ထဳလေန် – ဂျောန်(၈)
ဟိုတ်နူဒပ်ကံၚ်ဇြဳပၞာန် ကၠုၚ်ဂြာတ်ထောံဖျေံလဝ်ဗုံ ပ္ဍဲဗ္ဒာဲကွာန်သောဲလောဲ ပွိုၚ်ဍုၚ်ထဳလေန် ကဵုဂျေတ်ဖိုက်တာ ၜါဝါတုဲ ပရေၚ်ဇီုကပိုက်လီုလာ် နွံဒၟံၚ်ရဂှ် ညးဒေသတအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
တ္ၚဲဏံ ဂိတုဂျောန် ပ္ဍဲစၟတ်တ္ၚဲ (၇)ဂှ် ကံၚ်ဇြဳပၞာန် ကၠုၚ်စိုပ်ပန်ဖျေံလဝ် နကဵုတၚ်စောတ်စောဲ PDF တအ်နွံဒၟံၚ်ရဂှ် ဟီုလဝ်ရ။
“ပ္ဍဲလ္ပာ်ဂှ် တံဒပ် PDF တအ် နွံဒၟံၚ်။ ပရေၚ်ဇီုကပိုက်လီုလာ်ဒးလဝ် နွံဏောၚ်။ ဟွံတီလဝ်ချိုတ်တ်ပၠိုတ်တ်ဏီပုဟ်။ ဆက်စၠောံဟွံဂွံဏီ။ ဗတိုက်လဝ်ကဵုက္ၜၚ်ကျာတုဲ က္ၜၚ်ကျာထံက်ပရိုၚ် ပဝ်ဒၟံၚ်ဖိုဟ်ရ” ဂှ် ညးဒေသမွဲတၠ ဟီုသ္ဂးလဝ်ရ။

ဂျေတ်ဖိုက်တာ ကၠုၚ်ပန်ပှော်လဝ် ကွာန်သောဲလောဲဂှ် ပဝ်ကၠုၚ်နူသၞေဟ်က္ၜၚ်ကျာတတာဥူ ဖျေံသ္ဇိုၚ်မုံယွာတုဲ ပ္ဍဲအခိၚ်ဇိုၚ်သဝ်တ္ၚဲ ၜိုတ် (၃)နာဍဳဂှ် ဂြာတ်ထောံဖျေံလဝ်ဗုံ ၜါဝါရဂှ် ညးဟီုလဝ်ဏီရ။
ရးဒေသမဂွေ ပွိုၚ်ဍုၚ်ထဳလေန်ဂှ် ပ္ဍဲသၞာံ ၂၀၂၃ ဏံ ကံၚ်ဇြဳပၞာန်ဗတိုက်လဝ်ကဵုက္ၜၚ်ကျာ ဟွံအောန်နူ (၁၀)ဝါ နွံတုဲ ဂိတုဂျောန် စၟတ်တ္ၚဲ (၆) ကဵု(၇) ဂှ် ကၠုၚ်ဗတိုက်လဝ် ပွိုၚ်ၜါတ္ၚဲဆက်ဆက်ရ။

ပ္ဍဲဂိတုဨဗြဴ တုဲကၠုၚ် စၟတ်တ္ၚဲ (၂၀) တေံလေဝ် ရုၚ် ပ.အ.ဖ ကွာန်လောၚ်ဗိုလ်ဂှ် ဒၟာနူကံၚ်ဇြဳပၞာန်ဗတိုက်လဝ်ကဵုက္ၜၚ်ကျာတုဲ ကောန်ရုၚ်(၃)တၠ ဒးချိုတ်လဝ် ဒးလဝ်ဘဲဝပ် (၁၂)တၠတုဲ ပ္ဍဲကဵုဂှ် ဒးလဝ်ဘဲဝပ်သ္ကာတ်မြဟ် (၄)တၠရဂှ်ဂွံတီကေတ်ရ။
ကြဴနူဒပ်ပၞာန်သီအဝဵုကၟိန်ဍုၚ်ဗၟာတုဲ ပရေၚ်ကံၚ်ဇြဳပၞာန်ဗတိုက်လဝ်ကဵုက္ၜၚ်ကျာ (၁၄၂၇) ဝါ ကၠောန်ကၠုၚ်လဝ်တုဲ ကောန်အရာပ် (၆၃၄)တၠ ဒးချိုတ်လဝ်ရဂှ် ဂကောံသုတေသနဉာဏ်လောန်တေတ် လလောၚ်တြးလဝ်ရ။
ပရိုၚ်-သြၚ်လောန်တိုၚ်(မ်)
ဗီုရုပ် – CJ (ဗီုရုပ် ရုၚ်ပ.အ.ဖ ပွိုၚ်ဍုၚ်ထဳလေန် ဒပ်ပၞာန်ဂြာတ်ထောံဖျေံလဝ်ဗုံကဵုက္ၜၚ်ကျာ-ဗီုတြေံ)

