လွိုၚ်ကဝ်၊ ဂျောန် (၆)
ဘာဗ္တောန်လိက် နူကဵုတွဵုရးကရေၚ်ဍာဲ မဒှ်ဒေသပဋိပက္ခပရေၚ်ပၞာန် မသ္ကာတ်မြဟ်ဒၟံၚ်ဂှ်ဝွံ ဟိုတ်နူဘဲသၞ တရဴကျာ ကံၚ်ဇြဳပၞာန်တုဲ ကောန်ၚာ်သၟတ်တံ သွက်ဂွံကတ်ဗ္တောန်ပညာမာန်ဂှ် ဒးၜံက်ဒၟံၚ်ကတိုၚ် ပါဲဗမ်တံရောၚ် ညးမရီုဗၚ်ကဵုဒၟံၚ်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကံၚ်ဇြဳပၞာန်ဝွံ ဒၞါဲက္တဵုဒှ်ဒၟံၚ်ပေါဲဗ္တိုက်တံသၟးဟွံက ဒၞါဲဟွံဒှ်ပေါဲဗ္တိုက်တံဂှ်လေဝ် ပန်ပှော်ဒၟံၚ် နကဵုလွဟ်ဇၞော် တံ၊ ဗ္တိုက်ဒၟံၚ်ကဵုတရဴကျာတံ လၟေၚ်ဒဒှ်တ္ၚဲဂှ်ရ ဘာဗ္တောန်လိက်ဂမၠိုၚ် ဂွံပံက်မာန်ဂှ် ဒးဂဗဒၟံၚ်အခက်အခုဲ ဂၠိုၚ်နူကဵုသၞာံတုဲတေံရ။
ဘာဗ္တောန်လိက်ကောန်ဂကူ နူကဵုတွဵုရးကရေၚ်ဍာဲတံကဵု ဘာပ္တန်လဝ် နကဵုဇြဟတ်ဇကုကဵုဇကုတံဂှ် စနူဂိတုဂျောန်မံက်ဏံတုဲ စပံက်လဝ်နွံကီုလေဝ် ဘာဗွဲမဂၠိုၚ်ဝွံ ဒးဂွိၚ်ဂွါဲဒၟံၚ် ကုဘဲသၞတရဴကျာ ကံၚ်ဇြဳပၞာန်ဂှ်ရ။

အခိၚ်လၟုဟ် ဘာဗ္တောန်လိက် နူကဵုဂကောံကွာန်ဒဝ်တမကျဳ သ္ကုတ်ဗၟံက်ပွိုၚ်ဍုၚ်ဒဳမအ်သဵု ဒၞါဲပေါဲဗ္တိုက် သ္ကာတ်မြဟ်ဒၟံၚ်တံဂှ်ကီု သီုကဵုဘာဗ္တောန်လိက် နူကဵုကွာန်တၞဟ်ဟ်တံ (၁၀) မဟွံက ဒးကၟာတ်ထောံ လဝ်နွံဂှ် ဂွံတီကေတ်ရ။
ကိုဝ်တေအ်ဇြဝ်ဟုၚ် မဒှ်ကောန်ဂကောံ (နွေဦးဂုရု) ဂှ် သွက်အခေါၚ်ဗ္တောန်ပညာ ကောန်ၚာ်သၟတ် တံဂှ်တုဲ ပံက်ဒၟံၚ်ဘာ မပ္တန်လဝ် နဇြဟတ်ဇကုတံဂှ်ကီုလေဝ် ပ္ဍဲကဵုဘာတံဂှ် ဒးၜံက်ခါဲလဝ် ဒၞါဲဂွံပါဲဗမ် တံရောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ဘာကောန်ဂကူ မၞုံဒၟံၚ်လ္ပာ်တံဏံကီု၊ ဘာပရေၚ်ပညာတံဂှ် ပံက်ဒၟံၚ်ရ။ အဓိကဂှ်တှ်ေ ပ္ဍဲကဵုဘာတံဂှ် ဒးကၠောန်လဝ်ဒၞါဲပါဲဗမ်တံဏောၚ်။ ဒးကၠောန်ဒၟံၚ်ဍေံ အဆက်က်ရ။ ဘာဂှ်တှ်ေ ပ္ဍဲကဵုဒၞါဲပိုယ်ဂှ် ပြံၚ်တုဲဒး ပံက်ကေတ်၊ ကၠောန်ဒၞါဲပါဲဗမ်တံတုဲ ဒးပံက်ရ။ ပိုယ်တံဂှ်တှ်ေ လၟုဟ်မ္ဂး မိက်ရမျာၚ်က္ၜၚ်ကျာဗက်ဂှ် ဟွံတိတ်ကျောဝ်ရတုဲ ဂြိပ်လုပ်အာ ဒၞါဲပါဲဗမ်တံဟဂှ် ကၠောန်လဝ်သာ်ဏံရ” သာ်ဝွံ သ္ဂးရ။
သ္အာၚ်နူဂှ်ပၠန် ပ္ဍဲကဵုပေါဲဗ္တိုက် နူကဵုသ္ကုတ်ဗၟံက်ဒဳမအ်သဵုတံဂှ် ဟိုတ်နူကံၚ်ဇြဳပၞာန် ပန်ပှော်လွဟ်ဇၞော်၊ ဗ္တိုက်ကဵုတရဴကျာတံတုဲ ဘာတန်သ္ဇိုၚ်ဂမၠိုၚ် ဒးလီုလာ်အာလဝ်တုဲ သွက်ကွးဘာတံလေဝ် ဒးဆေၚ်ဒၟံၚ် မုက်ကဵု ကပေါတ်အထံက်အရီု ဟွံရုမ်ဂပ်တံရောၚ်ဂှ် ညးဟီုဂးလဝ်ရ။
ကွးဘာ နူကဵုတွဵုရးကရေၚ်ဍာဲ (၉၀) တၟံကၠံပြၚ်ဂှ်ဝွံ ပ္ဍဲကဵုဘာကံၚ်ဇြဳပၞာန် ပံက်လဝ်တံဂှ် ဟွံတိုန်စိုပ်အိုတ် ရတုဲ လ္တူဍုၚ်လွိုၚ်ကဝ်ဂှ်ဟေၚ် နွံဒၟံၚ်ဗၞတ်ညိညဂှ် ဂွံတီကေတ်ရ။

ပ္ဍဲကဵု (၉၀) တၟံကၠံ ဟွံတိုန်ဘာကံၚ်ဇြဳပၞာန်တံဂှ် (၈၀) တၟံကၠံဂှ်ဝွံ တိုန်စိုပ်ဒၟံၚ် ပ္ဍဲဘာ မပံက်လဝ် နဇြဟတ်ဇကုဇကုတံဂှ်တုဲ သှ်ေ (၅) တၟံကၠံဂှ် တိုန်ဘာဟွံမာန်ပုဟ်ဂှ် ဂွံတီကေတ်ရ။
ကံၚ်ဇြဳပၞာန်ဝွံ ပ္ဍဲသၞာံ ၂၀၂၃ ဂှ် သွက်ဂွံထိၚ်ဒက်တွဵုရးကရေၚ်ဍာဲ အလုံအိုဿီုမာန်တုဲ ထ္မံက်ကၠုၚ် ပေါဲဗ္တိုက်တံဂှ် သာကၠောန်ကၠုၚ်ဂှ်ရ ဘာမပ္တန်လဝ် နဇြဟတ်ဇကုဇကုတံဂှ်ဝွံ ပံက်ကၠုၚ် ၜိုတ်ကဆံၚ်သၞာံတုဲတေံ ဟွံမာန်ဒှ်မံၚ်ရ။
ကောန်ၚာ် မကတ်ဗ္တောန်ဒၟံၚ်လိက် ပ္ဍဲဘာမပ္တန်လဝ် နဇြဟတ်ဇကုဇကုတံဂှ်ဝွံ ဒးဆေၚ်ဒၟံၚ်မုက်ကဵု အရာမ္ဒးဂွိၚ်ဂွါဲ သီုစိုတ် သီုကာယတံဂှ်တုဲ အန္တရာယ်တရဴကျာဂှ် သာတုဲဒးဂွိၚ်ဒၟံၚ်ရောၚ် ဥက္ကဌ ကံၚ်ဇြဳကဵုကသပ် တွဵုရးကရေၚ်ဍာဲ (KSCC) ဥူဗညာ ဟီုရ။
“စိုတ်ဂွိၚ်ဂွါဲဂှ်တှ်ေ နူပြဟ်ဟ်တေံရ သၠုၚ်ဒၟံၚ်တုဲတုဲရ။ ကၠာတေံမ္ဂး ဒးဂွိၚ်လွဟ်ဇၞော်တံ။ လၟုဟ်မ္ဂး သီုလွဟ်ဇၞော်၊ သီုက္ၜၚ်ကျာတံဂှ် ထပ်တုဲဒးဂွိၚ်ဒၟံၚ်ရ။ အ္စာ၊ အ္စာၝောံ နွံဒၟံၚ်ပ္ဍဲဘာတံဂှ်လေဝ် ဂွိၚ်ကၠုၚ်ကဵု က္ၜၚ်ကျာတံ သာဂၠိုၚ်ကၠုၚ်ဂှ် ဂွံဆဵုကေတ်ရ။ ဒးဟီုတပ်ပ်မ္ဂး ကလၚ်ကၠုၚ်ဗရုရမျာၚ် က္ၜၚ်ကျာဂှ် ဂၠိုၚ်ကၠုၚ်ရ။ ၜိုတ်သၟဟ်အစောံ သွက်ဂွံၜံက်လဝ်ဒၞါဲပါဲဗမ်တံဂှ်လေဝ် ဆဝ်မ္ၚုဟ်ဒၟံၚ်တံ နွံရ။ အေ ဂှ်တှ်ေ ဒးဟီုမ္ဂး နကဵုပိုယ်တံ ဒးဂွိၚ်ဒၟံၚ် သီုစိုတ် သီုကာယဂှ်ရ တော်ကဵုသၞာံကၠာကၠာတေံဂှ်မ္ဂး အပ္ဍဲတ္ၚဲအကြာဏံ အပ္ဍဲဂိတုဏံဂှ် သာတုဲသၠုၚ်တိုန်ကၠုၚ်ဂှ် ဍာံဍာံရ” သာ်ဝွံ သ္ဂးရ။

ကံၚ်ဇြဳပၞာန်ဝွံ လ္တူဘာဗ္တောန်လိက် ကောန်ၚာ်သၟတ်တံ မဗ္တောန်ဒၟံၚ်လိက်တံဂှ် ဗ္တိုက်ဂြာတ်ဒၟံၚ်ဗမ်တံ ကၠောန်ဒၟံၚ်အဆက်က်တုဲ ပ္ဍဲကဵုဏံ ဟိုတ်နူပရေၚ်ဗ္တိုက် ဘာဗ္တောန်လိက်ကွာန်လက်ယက်ကုန် ရးသက်ကိုၚ်တံဂှ်တုဲ သီုကဵုကောန်ၚာ်သၟတ်တံဂှ် ဒးချိုတ်အာလဝ် စဵုကဵု (၁၃) တၠ နဂအုံဗွဝ်ရ။
ပ္ဍဲကဵုတိဍာ်ဒပ်မဟာ ၆ ဗော်သွးကောန်ဂကူကရေၚ် KNU ဂှ်လေဝ် အပ္ဍဲဂိတုမေကဵု ဂိတုဨပရဴဂှ် ဒးဒုၚ်ဗ္တိုက်ဂြာတ်လဝ်မခတိုဟ် နကဵုက္ၜၚ်ကျာ စဵုကဵု (၃၁) ဝါတုဲ နူကဵုကရောၚ်ပၞာန်ဗလးတိဏံဂှ်လေဝ် ဟိုတ်နူပန်ပှော်ဗ္တိုက်လဝ် လွဟ်ဇၞော် စဵုကဵု (၁၈၄) ဝါဂှ်ရ ဘာဗ္တောန်လိက် (၃) ဘာ ဒးလီုလာ်လဝ်ရောၚ် KNU လလောၚ်ပ္တိတ်လဝ်ရ။
ကံၚ်ဇြဳပၞာန်ဝွံ ဘာဗ္တောန်လိက် နူကဵုလ္တူဍုၚ် ဍေံတံထိၚ်ဒက်လဝ်မာန်တံဂှ်ကဵု ဘာနူကဵုတွဵုရးရခေၚ် မဒးလဝ်လဗိုတ်ကျာတံဂှ် ဟွံဒေါအ်ဟွံဂွံ သွက်ဂွံပံက်ကဵုဂှ် ပ္တိတ်လဝ်အမိၚ်ကီုလေဝ် ဘာနူကဵုတိဍာ်ပၠန်ဂတး ဇြဟတ်ခိုဟ်တံဂှ် ဗ္တိုက်ဒၟံၚ် သ္ကာတ်တ်မြဟ်ဟ်ရ။
ပရိုၚ်−သြၚ်လောန်တိုၚ်(မ်)
ဗီုဓာတ်−NUG

