မတ်မလီု၊ ဂျောန်(၈)
ပ္ဍဲတွဵုရးဍုၚ်မန် အပ္ဍဲသၞာံဏံ နူကဵုဂိတုဂျာန္နဝါရဳ စဵုကဵုဂိတုမေ အပ္ဍဲပွိုၚ် (၅) ဂိတုဂှ် မၞိဟ်က္တဵုဒှ်ယဲပုၚ် နွံကၠုၚ် စဵုကဵု (၂၃၀) တၠတုဲ ပ္ဍဲကဵုဏံ ကောန်ၚာ်သၟတ်မွဲတၠ ဒးချိုတ်အာလဝ်ရောၚ် ဂွံတီကေတ် နူကဵုတၚ်နၚ် ဌာနက္ဍိုက်ပ်ပရေၚ်ထတ်ယုက် ညးဍုၚ်ကွာန် တွဵုရး ကံၚ်ဇြဳပၞာန်ရ။
ယဲပုၚ်ဂှ်ဝွံ နူစဂိတုဂျာန္နဝါရဳ စဵုကဵုအပ္ဍဲဂိတုဨပရဴဂှ် မၞိဟ်က္တဵုဒှ်စဵုကဵုဟွံမွဲ အောန်စှ်ေကၠုၚ်လဝ်တုဲ အပ္ဍဲဂိတုမေ ဂှ် ကောန်ၚာ်သၟတ်ဂၠိုၚ်ကဵုကၠံ ဒးဒုၚ်ကၠောံထၞာန်လဝ်ရ။
ပ္ဍဲကဵုဏံ ကောန်ၚာ်သၟတ်မွဲတၠ ဒၟံၚ်ကွာန်အလှာပ် ပွိုၚ်ဍုၚ်ပံၚ်ဂှ်ဝွံ က္တဵုဒှ်ယဲပုၚ်တုဲ ဟိုတ်နူဟွံဂွံလွဳလွတ် ဗွဲမဂတာပ်အခိၚ်ဂှ်ရ ဒးချိုတ်အာလဝ်ရောၚ်ဂှ် လ္ပာ်ပရေၚ်ထတ်ယုက် ကံၚ်ဇြဳပၞာန်တံ သ္ဂးလဝ်ရ။

က္တဵုဒှ်ယဲပုၚ်ဂှ်မ္ဂး ပ္ဍဲပွိုၚ်ဍုၚ်ပံၚ်၊ ၜါသွာၚ်၊ မတ်မလီု ကေုာံ ပ္ဍဲပွိုၚ်ဍုၚ်ကျာ်မြဟ်တံဂှ် က္တဵုဒှ်ဂၠိုၚ်အိုတ်တုဲ ပ္ဍဲကဵုပွိုၚ်ဍုၚ်သှ်ေတံဂှ်လေဝ် ယဲကၠောံထၞာန်တံ နွံဒၟံၚ်ရ။
အ္စာဂဥုဲဂမၠိုၚ်ဂှ် အပ္ဍဲအခိၚ်အခါကာလဏံ ယဝ်ရကောန်ၚာ်တံ ဇကုဂမ္တဴဂိယဲကၠုၚ်မ္ဂး နွံပၟိက်ဒးထ္ၜး ရုၚ်ဂဥုဲ၊ ဗ္ဒမ်ဂဥုဲတံ ဗွဲမဂတာပ်အခိၚ်တုဲ ယဝ်ရဟွံဒုၚ်လွဳလွတ် ဗွဲမဂတာပ်အခိၚ်မ္ဂး လက္ချန်ယဲပုၚ် သ္ကာတ်မြဟ် မပ္တံကဵုဆီဓဇူ၊ လကိုတ်ဆီတံဂှ် က္တဵုဒှ်တုဲ စဵုကဵုလမျီုအိုတ် ဒှ်မာန်ရောၚ်ဂှ် ကဵုလဝ်သတိရ။

ဂၟိတ်တ္ၚဲ Aede မသ္ကဵုဒှ်တဴ ယဲပုၚ်မာန်ဂှ်ဝွံ ဍတ်ပါ်တိတ်ကၠုၚ် နူကဵုဍာ်ကေဝ်ဝ်ဍာ်သ္အးဇ္ၚးတံဂှ်ရ နဒဒှ်ဒစးဒုၚ်စဵုဒၞါတုဲ ပ္ဍဲကဵုသ္ၚိဇကုကဵု ဗ္ဒါဲဗ္ဒါဲသ္ၚိဇကုတံဂှ် သွက်ဂွံဂဒဵု၊ ကိုဟ်ချာဲ၊ လှာဲ၊ စၟဳစၟတ်တံအိုတ်ဂှ် ဖ္တိုက်ဖ္အောဝ်လဝ်ရ။
ပ္ဍဲတွဵုရးဍုၚ်မန် တုဲကၠုၚ်အပ္ဍဲသၞာံ ၂၀၂၂ တေံ မၞိဟ်က္တဵုဒှ်ယဲပုၚ် နူဂၟိတ်တ္ၚဲကိတ်တံဂှ် နွံလဝ် စဵုကဵု (၂၀၀၀) ပြၚ်တုဲ ကောန်ၚာ်သၟတ်မွဲတၠ ချိုတ်အာလဝ်ရောၚ် ဂွံတီကေတ် နူကဵုတၚ်နၚ်ဌာန က္ဍိုက်ပ်ပရေၚ် ထတ်ယုက်ညးဍုၚ်ကွာန်တွဵုရး ကံၚ်ဇြဳပၞာန်ရ။
ပရိုၚ်−သြၚ်လောန်တိုၚ်(မ်)
ဗီုဓာတ်−CJ

