မတ်မလီု – ဂျောန်(၈)
ဟိုတ်နူကသဳတိ သ္ပဗဟဵုကဵု ပွိုၚ်ဍုၚ်ညောၚ်တုံ၊ ရးဨရာဝတဳ ချဳကသဳလဝ်ဂှ် ခၟောံဗိုတ်ကျာ်ယှိုဲဖုန်မျေတ် ဒတုံစှ်ေလဝ်တုဲ ဟိုတ်နူသၠဖ္ဍာန် တိုက်ဓဝ်မိုဝ်ကုပ် မၞုံသ္ကဲကျာ်ဂှ် ခရိုဟ်စှ်ေလဝ်တုဲ သဳလမွဲဇကုကဵု ညးဗြဴမွဲတၠ ဒးချိုတ်လဝ်ရဂှ် ညးဒေသတအ် ဟီုသ္ဂးလဝ်ရ။
ပ္ဍဲခရာလ္ပာ်ဒိုဟ်အဂၞဲ သၠုၚ်ကျာဍုၚ်ညံၚ်တုံ (၅)မာၚ်ဂှ် သ္ပဗဟဵုကဵုဒမျိုဟ် (၁၀) ကဳလောမဳတာတုဲ ဇြဟတ် ရေစ်(ခ်)တာစကေ မၞုံကဆံၚ် (၄.၈) ကသဳတိ မၞုံဇြဟတ်ညိည ချဳကသဳလဝ်ရဂှ် ဌာနစမ်ၜတ် အကာဲ အရာဗြဲကျာ သၟဝ်တဲကံၚ်ဇြဳပၞာန် လလောၚ်တြးလဝ်ပရိုၚ်ရ။

“ပြဟ်ဟ်ဏံ ခၟောံဗိုတ်ကျာ်ယှိုဲဖုန်မျေတ် ဒတုံစှ်ေလဝ်ရ။ ဒၟာနူသၠဖ္ဍာန်တိုက်ဓဝ်မိုဝ်ကုပ် ခရိုဟ်စှ်ေ လဝ်တုဲ သဳလမွဲဇကုကဵု ညးဗြဴမွဲတၠ ဒးချိုတ်လဝ်ရ။ ပ္ဍဲသၟဝ်သၠဖ္ဍာန်တက္ကသိုလ်မအူပေန်ဂှ် ထောၚ်ကၠိုဟ် တိတ်အာလဝ် နွံရ” ဂှ် ညးဒေသမွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
တ္ၚဲဏံ ဂိတုဂျောန် စၟတ်တ္ၚဲ (၇) အခိၚ်ဇိုၚ်သဝ်တ္ၚဲဂှ် သ္ပဗဟဵုကဵု ဍုၚ်ညံၚ်တုံတုဲ ဟိုတ်နူကသဳတိ ချဳလဝ်ဂှ်ရ သီုကဵုပွိုၚ်ဍုၚ် မၞုံပ္ဍဲရးဨရာဝတဳကီု စဵုကဵုရးဒေသလဂုၚ် ဒးဒုၚ်လဝ် အသိၚ်ချဳကသဳရ။

ပ္ဍဲအလုပ်ပွိုၚ်ဍုၚ် ပ္ဍဲလဂုၚ် ပရေၚ်တဳချဳကသဳ ပ္ဍဲအခိၚ်ဇိုၚ်သဝ်တ္ၚဲ (၄)နာဍဳပြၚ်ဂှ် မွဲဝါ ကေုာံ (၅)နာဍဳပြၚ်ဂှ် မွဲဝါ ပံၚ်လၟိဟ်(၂)ဝါ ဒးဒုၚ်လဝ် ဆက်ဆက်ရဂှ် ညးဒေသမွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။

အကာဲအရာဇီုကပိုက်ဒးလဝ် ဟိုတ်နူကသဳတိဂှ် ပ္ဍဲပွိုၚ်ဍုၚ်မအူပေန်မွဲဓဝ်ဟေၚ် ဂွံတီကေတ်လဝ်တုဲ အကာဲအရာ ပ္ဍဲပွိုၚ်ဍုၚ်တၞဟ်တအ်ဂှ် ဟွံဂွံတီကေတ်လဝ်ဏီရ။
ပရိုၚ်-သြၚ်လောန်တိုၚ်(မ်)
ဗီုရုပ် – CJ

