ပ္ဍဲရးတၞၚ်သဳ ဒပ်ကံၚ်ဇြဳပၞာန် ဒးဒုၚ်ကၠတ်ဗ္တိုက်တုဲ (၁၀) တၠ ချိုတ်အာ

တၞၚ်သဳ၊ ဂျောန် (၈)

ရးဒေသဇၞော်တၞၚ်သဳ၊ ပွိုၚ်ဍုၚ်တၞၚ်သဳ၊ ပ္ဍဲဘာလကျာ် ကွာန်ချံၚ်ညဳကိုဝ်ဂှ် ဒပ်ကံၚ်ဇြဳပၞာန် မဖျေံလဝ်ဒပ် ပ္ဍဲကဵုဒၞါဲဏံ ဟိုတ်နူဒးဒုၚ်ကၠတ်ဗ္တိုက်ဂှ်ရ ကောန်ဒပ်ကံၚ်ဇြဳပၞာန် (၁၀) တၠ ချိုတ်အာလဝ်ရောၚ် ညးတာလျိုၚ် (ပကဖ) တၞၚ်သဳတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ပ္ဍဲဂိတုဂျောန် (၆) ၜိုတ်အခိၚ်လဒေါဝ်တ္ၚဲ (၂) နာဍဳဂှ် ကရောၚ်ပၞာန်ဒပ်ပံၚ်ကောံစဵုဒၞါညးဍုၚ်ကွာန်တံ လုပ်စိုပ်ဗ္တိုက်လဝ် ဒပ်ကံၚ်ဇြဳပၞာန် ဇြဟတ်ဒပ် ဗ္ဒါဲ ၄၀ မဖျေံဒပ်မံၚ်တန်တဴဒၟံၚ်ဂှ်ရ။

ဟိုတ်နူပရေၚ်ဗ္တိုက်ဏံတုဲ ပေါဲဗ္တိုက်ၜါလ္ပာ် က္တဵုဒှ်လဝ် လလအ်ပွိုၚ် (၁) နာဍဳပြၚ်တုဲ လ္ပာ်ကံၚ်ဇြဳပၞာန် ဒးဂိလဝ်ရ။

အပ္ဍဲပေါဲဗ္တိုက်ဂှ် လ္ပာ်ကောန်ဒပ်ကံၚ်ဇြဳပၞာန်တံ (၁၀) တၠ ချိုတ်အာလဝ်တုဲ လ္ပာ်ဂကောံဒပ်ပံၚ်ကောံတံဂှ် ကောန်သ္ဂံၚ် PDF (၂) တၠ ကလိဂွံလဝ်ဝပ် ဟွံဒးဂွိၚ်ရောၚ်ဂှ် ညးတာလျိုၚ် (ပကဖ) တၞၚ်သဳမွဲတၠ ဟီုရ။

ဟိုတ်နူပေါဲဗ္တိုက်တုဲ ညးဒေသဂၠိုၚ်ကဵုလ္ၚီ ဒးဂြိပ်ဒဴပါဲဒလေတ်ဒၟံၚ် လ္ပာ်ကွာန်ရာမ်ဖိုဝ်၊ ညံၚ်ပေန်ကုန်၊ ဗာန်လမွတ်၊ ချံၚ်ညဳကိုဝ် ဒၞါဲဗၠးဘဲတံဂှ် ဂွံတီကေတ်ရ။

ဒပ်ကံၚ်ဇြဳပၞာန် မဒးဒုၚ်ဗ္တိုက်လဝ်ဂှ်ဝွံ ပ္ဍဲဂိတုဂျောန် (၇) စဵုကဵုအခိၚ်နူဂယးဂှ် ဆက်ဖျေံလဝ်ဒပ် ပ္ဍဲကဵု ဘာလကျာ်ဂှ်တုဲ ဟိုတ်နူပန်ပှော်ဒၟံၚ်လ္ပာ်ကွာန်တံ နကဵုလွဟ်ဇၞော် ဟွံပိုတ်သ္ကုတ်ဂှ်ရ ပရေၚ်ပၞာန်ၜါလ္ပာ် ကြံၚ်မ္ၚိုဟ်ဒၟံၚ်ရ။

ပရေၚ်ဗ္တိုက်ဏံဂှ် ကရောၚ်ပၞာန်တၟေၚ် (ခွပ်ဒေါၚ်းတမန်) ၊ KILA-TCJF ၊ ဂကောံပံၚ်ကောံရေၚ်ဒဵုတၞၚ်သဳ၊ ဂကောံဒမၠုက်ဟွံဗက်လ္ပာ်၊ ဂကောံ SWDF တံ ပံၚ်တောဲဗ္တိုက်လဝ်ရောၚ်ဂှ် ဂွံတီကေတ်ရ။

ပ္ဍဲကဵုပွိုၚ်ဍုၚ်တၞၚ်သဳ မလလောၚ်တြးလဝ် ပရေၚ်အုပ်ဓုပ်ပၞာန်ဂှ် ပေါဲဗ္တိုက်အကြာဒပ်ကံၚ်ဇြဳပၞာန်ကဵု ဂကောံဇြဟတ်ပၠန်ဂတးတံဂှ် က္တဵုဒှ်ဒၟံၚ်အဆက်က်တုဲ တိဍာ်လ္ၚဵုတံဂှ်လေဝ် လ္ပာ်ကံၚ်ဇြဳပၞာန် ဒးဗလးလဝ်တဲ နွံရ။

ပရိုၚ်−သြၚ်လောန်တိုၚ်(မ်)

ဗီုဓာတ်−Tanintharyi PDF

Leave a Reply

Your email address will not be published. Required fields are marked *