လက်ထက်ကံၚ်ဇြဳပၞာန်ဏံ ဘဲအန္တရာယ်ဂၠံၚ် ညးဂမၠိုၚ်ရပ်စပ်စကာတံ ဒှ်ကၠုၚ်သ္ဇက်ဒးဂွိၚ်

မတ်မလီု၊ ဂျောန် (၈)

အပ္ဍဲကာလဒပ်ပၞာန်သီအဝဵု ပွိုၚ်ၜါသၞာံဏံ ပ္ဍဲကဵုဂၠံၚ်ညးဍုၚ်ကွာန်ဂမၠိုၚ်ရပ်စပ်စကာတံဂှ် မ္ၚးနူပေါဲဗ္တိုက် တံဂှ် ဟိုတ်နူလၟေၚ်ဒဒှ်ဒးဒုၚ်ပန်ပှော်ဗ္တိုက်တံဂှ်တုဲ အရိုဟ်ဒဒှ်တ္ၚဲ ဒးဂွိၚ်တဴဒၟံၚ် ကုအန္တရာယ် လမျီုတံ ရောၚ်ဂှ် ညးဒဳယာန်ဂမၠိုၚ် ဟီုဂးကၠုၚ် ညဳညဳသၟဟ်ဟ်အိုတ်ရ။

ဂၠံၚ်ညးဍုၚ်ကွာန်ဂမၠိုၚ်ရပ်စပ်စကာတံဝွံ ကၠာတေံ ပ္ဍဲအရာပလံၚ်ဗစိုပ်ကပေါတ်ဗၞိက်တံကဵု အာကၠုၚ် တရဴတံဂှ် သီုဗ္တံသီုတ္ၚဲ အာကၠုၚ်ဂီုဂီုကၠီုကၠီု ဖျေံစိုတ်ဂွံကီုလေဝ် ကြဴနူဒပ်ပၞာန်သီအဝဵုတုဲ ပ္ဍဲကဵုဂၠံၚ် ဒေသ ဗွဲမဂၠိုၚ်တံဂှ် မွဲဏှမွဲဏှဟီုဂွံ ဒးဒုၚ်ပန်ပှော်တံ၊ ဒးဒုၚ်ဗ္တိုက်ဗ္တိုဟ်မာၚ်တံ နွံဒၟံၚ်တုဲ ဒးဒုၚ်စံၚ်ပလီု ပလာ်တံလေဝ် နွံကၠုၚ်ဂှ်ရ ပရေၚ်ဂီုကၠီု ဟွံမွဲဒှ်ကၠုၚ်ရ။

ပ္ဍဲကဵုဂၠံၚ်ညးဍုၚ်ကွာန်ဂမၠိုၚ် ရပ်စပ်စကာတံဂှ် ဂၠံၚ်လ္ဂုၚ်−မတ်မလီု ဂၠံၚ်ဇၞော်ကၟိန်ဍုၚ်မွဲဓဝ်ရဂှ် အပ္ဍဲဂိတုမေ သတ္တာဟလက္ကရဴအိုတ်ဂှ် ကွဳစက်အာတရဴတံကဵု ကွဳစက်ဖ္ဍိုက်ဗၞိက်တံ ဒးဒုၚ်ပန်ပှော်လဝ် ဟွံအောန်နူကဵု (၄) ဝါတုဲ ဟိုတ်နူလၟေၚ်ဒဒှ်တံဏံတုဲ ညးဒဳယာန်တံကဵု ညးအာတရဴ (၃) တၠ ချိုတ်အာတုဲ ဟွံအောန်နူကဵု (၆) တၠ ကလိဂွံလဝ်ဝပ်ရ။

ညးဒဳယာန်ဖ္ဍိုက်ဗၞိက်မွဲတၠဂှ် လက်ထက်ကံၚ်ဇြဳပၞာန်ဏံ ပ္ဍဲအရာအာကၠုၚ်တရဴတံဂှ် ဗီုကၠာတေံ ဂီုကၠီုဟွံမွဲရတုဲ အကြာအန္တရာယ်လမျီုဂှ် ချိၚ်ချတုဲ ဒးအာကၠုၚ်ဒၟံၚ်တုဲ ဒးဂွိၚ်ဒၟံၚ်လၟိုန်ရောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“ပရေၚ်ဂီုကၠီုဂှ်တှ်ေ အရာလဵုမှ ဖျေံစိုတ်ဟွံဂွံပုဟ်။ လ္တူဂၠံၚ်ဂှ်လေဝ် ပရေၚ်ဂီုကၠီုဂှ် ဖျေံစိုတ်ဟွံဂွံပုဟ်၊ တၠကွဳစက် အကြာၜါလ္ပာ်တံဂှ်တှ်ေ ဒှ်မံၚ်ချောဲ အကြာပြေၚ်ၜါဏောၚ်။ ပြဟ်ဟ်ဏံဂှ် ပိုယ်တံ အလဵုဂြိပ်ပ် ဟွံပြေပြံၚ်ပုဟ်။ လ္ပာ်တၠအဝဵုပၞာန်ဂှ်လေဝ် ဒးဖေက်၊ လ္ပာ်တေံဂှ်လေဝ် ဒးဖေက်ဟီုတှ်ေ ဇကုဂှ် ဒှ်မံၚ်မၞိဟ်အကြာဏောၚ်။ အကြာဂၠံၚ်ဂှ်တှ်ေ ချိၚ်ဆတုဲ ဒးအာဒၟံၚ်ရ။ ယဝ်ရဒှ်ဒၟံၚ်ပေါဲဗ္တိုက်တှ်ေ ဒးဒေါအ်တုဲ ကုသိုလ်ခိုဟ်မ္ဂး ဗၠးဏောၚ်။ ကုသိုလ်ဟွံခိုဟ်မ္ဂး ချိုတ်ဏောၚ် ညအ်ရနွံ။ ဒှ်ဒၟံၚ်အကာဲအရာ ဒးဂွိၚ်ဒၟံၚ်ဖအိုတ်ရဏောၚ်။ ဇၟာပ်ပ်တၠကွဳစက်တံဖအိုတ်ရဏောၚ်။ အန္တရာယ်လမျီုဇကုဂှ်လေဝ် ဒးရံၚ်ဒၟံၚ်ဏီဏောၚ်၊ ချိၚ်ဆတုဲ ဒးအာဒၟံၚ်ရ” သာ်ဝွံ သ္ဂးရ။

လ္ပာ်သ္ကုတ်ဂၠံၚ် မ္ဒးသုၚ်စောဲဒၟံၚ်အဓိက ပ္ဍဲအရာပလံၚ်ဗစိုပ်ကပေါတ်ဗၞိက်တံဂှ် ဂီုကၠီုဟွံမွဲရတုဲ ဗၞိက်ဂေတ်ဂြိပ်ဗီုကၠာတေံလေဝ် ဟွံမွဲရတုဲ ဟိုတ်နူဒးအာဒၟံၚ် အကြာအန္တရာယ်လမျီုဂှ်ရ ဖအောန်ဖျေံလ္တုန်တုဲ ဒးဓဇက်ဂြိပ်ကၠုၚ်ရောၚ်ဂှ် ညးဒဳယာန်တံ သ္ဂးအိုတ်ရ။

မွဲလ္ပာ်ပၠန်ဂှ် ကောန်ဂကောံဒပ်သၟဝ်တဲကံၚ်ဇြဳပၞာန်တံဝွံ နကဵုဟိုတ်ပရေၚ်ဂီုကၠီုဂှ် ပံက်လဝ်သၞေဟ်ကၚ် ဂမၠိုၚ်တုဲ အာတ်ကၠုၚ်သြန်လှုဲတံ နကဵုဂၠံၚ်ဍာန်နာနာသာ် ဂၠိုၚ်ကၠုၚ်တုဲ ယဝ်ရဟွံကဵုမ္ဂးလေဝ် ရပ်ဒက်ပန်ပှော်တံဂှ် ဒးဂဗဒၟံၚ်ရ။

ညးဒဳယာန်မွဲတၠဂှ်လေဝ် ပ္ဍဲကဵုသၞေဟ်ကၚ်စၟဳစၟတ်ကံၚ်ဇြဳပၞာန်တံဂှ် ၜိုတ်အာတ်ဂှ်ယဝ်ရဟွံကဵုမ္ဂး ပွမမၜုၚ်တက်တံ နွံဒၟံၚ်တုဲ ဒးဒုၚ်စသိုၚ်ဒၟံၚ် အရာဟွံဂီုကၠီုတံ ဇၞော်ကဵုဇြဟတ်ရောၚ်ဂှ် ဟီုရ။

“သၞေဟ်ကၚ်နွံၜိုတ်လဵုရောဟီုဂှ် အဲဟွံမိက်ဟီုပုဟ်။ ရိုဟ်ဟွံမာန်ပုဟ်။ လဆောဝ်လဆောဝ်တှ်ေ ပ္ဍဲကဵုဍုၚ်မွဲဍုၚ်ဂှ် သၞေဟ်ကၚ်ဂှ် နွံစၜိုတ် (၂) ဏောၚ်။ ခရိတ်အိုတ်သရောပ်ထောံဂှ် မတ်မလီု ကဵု မာန္တလေဝ် သီုအာသီုစဴဂှ်တှ်ေ (၅) ဠက်လ္ပာ်လ္တူရဏောၚ်။ တၠကွဳစက်ဟီုအရေဝ်ဟွံပြေပြံၚ်တံဂှ်မ္ဂး ခရိတ်အိုတ်သာတုဲ အိုတ်ဂၠိုၚ်ရ။ ပိုယ်တံဂှ် ဒဳကွဳစက်မှ ဂွံစပုၚ်ဏောၚ်။ အခိၚ်ဂှ်မှ ဟီုဍဵုမွဲလ္ပာ်ဓဝ်ဂှ်လေဝ် ဟွံဂွံပုဟ်။ ညးဂှ်ဒှ်ဒှ်ရ ပိုယ်တံ နွံမံၚ်သီုကောန်သီုဇာတ်ကီုတံဂှ် ကဵုကၠုၚ်ဇြဟတ်ဂရိုဟ်ကွေံကွေံဂှ်တှ်ေ ဟွံပြေပြံၚ်ပုဟ်” သာ်ဝွံ သ္ဂးရ။

သ္အာၚ်နူဂှ်ပၠန် ညးဒဳယာန်ဗွဲမဂၠိုၚ် မကၠောန်ဒၟံၚ် ပရေၚ်ပလံၚ်ဗစိုပ်ဗၞိက်တံဂှ်ဝွံ ဟိုတ်နူအကာဲအရာ ပရေၚ်ဂီုကၠီုကီု သီုကဵုကပေါတ်ဗၞိက်တံ အောန်စှ်ေကၠုၚ်ဂှ်ရ ဗီုကၠာတေံ ဓဇက်ဂြိပ်ကၠုၚ် ကွဳစက်တံဂှ် ဟွံမာန်ရတုဲ ဟိုတ်နူၚုဟ်ကၠေၚ်စက်တံကဵု ၚုဟ်သၞေဟ်ကၚ်တံတုဲလေဝ် သြန်လုပ်ကဵု သြန်တိတ်ဟွံ ညဳသၟဟ်တုဲ ဒးဒေါအ်ဇူကၠုၚ်တံ နွံကၠုၚ်ကီုရ။

အခိၚ်လၟုဟ် ကွဳစက် မပလံၚ်ဗစိုပ်ဒၟံၚ်ဗၞိက် ကေုာံ ယာန်အာတရဴဂမၠိုၚ်ဝွံ ဟိုတ်နူဂီုကၠီုဟွံမွဲဂှ်ရ မွဲဏှ မွဲဏှဟီုဂွံ ဗၠေတ်မှာတုဲ ဒးဒုၚ်ပန်ပှော်တံကီု၊ ဒးဒုၚ်ဗ္တိုက်ဗ္တိုဟ်မာၚ်တံဂှ်ကီုဂှ်ရ ညးဒဳယာန်၊ ညးဗက် လက္ကရဴယာန်တံ သီုကဵုညးအာတရဴတံ မ္ဒးချိုတ်တံဂှ် ဆက်နွံဒၟံၚ်ရ။

ၜိုန်ရပရေၚ်မ္ဒးချိုတ်သာ်ဏံတံ နွံကၠုၚ်ကီုလေဝ် နူကဵုဂကောံဇြဟတ်ၜါလ္ပာ်တံ ဟီုဂးစောတ်စောဲ ညးတေံညးဏံတံဓဝ်ရ နွံတုဲ ညးဂှ်ကၠောန်လဝ်ရောဟီုဂှ် ဟွံဂွံတီကေတ် ချိုတ်တ်ပၠိုတ်တ်ဂှ်ရ မုဟွံဆေၚ်မွဲသာ် ဒးဒုၚ်ဇီုကပိုက်ဒၟံၚ်အကြာရောၚ်ဂှ် ညးဒဳယာန်တံ ဟီုဂးကၠုၚ်ရ။

မွဲလ္ပာ်ပၠန်ဂှ် ကံၚ်ဇြဳပၞာန်ဝွံ ထ္ၜးဟိုတ်ကဵုပရေၚ်ဂီုကၠီုဒပ်တုဲ ပ္ဍဲဂိတုတုဲကၠုၚ်တေံ ဂၠံၚ်ညးဍုၚ်ကွာန်ဂမၠိုၚ် ရပ်စပ် နူကဵုတွဵုရးကရေၚ်ကဵု တွဵုရးဍုၚ်မန်တံကီု သီုကဵုရးဒေသ ကေုာံ တွဵုရးလ္ၚဵုတံဂှ် တုက်ကဵုကာ တုက်တိတုဲ ကၠောန်သ္ပပလီုပလာ်ဒၟံၚ်ရ။

ပရိုၚ်−သြၚ်လောန်တိုၚ်(မ်)

ဗီုဓာတ်−CJ

Leave a Reply

Your email address will not be published. Required fields are marked *