ပရေၚ်ဂီုကၠီုကောန်အရာပ် နူကဵုသီုဇြဟတ်ၜါလ္ပာ် ဒှ်ကၠုၚ်သ္ဇက်ဒးဂွိၚ်

လ္ဂုၚ်၊ ဂျောန် (၈)

ပရေၚ်ဒတူလိုၚ် လ္ပာ်ဟွံတုပ် အကြာညးထံက်ဂလာန်ဒပ်ပၞာန်တံကဵု ညးထံက်ဂလာန်ပၠန်ဂတးတံဂှ်ဝွံ လ္တူပရေၚ်ဂီုကၠီုကောန်အရာပ် သီုၜါလ္ပာ်တံဂှ် ဒှ်ကၠုၚ်သ္ဇက်ဒးဂွိၚ်ရောၚ် ညးခါတ်အကာဲ ပရေၚ် ဍုၚ်ကွာန်တံ သ္ၚဳဂၠိပ်လဝ်အိုတ်ရ။

ပ္ဍဲဂိတုမေ ၂၆ တုဲကၠုၚ်တေံ ဥူတေအ်လွေန် ညးမဒက်ပ္တန်လဝ် ဗော်သွးကောန်ဂကူ စပ်ကဵုဍုၚ်ဗၟာ (MNO) ဂှ် ဒးဒုၚ်ပန်ဂစိုတ်လဝ် ကဵုသေနာတ်တုဲ ဂွံမွဲၜါတ္ၚဲဂှ် ညးထံက်ဂလာန်ဒပ်ပၞာန် ညးတၠရမျာၚ် လဳလဳနာၚ်ဂျဝ် မဒှ်ညးချဳဒရာၚ်ပရေၚ်ဂကူဂှ် ဒးဒုၚ်ဂစိုတ်လဝ် နကဵုသေနာတ် ပ္ဍဲဂိတုမေ (၃၀) ဂှ်ရ။

ညးတၠရမျာၚ် လဳလဳနာၚ်ဂျဝ်ဝွံ ဒးဒုၚ်ပန်ဂစိုတ်လဝ် နကဵုသေနာတ် ပ္ဍဲအရာပ်စၟတ် (၂) ၊ ပွိုၚ်ဍုၚ်ယာန် ကေန်ဂှ်တုဲ ကြဴနူဒုၚ်လွဳလွတ် လအ်ဂွံမွဲသတ္တာဟတုဲဂှ် ပ္ဍဲဂိတုဂျောန် (၆) ပယျာံဂယးဂှ် ပြဟ်လလုဲအာလဝ်ရ။

ရဲပန်ပှော်လဝ် ညးတၠရမျာၚ်ဂှ်ဂးတုဲ နူကဵုကောန်ဂကောံ Special Task Force-STF (၂) တၠ ကိုဝ်ကံၚ် ဇြာနဳဟုၚ် (ခ) လပျေအ် ကေုာံ ကိုဝ်ကျဝ်တူရ (ခ) အဳတဳတံဂှ် ပ္ဍဲဂိတုဂျောန် (၄) တေံ ရပ်ဂွံလဝ် ပ္ဍဲကဵုဗ္ဒမ် မၞိဟ်တြုံမွဲဒၞါဲ မၞုံအပ္ဍဲပွိုၚ်ဍုၚ်ကမာရတ်ဂှ်ရောၚ် လ္ပာ်ကံၚ်ဇြဳပၞာန်တံ စောတ်စောဲ လလောၚ်ပ္တိတ်လဝ်ရ။

ပ္ဍဲဂိတုဂျောန် ၆ အခိၚ်ဇိုၚ်သဝ်တ္ၚဲ တ္ၚဲဒဝ်လဳလဳနာၚ်ဂျဝ် မချိုတ်အာဂှ် မဘသ ကေုာံ ပျူသဝ်ထဳတံ ရပ်ဒက်ဂစိုတ်ဏာလဝ် ညးမဒှ်မိ ကိုဝ်ကံၚ်ဇြာနဳဟုၚ် ကဵု ၝဲညးရ။

စပ်ကဵုပရေၚ်ဂစိုတ်ဂယိုၚ်ပလန်တဲ သာ်ဏံတံဂှ်တုဲ သၟာပရေၚ်ဍုၚ်ကွာန်ဝှ်ကြံၚ် ဥူဖေတာန်ဂှ် ပ္ဍဲကဵုဍုၚ်ရပ်စပ်သၞောတ်တၠအဝဵုပၞာန်တံဂှ် ဗွိုၚ်ပရေၚ်ပၞာန်သၠဲလးကၠုၚ်ဂှ်ဝွံ သၞောတ်မၞိဟ်မွဲကုမွဲ ဒက်ဂကောံတုဲ ကလေၚ်ပၠန်တဲညးသ္ကအ်တံလေဝ် ပါလုပ်ဂှ် သ္ဂးရ။

“ပ္ဍဲကဵုဍုၚ်သုၚ်စောဲသၞောတ်တၠအဝဵုပၞာန်တံဂှ် ဗွိုၚ်ပရေၚ်ဍုၚ်ကွာန်ဂှ် ဍန်ဂြက်ကၠုၚ်တုဲ ဗွိုၚ်ပရေၚ်ပၞာန်ဂှ် သၠဲလးကၠုၚ်ရ။ ပ္ဍဲကဵုဏံဂမၠိုၚ်ဂှ် သၞောတ်မၞိဟ်မွဲကုမွဲ ဒက်ဂကောံတုဲ ပၠန်တဲညးသ္ကအ်လေဝ် ပါလုပ်ဒၟံၚ်ကီုရ။ ဟိုတ်ဂှ်ရ ပိုယ်တံစိုတ်ဟွံခိုဟ်ပုဟ်၊ ဂၠါဲအာသွဟ် နကဵုနဲကဲဗွဲမၜိုဟ်လလမ်မှဟေၚ် ကိစ္စဏံဂှ် ကလိဂွံသွဟ်မာန်ဏောၚ်။ ညးမွဲကုညးမွဲ ဓဝ်အဃာတတံ အိုတ်အးမာန်ဏောၚ်ဂှ် ဒုၚ်ဂိုၚ်ကေတ်ရ” သာ်ဝွံ ညးသ္ဂးရ။

ကံၚ်ဇြဳပၞာန်ဂှ် ပရေၚ်ကၠတ်ဂစိုတ် ညးတၠရမျာၚ်ဒဝ်လဳလဳနာၚ်ဂျဝ်ဂှ်ဝွံ နူကဵုက္ဍိုပ်သ္ကိုပ်ကွးဘာတြေံ ဂအုပ်ဂကောံသမဂ္ဂကွးဘာ အလုံဍုၚ်ဗၟာ ( ဗကသ) ကိုဝ်ဒဳညုၚ်လေန် ကေုာံ မဟေဇြေဝ်တံ စကာလဝ်ရောၚ် သာ်ဝွံ စောတ်စောဲလဝ်ရ။

ပ္ဍဲကဵုပရေၚ်ပြုပြေၚ်ပၞာန်လ္တူဍုၚ်တံဂှ် ပရေၚ်ပန်ပှော်ဗ္တိုက်ဖံက်ထ္ကးလ္ၚဵုတံဂှ် နူကဵုဂကောံဒပ် ဒမၠုက်လ္တူဍုၚ်တံ ဒဒှ်ရညးတံကၠောန်လဝ်ရောၚ် လလောၚ်ပ္တိတ်လဝ်နွံကီုလေဝ် ဒဵုကဵုအခိၚ်လၟုဟ်ဂှ် စပ်ကဵုညးတၠရမျာၚ်လဳလဳနာၚ်ဂျဝ် ဒးချိုတ်အာဏံဂှ်တုဲ ဂကောံလဵုမှ ထ္မံက်ပ္တိတ်ဟီုဂးကၠုၚ်လဝ် ဟွံမွဲဏီရ။

ကြဴနူဒပ်ပၞာန်သီအဝဵုတုဲ ဂကောံဒပ်ပၠန်ဂတးရပ်လွဟ် မမံက်ဂတဝ်ကၠုၚ်လ္ၚဵုတံဂှ်ဝွံ ပသောၚ်ထောံလဝ် ရဲကဵုပရိုၚ် ထံက်ဂလာန်ကုဒပ်ကံၚ်ဇြဳပၞာန်တံ၊ အုပ်ဓုပ်ကွာန်တံ ကေုာံ သၞာဲဒဴကဆံၚ်သၠုၚ် နူကဵုဌာန မဆေၚ်စပ်တံဂှ် နွံဒၟံၚ်ရ။

ညးလ္ၚတ်သ္ၚဳဂၠိပ်ပရေၚ်ဍုၚ်ကွာန် ဥူတာန်သဵုနာၚ်ဂှ် ရဲထံက်ဂလာန်ဒပ်ပၞာန်တံ ဒးဒုၚ်ဂစိုတ်ဒၟံၚ်ဂှ်ဝွံ ပရေၚ်စက်ယန္တယာပရေၚ်ဂီုကၠီု ကေုာံ ပရေၚ်အုပ်ဓုပ် ကံၚ်ဇြဳပၞာန်တံ လီုလာ်စာ်ထောၚ်ဒၟံၚ်ဂှ် ညးဍုၚ်ကွာန်တံ ဂီုကၠီုဟွံမွဲဂှ်ဝွံ ဒှ်ဒၟံၚ်လက္ချန်မံက်ကၠးဒၟံၚ်ရောၚ်ဂှ် သ္ၚဳဂၠိပ်လဝ်ရ။

“ဆ္ဂး အရာတံဏံဂှ် ယဝ်ရတော်ကဵုဒပ်ကံၚ်ဇြဳပၞာန်တံ ဂစိုတ်ဂယိုၚ်ကလိလောန်လဝ် လ္တူညးဍုၚ်ကွာန်တံ၊ ရပ်ဒက်ဖျေံထံၚ်တံဂှ်မ္ဂး မွဲချောဲဍောတ်ရဏောၚ်။ အေဂှ်တှ်ေ ကိစ္စတံဏံဝွံ စပ်ကဵုဒးဂွိၚ်ဂွါဲ ပရေၚ်ဂီုကၠီုညးဍုၚ်ကွာန်တံဂှ်တုဲ ဒှ်ဗၞတ်ဗ္ၜတ်ညိညရဏောၚ်ဂှ် ဒုၚ်ဂိုၚ်ကေတ်ရ။ သရောပ်ထောံမ္ဂး လ္တူစက်ယန္တယာပရေၚ်ဂီုကၠီု ကေုာံ ပရေၚ်အုပ်ဓုပ်ကံၚ်ဇြဳပၞာန်တံ မလီုလာ်စာ်ထောၚ်ဒၟံၚ်ဂှ် ညးဍုၚ်ကွာန်တံ ဟွံဂီုကၠီုဂှ်ဝွံ ဒှ်ဒၟံၚ်လက္ချန်သကဵုမံက်ကၠးတဴရဏောၚ်ဂှ် အဲ မ္ဒးသ္ၚဳဂၠိပ်ကေတ်ရ” သာ်ဝွံ ညးသ္ဂးရ။

မွဲလ္ပာ်ပၠန်ဂှ် ကောန်ဒပ်ကံၚ်ဇြဳပၞာန်တံ ရပ်ဒက်ဂစိုတ်ဒၟံၚ် ညးချဳဒရာၚ်ကတိုၚ်ကၟဟ် ပရေၚ်ဍုၚ်ကွာန်တံ၊ ညးမၞုံပၟိက်ကဵု ဒဳမဝ်ကရေဇြဳ မထံက်ပၚ်ဒၟံၚ်သြန်လှုဲ၊ ထံက်ဂလာန်ကဵုဒၟံၚ်ဇြဟတ် ကုဂကောံရပ်လွဟ် မဒစဵုဒစးဒၟံၚ်သၞောတ်တၠအဝဵုပၞာန်တံဂှ်လေဝ် နွံဒၟံၚ်ရ။

သ္အာၚ်နူဂှ်ပၠန် ဂြောဝ်ဂတာ ညးမဆက်စပ်ဒၟံၚ်ကဵု ဒပ်စဵုဒၞါဒေသ (PDF) တံကဵု ကောန်ဗော် NLD တံ ညးစၞးတံဂှ်လေဝ် နူကဵုဂကောံသုၚ်ဆီကဵု ဂကောံဂစေံလၞေၚ်တံ ဂစိုတ်တုဲ ကၠဟ်ထောံလဝ်ဇွ လၟေၚ်ဒဒှ်သာ်ဏံတံဂှ် နွံဒၟံၚ်ကဵုစှော်ရ။

ပ္ဍဲအကာဲအရာဏံဂှ် ပရေၚ်ဂီုကၠီုညးဍုၚ်ကွာန် မထံက်ဂလာန်ကဵုဇြဟတ် ကုဂကောံၜါလ္ပာ်တံဂှ်ကဵု အရာမဒှ်ဓဝိၚ်တံဂှ်ဝွံ နွံဒၟံၚ်သီုၜါလ္ပာ်ဂှ်ရ ယဝ်ရကၟိန်ဍုၚ်ဟွံညိၚ်ဝတ်ဏံ ဂၠိၚ်သ္ၚောဲကၠုၚ်မ္ဂး အရာမဒှ်ဓဝိၚ်စံၚ်တူတံ သာတုဲဒှ်ကၠုၚ်ဏောၚ်ဂှ် ညးလ္ၚတ်သ္ၚဳဂၠိပ်ပရေၚ်ဍုၚ်ကွာန် ဥူယျေဝ်ထောန် (သီပေါ) ထံက်ထ္ၜးလဝ်ရ။

“သီုၜါလ္ပာ်ဂှ် ဟွံဂီုကၠီုကဵု အရာမဒှ်စံၚ်တူတံ နွံဒၟံၚ်ဏောၚ်။ ဟိုတ်ဂှ်ရ နူကဵုသီုၜါလ္ပာ်ဏံ ကၠောန်သ္ပပရေၚ်ဗ္တိုက် အတိုၚ်သၞောဝ်ပၞာန် မ္ဒးဒ္ဂေတ်ဗက် မဆက်စပ်ကဵု ပွန်ပရေၚ်ပၞာန်တံတှ်ေ ခိုဟ်ဏောၚ်။ ကၠတ်ဂစိုတ်၊ ရပ်ဒက်ကေတ်ဒုဟ် ကုမၞိဟ်ဟွံဆေၚ်တံဟီုဂှ် ဇေတ်တ်ဂှ် ဂကောံလဵုကၠောန်ကၠောန် ညအ်ဂှ်ပြဝပကီုပရာပ်ရဏောၚ်။ ပွန်နူကဵုသီုၜါလ္ပာ်ဏံဂှ် သၠဲလးကၠုၚ်သိုက်က်တုဲ ကလေၚ်ပၠန်ကၠုၚ်တဲ ကုအရာဟွံဆေၚ်တံဂှ်လေဝ် ဒှ်ကၠုၚ်မာန်ဏောၚ်။ ဘဝညးဍုၚ်ကွာန် ပါလုပ်ဒၟံၚ်သီုလ္ပာ်တေံလ္ပာ်ဏံတံ ဟွံဂီုကၠီုတုဲ ဒှ်ဓဝိၚ်ဒးဂွိၚ်ကၠုၚ်တံဂှ် သာတုဲဒှ်ကၠုၚ်ဏောၚ်” သာ်ဝွံ ညးသ္ဂးရ။

အတိုၚ်တၚ်နၚ် ဂကောံမၚ်မွဲရီုဗၚ် ကောန်ထံၚ်ပရေၚ်ဍုၚ်ကွာန် AAPP ဂှ်မ္ဂး ညးဍုၚ်ကွာန်ကောန်အရာပ် ကေုာံ ညးချဳဒရာၚ်ပရေၚ်ဒဳမဝ်ကရေဇြဳ (၃၆၀၀) ပြၚ် မဒစဵုဒစးလဝ် ပရေၚ်ပၞာန်သီအဝဵုတံ ဒးဒုၚ်ဂစိုတ်ဂယိုၚ်လဝ်တုဲ (၁၈၀၀၀) ပြၚ်ဝွံ ဒးထိၚ်ဒက်ဒၟံၚ်ဖိုဟ်ရောၚ်ဂှ် ပ္ဍဲဂိတုဂျောန် (၆) တေံ လလောၚ်ပ္တိတ်လဝ်ရ။

ဂကောံဒပ်ဒမၠုက်လ္တူဍုၚ် မၞုံအပ္ဍဲရးလ္ဂုၚ်တံကဵု ဂကောံဇြဟတ်ပၠန်ဂတး တၞဟ်သ္အာၚ်ဂမၠိုၚ်ဝွံ နူစဂိတုမေ ၂၀၂၁ စဵုကဵု ဂိတုမေ သၞာံ ၂၀၂၃ အပ္ဍဲပွိုၚ်ၜါသၞာံဂှ် ပရေၚ်ပြုပြေၚ်ပၞာန်လ္တူဍုၚ်ဂှ် နွံလဝ် ၂၀၀၀ ပြၚ်ရောၚ် ဌာန်ဂအုပ်ဒေသပၞာန်ပါ် ရးလ္ဂုၚ် လလောၚ်ပ္တိတ်လဝ်ရ။

ပ္ဍဲကဵုပရေၚ်ပြုပြေၚ်ပၞာန်ဏံဂှ် ကၠောန်သ္ပပန်ပှော်ဖံက်ထ္ကးလဝ် ကုပွန်ပရေၚ်ပၞာန်၊ ပရေၚ်အုပ်ဓုပ် ကေုာံ ပရေၚ်ပိုန်ဒြပ်တံဂှ်တုဲ အပ္ဍဲပရေၚ်ဗ္တိုက်တံဏံဂှ် ဟိုတ်နူကံၚ်ဇြဳပၞာန် ရပ်ဒက်ဍဵုဍိုက်တုဲ ကောန်သ္ဂံၚ်ပၠန်ဂတး (၈၀) ပြၚ် ပြဟ်လလုဲအာလဝ်တုဲ (၁၀၀၀) ပြၚ် ဒးဒုၚ်ရပ်ဒက်လဝ်ရောၚ် သ္ဂးလဝ်ရ။

ပရိုၚ်−သြၚ်လောန်တိုၚ်(မ်)

ဗီုဓာတ်−Social Media

Leave a Reply

Your email address will not be published. Required fields are marked *