စပ်ကဵုဥူတာန်မျေတ် ဒးဒုၚ်ဂစိုတ်လဝ်တုဲ ဒဒှ်ရစိုတ်ဟွံမိပ်ဂှ် NUG ပလံၚ်ဗစိုပ်လိက်သဝဏ်

လဂုၚ်- ဂျောန်(၁၀)

စပ်ကဵုဥူတာန်မျေတ် (က) Sayedul Anwar ညးမဒှ်ကောဥူကျဝ်မိုဝ် မဒှ်ဒၟံၚ်ပူဂဵုကဵုကသပ် ဌာန ဝန်ဇၞော်အခေါၚ်အရာမၞိဟ်၊ အလဵုအသဳပရေၚ်ညဳသၟဟ်ကောန်ဂကူ ဒးဒုၚ်ပြိုက်ဂစိုတ်လဝ်တုဲ ဒဒှ်ရစိုတ်ဟွံမိပ်ဂှ် ဌာနဝန်ဇၞော်ပရေၚ်အခေါၚ်အရာမၞိဟ် ပလံၚ်ဗစိုပ်လဝ် လိက်သဝဏ်ရ။

ပ္ဍဲဂိတုဂျောန်စၟတ်တ္ၚဲ(၇) အခိၚ်ဗ္တံ (၁၁)နာဍဳဂှ် ဟိုတ်နူမၞိဟ်ဟွံတီယၟု မွဲဂကောံ ပြိုက်ဂစိုတ်လဝ် ပ္ဍဲပွိုၚ်ဍုၚ်သာကေတ၊ ဍုၚ်လဂုၚ်တုဲ ဒုၚ်ကေတ်လဝ် အသံပၟိၚ်တၠညးမပြဲအလ္လာဟ်ရ။

ဥူတာန်မျေတ်(က) Sayedul Anwar ညးမဒးချိုတ်လဝ်ဂှ် ပ္ဍဲအခိၚ်ဒးချိုတ်လဝ်ဏံ က္လိဂွံအာယုက် (၄၅)သၞာံရဂှ် ဂွံတီကေတ်တုဲ ဟိုတ်နူမၞိဟ်မွဲဂကောံ ပြိုက်ဂစိုတ်လဝ် ဗီုလၟုဟ်ဏံတုဲ ဒဒှ်ရစိုတ်ဟွံ မိပ်တုပ်သၟဟ်ကဵု ဂကောံသ္ၚိကၟိန်အိန်ထံၚ်ညးရဂှ် ဓမံက်ထ္ၜးလဝ်ရ။

သ္အာၚ်နူဂှ်ပၠန် တၠညးအလ္လာမပြဲ ယိုက်ဒိုက်ထံက်ပၚ်ကဵု အခေါၚ်ဗၠးၜးၜိုဟ်လလံ မဂ်ဖိရသ် ကုညးမက္လိလောန်စဴအာညိ၊ ယိုက်ဒိုက်ထံက်ပၚ်ကဵု ကဆံၚ်မသၠုၚ် ပ္ဍဲကဵုဂျနာသ်ညိ၊ ဂကောံသ္ၚိကၟိန် မသှ်ေသၟေဟ်ဒၟံၚ်တအ်ဂှ်လေဝ် ဆာန်ဍူကဵုစၞးမပြဲတုဲ ယိုက်ဒိုက်ထံက်ပၚ်ကဵုညိဂှ် ဟီုသ္ဂးလဝ်ရ။

ညးမပြိုက်ဂစိုတ်လဝ် ဥူတာန်မျေတ်ဂှ် ဒှ်ဂကောံ မ.ဘ.သ ကေုာံ ဂကောံပျူသဝ်ထဳ ထံက်ဒၟံၚ် ဂလာန်ကဵုကံၚ်ဇြဳပၞာန်ရဂှ် ပ္တိုန်လဝ် ပ္ဍဲအကံက်တေဝ်လဳဂရာမ်ထံက်ဂလာန် ကံၚ်ဇြဳပၞာန်တုဲ ဒုၚ်ဒၟံၚ်ပေါဲအံၚ်ဇၞးရ။

ပရိုၚ်-သြၚ်လောန်တိုၚ်(မ်)

ဗီုရုပ် – NUG

Leave a Reply

Your email address will not be published. Required fields are marked *