ဗေကျေန်၊ ဂျောန် (၇)
ပ္ဍဲကဵုဍုၚ်ကြုက် ဟိုတ်နူဖအောန်ဖျေံလဝ် ခရိတ်အရပ်စပ်ပရေၚ်ပညာကီု သီုကဵုအလဵုအသဳဒေသန္တရတံ ပတေၚ်ဂြတ်ကၠုၚ် ပရေၚ်ဘဏ္ဍာတံကီုဂှ်တုဲ သၠုၚ်ပ္တိုန်လဝ် ၚုဟ်ဘာ တက္ကသိုလ်ကြုက်တံရ။
သၠုၚ်ပ္တိုန်ကၠုၚ်သာ်ဏံဂှ်ဝွံ အပ္ဍဲပွိုၚ်ၜါစှော်သၞာံဂှ် သၠုၚ်ပ္တိုန်လဝ် နဒဒှ်အလန်ကိုပ်ကၠာအိုတ်ရောၚ်ဂှ်လေဝ် ဂွံတီကေတ်ရ။
ကြဴနူစၞောန်ပျးမူဝါဒကဝ်ဝေဒ် မတေၚ်ဂြတ် ပိသၞာံတုဲဂှ် ပ္ဍဲကဵုအလဵုအသဳဒေသတံဂှ် အကြေပ်အဂြတ် ပရေၚ်ဘဏ္ဍာ က္တဵုဒှ်ကၠုၚ်ဂှ်ကီု၊ ကျာတ်ဝါတ်စှ်ေကၠုၚ်ဂှ်ကီု ကေုာံ ပရေၚ်ပိုန်ဒြပ် မလဇုဲလဇကၠုၚ်မံၚ်တံ ပ္ဍဲကဵုအကာဲအရာသာ်ဏံတံဂှ် မ္ဒးသၠုၚ်ပ္တိုန်လဝ်ၚုဟ်ဘာတုဲ ပ္ဍဲကဵုတက္ကသိုလ်ဗွဲမဂၠိုၚ်၊ ပ္ဍဲကဵုဒၞါဲဗ္တောန်ပညာ စပ်ကဵုညးဂမၠိုၚ် မၞုံပ္ဍဲဍုၚ်ကြုက်တံဂှ်ဝွံ ဒးဗ္ဒဗ္ဒါဲဒၟံၚ် လ္တူဘဏ္ဍာကၟိန်ဍုၚ် ဗွဲမဇၞော်ကဵုဇြဟတ်ဂှ်လေဝ် ဂွံတီကေတ်ရ။

ပ္ဍဲကဵုညးမတိုန်ဒၟံၚ်ဘာသၞာံဏံ ပ္ဍဲတက္ကသိုလ်သ္ကုတ်ဗၟံက် ဍုၚ်ကြုက် စပ်ကဵုနဲကွတ်ပညာ ကေုာံ သိပ္ပံ မဖျေံသ္ဇိုၚ်ယှာန်ဟိုၚ်ဂှ် ဘာသာသိပ္ပံတံဂှ် သၠုၚ်ပ္တိုန်အာ အမေရိကာန်ဒဝ်ဠာ (၁၀၈၂)၊ စဵုကဵု (၅၄) တၟံကၠံတုဲ ဘာသာဝိဇ္ဇာတံဂှ် သၠုၚ်ပ္တိုန်အာ စဵုကဵု (၃၀) တၟံကၠံရောၚ် လလောၚ်ပ္တိတ်လဝ်ရ။
ကြဴနူကၠောန်သ္ပဟီုတွံ ကုညးဍုၚ်ကွာန်တံ သွက်ဂွံသၠုၚ်ပ္တိုန် ခရိတ်ကျူယှေန်ဘာ မဟွံပြံၚ်လှာဲလဝ် လလအ်ပွိုၚ် (၂၀) သၞာံဂှ်တုဲဂှ် ဂကောံပရေၚ်ဘဏ္ဍာ ယှာန်ဟိုၚ်ဝွံ သွက်သ္ဂောံသၠုၚ်ပ္တိုန်ၚုဟ် သွက်သၞာံဗ္တောန်ပညာ စနူသၞာံဏံဂှ် သ္ဂုတ်သွာတ်လဝ်ရ။

ခရိတ်အရပ်စပ် ဌာနဝန်ဇၞော်ပရေၚ်ပညာ မချိၚ်ခယျလဝ်ဂှ်ဝွံ ပ္ဍဲသၞာံ ၂၀၂၃ ဏံဂှ် ယဝ်ရၜတ်ကဵုသၞာံ တုဲတေံမ္ဂး ဒဒှ်ရစှ်ေအာ (၃ ဒဿမ ၇) တၟံကၠံ၊ (၁၀၂ ဒဿမ ၆) ဗဳလျာန်ယောန်ဂှ် ဂွံတီကေတ် အတိုၚ်လိက်ဒုၚ်စဳရေၚ်ဗာတ်ဂျက် ဌာနဝန်ဇၞော်ဂှ်ရ။
ဂကောံသုတေသန ပါလုပ်သီုကဵုတၠပညာကဆံၚ်လ္တူ စပ်ကဵုသွာၚ်ပရေၚ်ပညာကြုက်တံဂှ်လေဝ် နကဵုကွးဘာဍုၚ်သ္အာၚ် မကၠုၚ်စိုပ်ကတ်လ္ၚတ်ဒၟံၚ် ပ္ဍဲကဵုတက္ကသိုလ်ဂမၠိုၚ် သွက်ဂွံသၠုၚ်ပ္တိုန် ကဵုၚုဟ် ဘာဂှ်လေဝ် အာတ်မိက်လဝ်ရ။
ပ္ဍဲကဵုတၚ်မလ္ၚတ်ဂွံလဝ် ပ္ဍဲသုတေသနဏံဂှ်လေဝ် သွက်ဂွံသၠုၚ်ပ္တိုန် ခရိတ်ဘာ ကွးဘာဍုၚ်သ္အာၚ်တံ နူကဵုသြန်ယောန် (၁၁၀၀၀) စဵုကဵုၜါဠက်ဂှ် ကဵုလဝ်ကသပ်ရ။
Ref: CNA

