီုမ္ဂး ပပ္တံနူတ္ၚဲပ္တိုန်စရၚ်တုဲ အပ္ဍဲပွိုၚ် (၉၀) တ္ၚဲဂှ် အောန်အိုတ် ကောန်ဗော် (၁၀၀၀) ဒးနွံဏောၚ်တုဲ အပ္ဍဲ (၁၈၀) တ္ၚဲဂှ် ပ္ဍဲကဵုပွိုၚ်ဍုၚ် မၞုံပ္ဍဲတွဵုရး ကေုာံ ရးဒေသတံဂှ် သွက်ဂွံပံက်ရုၚ် အောန်အိုတ် ပ္ဍဲ (၅) ပွိုၚ်ဍုၚ်ဂှ် ဒးရုန်ဂ္စါန်ဒၟံၚ်ရ။
ဗော်ညဳသၟဟ်ယှာန်နဳ(တိုၚ်လျာန်) ဂှ် ၜိုန်ရလိက်ပ္တိုန်လဝ်စရၚ် နဒဒှ်ဗော်ပရေၚ်ဍုၚ်ကွာန်ဂှ် စှ်ေကၠုၚ် မွဲဂိတုယျကီုလေဝ် ဒဵုကဵုတ္ၚဲဏံ ပရေၚ်ချဳဒရာၚ်အပ္ဍဲဗော်တံဂှ် မုမှကၠောန်ဟွံမာန်ဏီပုဟ်ဂှ် ညးမဒှ်ဥက္ကဌ ဥူအံၚ်ခေန် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“ပြဟ်ဟ်ဏံ ပိုယ်တံ မုမှကၠောန်ဟွံမာန်ဏီပုဟ်။ ဒးကၠောန်ကောံဓရီုဗော်ကၠာဏောၚ်။ တၚ်ဝါတ်ဂါတ် ဂှ်တှ်ေ ပိုယ်တံ ဒးပ္တန်ရုၚ်ဗော် ပ္ဍဲကဵု (၅) ပွိုၚ်ဍုၚ်ဟီုမ္ဂး ပ္ဍဲကဵုဒၞါဲဂကူသေံတံနွံ ပ္ဍဲကဵုဗာန်မံက်ဂှ်လေဝ် တိဍာ်ဟွံၜိုဟ်သြိုဟ်ပုဟ်။ တမူဂှ်လေဝ် ဟွံၜိုဟ်သြိုဟ်ပုဟ်။ ဖံၚ်ပျေန် ဟွံၜိုဟ်သြိုဟ်ပုဟ်။ ဟုမ္မလေန်မွဲ၊ ခါန္တဳမွဲ ၜါဏံရ (ၜိုဟ်သြိုဟ်ညိ)” သာ်ဝွံ ညးသ္ဂးရ။
ဗော်ညဳသၟဟ်ယှာန်နဳဂှ်ဝွံ ဟိုတ်နူသၞောဝ်ဗော်ပရေၚ်ဍုၚ်ကွာန် ကံၚ်ဇြဳပၞာန် မစၞောန်ပျးလဝ်ဂှ်တုဲ ပ္တိုန်လဝ်စရၚ် နဒဒှ်ဗော်မစန်ဒက်အာ အပ္ဍဲရးသက်ကိုၚ် မဒှ်ရ။
ရးသက်ကိုၚ်ဝွံ ဟိုတ်နူဒှ်ဒေသ ဇြဟတ်ပၠန်ဂတးရပ်လွဟ် ကုကံၚ်ဇြဳပၞာန်ခိုဟ်မွဲဂှ်ရ ပရေၚ်ၜိုဟ်လလမ် တိဍာ် ဍိုက်က်ပေၚ်ၚ်ဟွံမွဲတုဲ ညံၚ်ဇြဟတ်ကောန်ဗော်ဂွံပေၚ်ဂှ်ကဵု သွက်ဂွံပံက်ရုၚ်မာန်ဂှ် ဗော်ပရေၚ် ဍုၚ်ကွာန်ဂမၠိုၚ် ဒးဂဗဒၟံၚ်တၚ်ဝါတ်ဂါတ် ကုပရေၚ်စန်ဒက်တံရ။
ဃောန်ထောန်ယှိုဲ မဒှ်ဖက်ဆောညးအုပ်ကာ− ၂ နူကဵုဗော်ဂအုပ်ကောန်ဂကူပအိုဝ် မဂွံလဝ်အခေါၚ် နဒဒှ်ဗော်စန်ဒက် အပ္ဍဲတွဵုရးသေံဂှ် ၜိုန်ရလိက်စှ်ေကၠုၚ်ကီုလေဝ် သွက်ဂွံဂွံဇြဟတ်ကောန်ဗော်ဂှ်ဟေၚ် စန်ဒက်ဒၟံၚ်တုဲ သှ်ေဂှ် ကၠောန်ဟွံမာန်ဏီပုဟ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ဗော်ပရေၚ်ဍုၚ်ကွာန်ပိုယ်တံဂှ် နွံသၟဝ် UEC တုဲ ၜိုတ်ဍေံတံကဵုအခေါၚ်ရ ပိုယ်တံ ဒးချဳဒရာၚ်ဒၟံၚ်။ ပြဟ်ဟ်ဏံ ညံၚ်ပိုယ်ယ်ဂွံဂွံကောန်ဗော်တံဂှ်ကီု၊ ညံၚ်ဇြဟတ်ဗော်ဂွံခိုဟ်ကၠုၚ်ဂှ်ကီု ၜိုတ်ဏံရ ပိုယ်တံ စန်ဒက်ကဵုဒၟံၚ်။ တၟေၚ်ၚ် တၞဟ်သ္အာၚ်ဂှ် ဟွံမွဲပုဟ်” သာ်ဝွံ ညးသ္ဂးရ။

အခိၚ်သီလဝ်အဝဵုကၟိန်ဍုၚ် နကဵုတၚ်စောတ်စောဲ မမာဲဗၠေတ် ပ္ဍဲပေါဲရုဲမာဲ သၞာံ ၂၀၂၀ တေံတုဲဂှ် ကၠောန်ဗဒှ်ကဵုပေါဲရုဲမာဲဏောၚ် ကံၚ်ဇြဳပၞာန် ဟီုဂးဒၟံၚ်ကီုလေဝ် အလုံမွဲကၟိန်ဍုၚ်ဂှ် ပေါဲဗ္တိုက်ပလှ်ဖျေံ သၞောတ်တၠအဝဵုပၞာန်တံ သာသ္ကာတ်မြဟ်ဒၟံၚ်ရ။
ဟိုတ်ဂှ်ရ ပ္ဍဲကဵုသၟဝ်ပရေၚ်ဒပ်ပၞာန်သီအဝဵု သ္ကိုပ်ပၞာန်ဇၞော် မေန်အံၚ်လှာၚ် မသ္ကိုပ်သ္ကဂှ် ပေါဲရုဲမာဲဂှ် ဒှ်ကၠုၚ်ဟွံသေၚ်တုဲ သွက်ကံၚ်ဇြဳပၞာန် ဂွံဆက်ကေတ်အဝဵုရဟေၚ် ဒှ်မာန်ဂှ် ညးခါတ်အကာဲ ပရေၚ်ဍုၚ်ကွာန်တံ သ္ၚဳဂၠိပ်လဝ်အိုတ်ရ။
သွက်ပေါဲရုဲမာဲ သၞောတ်ဒဳမဝ်ကရေဇြဳဗော်ဇဳ ကံၚ်ဇြဳပၞာန် မကၠောန်ဗဒှ်ကဵုဂှ် ပ္ဍဲကၞောတ်ဂိတုဂျာန္နဝါရဳတေံ စၞောန်ပျးလဝ်သၞောဝ်တၟိ စပ်ကဵုပရေၚ်ပ္တိုန်စရၚ်ဗော်ပရေၚ်ဍုၚ်ကွာန်တံဂှ်တုဲ အပ္ဍဲပွိုၚ် (၆၀) တ္ၚဲ သွက်ဂွံအာတ်ပ္တိုန် အခေါၚ်ပ္တိုန်စရၚ် ကေုာံ အခေါၚ်ဒက်ပ္တန်ဗော်တံဂှ် လလောၚ်ပ္တိတ်လဝ်ရ။
အပ္ဍဲတ္ၚဲမစၟတ်လဝ် (၆၀) တ္ၚဲဂှ် ဗော်ပရေၚ်ဍုၚ်ကွာန် မအာတ်ပ္တိုန်လဝ် အခေါၚ်ပ္တိုန်စရၚ် ကေုာံ အခေါၚ်ဒက်ပ္တန်ဗော်တံဂှ် (၆၃) ဗော်နွံလဝ်တုဲ ဗော်ပရေၚ်ဍုၚ်ကွာန် (၄၀) ဗော် မဟွံကၠုၚ်စိုပ်ပ္တိုန်လဝ် စရၚ်တံဂှ် နူကဵုနဒဒှ်ဗော်ဂှ် လီုအာအလဵုလဵုဍေံရောၚ် လလောၚ်တြးလဝ်ရ။
ပရိုၚ်−သြၚ်လောန်တိုၚ်(မ်)
ဗီုဓာတ်−CJ

