ကအ်ကြိက်၊ ဂျောန်(၈)
တွဵုရးကရေၚ် ပွိုၚ်ဍုၚ်ကအ်ကြိက် ပ္ဍဲကွာန်ယွာတာန်ယှေဂှ် ဟိုတ်နူဒပ်ကံၚ်ဇြဳပၞာန် ပန်ဖျေံလဝ်လွဟ် ဇၞော်တုဲ ကောန်ၚာ်သၟတ်ဒေသ (၁)တၠ ဒးချိုတ်လဝ်တုဲ ဒးလဝ်ဘဲဝပ် (၂)တၠရဂှ် ဌာနလလောၚ်ပရိုၚ် ခရိုၚ်ဒူပလာယာ KNU လလောၚ်တြးလဝ်ရ။
ဂိတုဂျောန် စၟတ်တ္ၚဲ (၇)အခိၚ်နူဂယး (၉)နာဍဳဂှ် နူကဵုဒပ်အမၠံက် ကံၚ်ဇြဳပၞာန် လှိုၚ်ဝ ဖျေံသ္ဇိုၚ်ဍုၚ် ကအ်ကြိက်ဂှ် ပန်ဖျေံလဝ်လွဟ်ဇၞော် ပ္ဍဲကွာန်ယွာတာန်ယှေ (၂)မ သီုတၚ်ရန်တၟံနွံနွံရဂှ် ဓမံက်ထ္ၜးလဝ် ပ္ဍဲတၚ်လလောၚ်တြးဂှ်ရ။

ဟိုတ်နူဒပ်ကံၚ်ဇြဳပၞာန် ပန်ဖျေံလဝ်လွဟ်ဇၞော် သီုတၚ်ရန်တၟံနွံနွံတုဲ ဒဝ်တပိ အာယုက်(၄၃) ဒၟံၚ်ကွာန်ယွာ တာန်ယှေ ကေုာံ ကောန်ဝုတ်ညး နာန်ရေဝတဳ အာယုက် (၄)သၞာံတအ် ဇီုကပိုက်ဒးလဝ်ဘဲဝပ်တုဲ ညးမဒှ်ကောန်ဗၠာဲ သဝ်ကျဝ်တာန်အောၚ် အာယုက် (၁၂) သၞာံဂှ် ဇီုကပိုက်ဒးလဝ် ကဝေက်မကမ် လွဟ်ဇၞော်တုဲ ဒးချိုတ်လဝ်ရဂှ် ဓမံက်လဝ် ပ္ဍဲတၚ်လလောၚ်တြးရ။
ပ္ဍဲတိဍာ်ဒပ်မဟာ (၆) KNU ပွိုၚ်ဍုၚ်ကအ်ကြိက်ဂှ် ဒပ်ကံၚ်ဇြဳပၞာန် ပန်ဖျေံဒၟံၚ်လွဟ်ဇၞော် သီုတၚ်ရန်တၟံ နွံနွံကီု၊ ဂြာတ်ထောံဖျေံဗုံ ကဵုက္ၜၚ်ကျာကီု၊ သီုကဵုထံၚ်ဒၟံၚ်ပရိုၚ်ကဵုက္ၜၚ်ကျာ ကၠောန်သ္ပဒၟံၚ် ခြာဟွံလအ်ဟွံ လအ်တုဲ ဒၟာနူကၠောန်သ္ပကၠုၚ်ဗီုလၟုဟ်ဏံတုဲ လမျီုကောန်အရာပ်ညးဍုၚ်ကွာန်တအ် ဒးဆောံလေၚ် ဒးလဝ်ဘဲဝပ်တုဲ စမြိုၚ်ဗွဲမဂၠိုၚ်လေဝ် ဇီုကပိုက် ဒးလီုလာ်လဝ်ရ။

ပ္ဍဲဂိတုဂျောန် တုဲကၠုၚ် စၟတ်တ္ၚဲ (၆)တေံလေဝ် သီုပေါဲဗတိုက်ဟၟဲမွဲသာ် ဒပ်ကံၚ်ဇြဳပၞာန် ဗတိုက်လဝ် ပ္ဍဲကွာန်သာန်ဖလာ ပွိုၚ်ဍုၚ်ကအ်ကြိက် တိဍာ်ဒပ်မဟာ (၆) ကဵုက္ၜၚ်ကျာတုဲ ဘာဗ္တောန်လိက် (၁)ဘာ ကေုာံ သ္ၚိဒၟံၚ်(၄)မကီု သီုကဵုတၞံသတ်ဆု တဵုလွဳပ္ဍဲသ္ၚိလ္ၚဵုဂှ် ဇီုကပိုက်ဒးလီုလာ်လဝ် နွံကၠုၚ်ရ။
ပ္ဍဲဂိတုမေတုဲကၠုၚ်တေံလေဝ် ဒပ်ကံၚ်ဇြဳပၞာန် ကၠောန်သ္ပလဝ် ပရေၚ်ပလီုပလာ် ဂၠံၚ်ဍာန်ဆက်စၠောံ လဝ်ကဵု ဍုၚ်ကအ်ကြိက် မလလောၚ်တြးလဝ် ပရေၚ်အုပ်ဓုပ်ပၞာန်ဂှ် နကဵုစက်ယန္တရာကီု နူကဵုလ္တူဍုၚ် မွဲကဆံၚ် ပန်ဖျေံဒၟံၚ်လွဟ်ဇၞော် ပ္ဍဲလ္ပာ်ကွာန် နွံဇိုၚ်ၚ်ကရပ်ဍုၚ် ကြပ်ဒှ်အရိုဟ်ဒဒှ်တ္ၚဲရဂှ် ဂွံတီကေတ်နူ ညးဒေသတအ်ရ။
ပရိုၚ်-သြၚ်လောန်တိုၚ်(မ်)
ဗီုရုပ်-KNU

