လဂုၚ်၊ ဂျောန်(၈)
သွက်ကောန်ဍုၚ်ဗၟာ ညးမတိတ်စ္ဍးဍုၚ်သ္အာၚ်တံဂှ် သွံတြးကဵုမံၚ် မသြန်ဍုၚ်သ္အာၚ်ဗွဲတြးတံ အတိုၚ်ၚုဟ်ဗွဝ်ဖျာမ္ၚး တ္ၚဲမရာန်ဂှ်ရောၚ်ဂှ် ဂွံတီကေတ် နူညးတာလျိုၚ် တိုက်သြန်ပုဂ္ဂလိကတံရ။
သွက်ညးအာကၠောန်ကမၠောန်ဍုၚ်သ္အာၚ်တံ၊ ညးအာလွဳလွတ်ယဲတံ၊ ညးအာတိုန်ဘာတံဂှ် ရာန်ကေတ်မသြန်တြး နူဒဝ်လာအမေရိကာန် ၃၀၀ စဵုစိုပ် ၅၀၀မာန်ယျဂှ် တိုက်သြန်ပုဂ္ဂလိကတံ လလောၚ်တြးလဝ် ပ္ဍဲဂိတုဂျောန် စၟတ်တ္ၚဲ(၅)ဂှ်ရ။
ညးအာကၠောန်ကမၠောန်တံဂှ် တၞးဆာဲစၟတ်တဲကၠောံဍုၚ်၊ လိက်ခါန်ကၞက်ကမၠောန် ကေုာံ တၞးဆာဲစၟတ်တဲ က္ၜၚ်ကျာတံနွံမ္ဂး သွံတြးကဵုမံၚ် နကဵုအခေါၚ် ဂအုပ်ရုၚ်တံရောၚ်ဂှ် ညးတာလျိုၚ် နူကဵုတိုက်သြန် ပုဂ္ဂလိကမွဲတၠ ဟီုရ။
နအလဵုညးအာကတ်ဗ္တောန်ပညာတံဂှ် Passport of Education (PE) ဟွံသေၚ်မ္ဂး ဒးထ္ၜးလိက် စၟတ်သမ္တီ ဆေၚ်စပ်ကဵုဘာမတိုန်စိုပ်တံဂှ်တုဲ ညးတိတ်ဍုၚ်မ္ၚးသွက်ဂွံ လွဳလွတ်ယဲတံဂှ် ပ္တိုန်ထ္ၜးလိက် တၞးတၚ်နၚ် ဆေၚ်စပ်ကဵုသ္ဂောံလွဳယဲတံဂှ်တုဲ ရာန်ကေတ်မာန်မံၚ်ဂှ် တိုက်သြန် AYA ၊ AGD ကေုာံ YOMAတံသ္ဂးရ။

ညးခါတ်အကာဲပရေၚ်သြန်လှုဲမွဲတၠဂှ်တှ်ေ ၜိုန်ရဒးသွံတြးကဵုသြန်ဍုၚ်သ္အာၚ် ကုညးတိတ်စ္ဍးဍုၚ်သ္အာၚ်တံ အတိုၚ်ၚုဟ်စၟတ်လဝ်တံဂှ်ကီုလေဝ် ဟိုတ်နူတၚ်စၞောန် တိုက်သြန်ဗဟဵု ချိုတ်တ်ပၠိုတ်တ် ဟွံမွဲဂှ်ရ စိုပ်အာအကာဲအရာ တိုက်သြန်ပုဂ္ဂလိကတံ သွံတြးမာန်တံရောၚ်ဂှ် ညးဟီုရ။
“လၟုဟ်ဂှ် ကဏ္ဍခက်ခုဲမံၚ်ညိညိတံနွံမံၚ်။ လွဳလွတ်ယဲကီု၊ ပၠုပ်သြန်ဘာတံကီုဂှ် နွံပၟိက်မံၚ်ဒဝ်လာ ဏီကီုတှ်ေ။ အရာတံဏံဂှ် ၜိုန်ရကဵုလဝ်အခေါၚ်ကီုလေဝ် ဍာံဍာံဂှ် ဒးအာအတိုၚ် ၚုဟ်နှေုန် အလဵုသဳ စၟတ်လဝ် ဒးသွံ၊ ဒးရာန်ဂှ်ရလေဝ်။ မုဟိုတ်ရောဟီုတှ်ေ ကေတ်လဝ်လာၚ်ဇြေန်ဂှ် ဌာနExchange တိုက်သြန်တံဂှ် ဒးအာနူကဵု တိုက်သြန်ဗဟဵုရတှ်ေ။ (လိက်လလောၚ်တြးတိုက်သြန်ဗဟဵု) ညးဟီုဂှ် သွံဂွံရောၚ် ညးဟီု၊ ဒးသွံကဵုၚုဟ်လဵုရောဂှ် ပ္ဍဲလိက်စၞောန်ဂှ် ဟွံပါတုဲတှ်ေ သွံကဵု (ၚုဟ်ဗွဝ်ဖျာမ္ၚး) ဂွံအာရဣဒှ်” သာ်ဝွံ ညးသ္ဂးရ။

တိုက်သြန်ဗဟဵု ကံၚ်ဇြဳပၞာန်ဂှ် ညးအာကၠောန်ကမၠောန်ဍုၚ်သ္အာၚ်တံ၊ ညးအာကတ်ပညာတံ ကေုာံ ပ္ဍဲဌာနသၠာဲဂတးသြန်ဍုၚ်သ္အာၚ်တိုက်သြန်တံဂှ် သွက်ဂွံသၠုၚ်ပ္တိုန် သွံတြးကဵု မသြန်ဍုၚ်သ္အာၚ်ဗွဲတြး ကေုာံ နကဵုတၞးကာတ်ပသောၚ်လှုဲသုၚ်စောဲဂၠးတိဂှ်တုဲ သွက်ဂွံသွံတြးကဵု အပ္ဍဲပမာဏစၟတ်လဝ်ဂှ် စဳဇန်လဝ်တုဲ ဒှ်မံၚ်ယျရောၚ် လောန်ကၠုၚ်ပ္ဍဲဂိတုမေ စၟတ်တ္ၚဲ(၂၆) တေံ လလောၚ်တြးလဝ်ရ။
သြန်ဍုၚ်သ္အာၚ် ပ္ဍဲဗွဝ်ဖျာမ္ၚးဂှ် မွဲဒဝ်လာအမေရိကာန် ၜိုန်ရၚုဟ်မၞုံမံၚ် စဵုကဵု ၂၉၄၀ ဒ္ကေဝ်ကီုလေဝ် တိုက်သြန်ဗဟဵုဂှ် ၚုဟ်နှေုန်သၠာဲလှုဲဍုၚ်သ္အာၚ်စၟတ်လဝ် မွဲဒဝ်လာအမေရိကာန်၂၁၀၀ ဒ္ကေဝ်ဂှ် သ္ဇက်ဂွံပြံၚ် သၠာဲ ဟွံမွဲဏီပုဟ်ဂှ် လလောၚ်တြးလဝ်ရ။
ပရိုၚ် – သြၚ်လောန်တိုၚ်မ်
ဗီု – CJ

