ပ္ဍဲရးတၞၚ်သြဳ ပ္ဍဲပွိုၚ်မွဲဂိတုဏံ ကောန်အရာပ် (၄၀၀)တၠ ပြၚ်ဒးဒုၚ်ရပ်လဝ်တုဲ ဒးချိုတ်လဝ် (၃)တၠ

တၞၚ်သြဳ၊ ဂျောန်(၁၀)

ပ္ဍဲရးဒေသဇၞော်တၞၚ်သြဳ ပ္ဍဲဂိတုမေတုဲကၠုၚ်ပွိုၚ်မွဲဂိတုဏံ ကံၚ်ဇြဳပၞာန်ရပ်ကေတ်လဝ် ကောန်အရာ ညးဍုၚ်ကွာန် (၄၀၀)တၠပြၚ်တုဲ ပ္ဍဲကဵုဂှ် ကောန်အရာပ် (၃)တၠ ဒးဒုၚ်ပြိုက်ဂစိုတ်လဝ်ရဂှ် FE5 Tanintharyi မဒှ်ဂကောံသုတေသနမွဲဂကောံ လလောၚ်တြးလဝ် ပ္ဍဲဂိတုဂျောန် စၟတ်တ္ၚဲ (၈) ရ။

အတိုၚ်တၚ်လလောၚ်တြး FE5 Tanintharyi ဂှ်မ္ဂး ပ္ဍဲဂိတုမေဂှ် လ္ပာ်ကံၚ်ဇြဳပၞာန် ထ္ၜးဟိုတ်နာနာ ရပ်ကေတ်လဝ် ကောန်အရာပ်ညးဍုၚ်ကွာန် (၄၂၁) တၠတုဲ ပ္ဍဲကဵုဂှ် ကောန်အရာပ် (၃၂၁)တၠ ကလေၚ်ဗၠး တိတ်ကၠုၚ်လဝ်ရဂှ် ဟီုသ္ဂးလဝ်။

ဆ္ဂး ပ္ဍဲညးဒးဒုၚ်ရပ်လဝ်ဂှ် မၞိဟ် (၃)တၠ ဒးဒုၚ်ဍဵုဍိုက်ပျဲပျာံပြိုက်ဂစိုတ်လဝ်တုဲ ကောန်အရာပ် ညးဍုၚ်ကွာန် (၁၀၀)တၠ သှ်ေဒၟံၚ်တအ်ဂှ် ကံၚ်ဇြဳပၞာန် ဗ္ဂပ်စုတ်ၝောံပိုဒ်နာနာ ဆက်ရပ်လဝ်ရဂှ် ဓမံက်လဝ် ပ္ဍဲတၚ်လလောၚ်တြးရ။

ပ္ဍဲညးဒးဒုၚ်ရပ်လဝ်တအ်ဂှ် ပွိုၚ်ဍုၚ်ထဝါဲ၊ ပွိုၚ်တယျေတ်ချောၚ်၊ ပွိုၚ်ဍုၚ်လံၚ်လုၚ် ကေုာံပွိုၚ်ဍုၚ်ဍာ်ဗု (၃၃၃) တၠ၊ ပွိုၚ်ဍုၚ်ပလဝ်ကဵု ပွိုၚ်ဍုၚ်တၞၚ်သြဳဂှ် ဟွံအောန်နူ (၈၁)တၠ၊ ပ္ဍဲပွိုၚ်ဍုၚ်ခမောက်ဂျဳကဵု ပွိုၚ်ဍုၚ်ဗုက်ပျေန် ဒးဒုၚ်ရပ်လဝ် (၇)တၠရဂှ် ဂွံတီကေတ်ရ။

ပ္ဍဲဂိတုမေဂှ် မ္ၚးနူပရေၚ်ပန်ပှ်ောၜါလ္ပာ် ဟိုတ်နူပေါဲဗတိုက်တုဲ ညးဍုၚ်ကွာန် (၂၁) တၠ ဒးဒုၚ်ချိုတ်လဝ်တုဲ ဟိုတ်နူပေါဲဗတိုက်ဂှ် ညးဍုၚ်ကွာန် (၃၄၀၀၀)တၠပြၚ် ဒးဂြိပ်ဒဴပါဲဓလေတ်လဝ်ရ။

ညးဒေသ ဒးဂြိပ်ဒဴပါဓလေတ်ဒၟံၚ်တအ်ဂှ် ဒၟာနူစိုပ်ကၠုၚ်အခိၚ်ဗြဲတုဲ ဒးဆေၚ်ဒၟံၚ်မုက်ကဵု ပြသၞာဒၞာဲဒၟံၚ် ပရေၚ်ထတ်ယိုတ်တုဲ ဒးဆဵုဂဗဒၟံၚ်ကဵု ပရေၚ်ဂဥုဲဇဗ ကၟဳဗ္ဒၚ် ဟွံရုပ်ဂပ်ရဂှ် ဟီုသ္ဂးလဝ်ရ။

ပ္ဍဲရးဒေသတၞၚ်သြဳ အကာဲအရာပၞာန်ကြံၚ်မ္ၚိုဟ်ဒၟံၚ်ဂှ် ပ္ဍဲမွဲကာလသီအဝဵု ပွိုၚ် (၂)သၞာံပြၚ်ဏံ ဗီုပြၚ်ပေါဲ ဗတိုက်က္တဵုဒှ် ပြံၚ်သၠာဲကၠုၚ်တုဲ ဒပ်ပၠန်ဂတးတအ် စကၠုၚ်ပၞာန်ထ္ပက်တုဲ လ္ပာ်ကံၚ်ဇြဳပၞာန် ပြံၚ်ကၠုၚ်ဗီုပြၚ် ပၞာန်ဒုၚ်ရဂှ် ဂွံတီကေတ် အတိုၚ်တၚ်လလောၚ်တြး FE5 Tanintharyi ရ၊

ပရိုၚ်-သြၚ်လောန်တိုၚ်(မ်)

ဗီဵုရုပ်-CJ

Leave a Reply

Your email address will not be published. Required fields are marked *