နယူယျံက် -ဂျောန်(၁၀)
ပ္ဍဲကၟိန်ဍုၚ်ဗၟာဂှ် ၜိုန်ရနွံဒၟံၚ်ပၟိက်ကဵု အရီုဗၚ်ဗ္စာရဏာပရေၚ်မၞိဟ်ကီုလေဝ် ကံၚ်ဇြဳပၞာန်သုၚ်စောဲဒၟံၚ်မူဝါဒ ကုတ်ဗပိုတ်ပန်ဂကူတုဲ ကၠောန်သ္ပဒၟံၚ် ညံၚ်ညးဍုၚ်ကွာန်တအ် ဟွံက္လိဂွံအရီုဗၚ်ရဂှ် အမာတ်ကလုတ် တမာန် ညးစၞးကၟိန်ဍုၚ်ဗၟာဒ္တန် ဥူကျဝ်မိုဝ်ထောန် ဟီုသ္ဂးလဝ်ရ။
ပ္ဍဲကောံဓရီုဆေၚ်မုက် သၞာဲဒဴကဆံၚ်လ္တူ ပရေၚ်က္လေၚ်သ္ၚဳဂၠိပ် Sendai Framework ဆေၚ်စပ်ကဵု သွက်ဂွံဖ္အောန်ယှအ်ဖျေံ ဘဲအန္တရာဲသဘာဝကၠုၚ်စိုပ် ကုလသမဂ္ဂ ကၠောန်ဗဒှ်လဝ် ပ္ဍဲဍုၚ်နယူယျံက် ပ္ဍဲဂိတုဂျောန် စၟတ်တ္ၚဲ (၆)ဂှ် ဟီုသ္ဂးလဝ်သာ်ဏံရ။

“ညံၚ်အရီုဗၚ်ဂွံစိုပ် ဇရေၚ်ညးနွံဒၟံၚ်ပၟိက်ဍာံဍာံ ပၟိက်ဇၞော်ဒၟံၚ်ဟီုဂှ် ဒဒှ်ရမိက်ဂွံဟီု ဇြိုဟ်ဟ်နက်က်ကီု ပ္ဍဲအခိၚ်ညးမဆေၚ်စိုပ်သီုဖအိုတ် ပ္တိတ်ဒၟံၚ်ဇြဟတ် ရေၚ်တၠုၚ်ဒၟံၚ်ဏံ နကဵုဒပ်ပၞာန်ဟွံလုပ်သၞောဝ် သုၚ်စောဲမူဝါဒကုတ်ဗပိုတ်(၄)ဂကူတုဲ ပ္တိဒၟံၚ်ဇြဟတ် ညံၚ်ကပေါတ်အရီုဗၚ်ဗ္စာရဏာပရေၚ်မၞိဟ် ဟွံဂွံစိုပ် ဇရေၚ်ညးနွံဒၟံၚ်ပၟိက်ကီု သီုညးမံၚ်တန်တဴဒၟံၚ် ပ္ဍဲဒၞာဲဒေသပဋိပက္ခ က္တဵုဒှ်ဒၟံၚ်တအ်ရ” ဂှ် အမာတ်ကလုတ်တမာန် ဥူကျဝ်မိုဝ်ထောန် ဟီုသ္ဂးလဝ်ရ။
သ္အာၚ်နူဂှ်ပၠန် ညးဍုၚ်ကွာန်ကၟိန်ဍုၚ်ဗၟာ ဒးဒုၚ်ဒၟံၚ်ဘဲဒဏ် ဒပ်ပၞာန်သီအဝဵုဟွံလုပ်ကဵုသၞောဝ်ဂှ် သီုဒးထပ် ဒုၚ်ဒၟံၚ် အဆက်ဗွက်ဗက်လကြဴလဗိုတ်ကျာရဂှ် အမာတ်ကလုတ်တမာန် ဟီုသ္ဂးလဝ်ဏီရ။

စပ်ကဵုလဗိုတ်ကျာမိုဝ်ခါဇြိုၚ်ကလုမ်တုဲ သွက်ဂွံရေၚ်တၠုၚ်ကဵု အစဳဇန်ပရေၚ်ကလေၚ်ပ္တန်ပ္တူ ကေုာံ ပရေၚ်မံၚ်တန်တဴအာဍာ်ဇမၠိၚ်ဂှ် နွံဒၟံၚ်ပၟိက် ဒဝ်ဠာအမေရိကာန် (၃၃၃)ပြကောဋိကိုတ်တုဲ အရီုဗၚ်တအ် ဂှ်လေဝ် ညံၚ်ဂွံစိုပ် ဇရေၚ်းညမၞုံဒၟံၚ်ပၟိက်ဍာံဍာံတအ် ပၟိက်ဇၞော်ဒၟံၚ်ရဂှ် ဟီုသ္ဂးလဝ်ဏီရ။
ဟိုတ်ဂှ်ရ သွက်ဂွံကဵုအရီုဗၚ်ဟံၚ်ပြာ်ကာတၟေၚ် မၞုံပၟိက် ဇရေၚ်ညးမၞုံပၟိက် ပ္ဍဲကဵုဒေသ ဒးဒုၚ်ဇီုကပိုက် ဒးလဝ်ဘဲဒဏ်တအ်မာန်ဂှ် အာတ်မိက်လဝ် ကုလသမဂ္ဂ၊ ဂကောံကၟိန်ဍုၚ်နာနာ ပါလုပ် သီုအာဇြဳယာန် ရဂှ် ဂွံတီကေတ်လဝ်ရ။
ပရိုၚ်-သြၚ်လောန်တိုၚ်(မ်)
ဗီုရုပ် – NUG

