ပ္တိတ်ဒၟံၚ်ဇြဟတ် သွက်ဂွံဘာတ်ပ္တိတ် ညးမၞုံစိုတ်ဓာတ်သ္ပမာန်ကေတ်ဇၞး လ္တူညးဍုၚ်ကွာန် နူလ္တူဂၠးတိဏံပေၚ်ၚ်ရဂှ် သ္ကိုပ်ဝန်ဇၞော် NUG ဟီု

မတ်မလီု – ဂျောန်(၁၀)

ရပ်လွဟ်တုဲ ညးမၞုံစိုတ်ဓာတ် သ္ပမာန်ကေတ်ဇၞး လ္တူညးဍုၚ်ကွာန်တအ်ဂှ် သွက်ဘာတ်ပ္တိတ်နူလ္တူဂၠးတိဏံပေၚ်ၚ် သီုညးဖအိုတ် ပ္တိတ်ဒၟံၚ်ဇြဟတ် ရေၚ်တၠုၚ်ဒၟံၚ်ရဂှ် သ္ကိုပ်ဝန်ဇၞော်အလဵုအသဳပရေၚ်ညဳသၟဟ်ကောန်ဂကူ မာန်ဝေန်ခိုၚ်တာန် ဟီုသ္ဂးလဝ်ရ။ 

ပ္ဍဲကောံဓရီု ကဝ်မတဳဗဟဵု ဓမံက်ရုပ်ရဴပရေၚ်အုပ်ဓုပ်ညးဍုၚ်ကွာန် ဒေသန္တရကာလအကြာ၊ အလဵုအသဳပရေၚ်ညဳသၟဟ်ကောန်ဂကူ လၟေၚ်(၂၃/၂၀၂၃) မကၠောန်ဗဒှ်လဝ် ပ္ဍဲဂိတုဂျောန် စၟတ်တ္ၚဲ(၈) တုဲကၠုၚ်အခိၚ်နူဂယးတေံဂှ် ဟီုသ္ဂးလဝ်သာ်ဏံရ။ 

“ရပ်လဝ်လွဟ်တုဲ ညးမၞုံစိုတ်ဓာတ်သ္ပမာန်ကေတ်ဇၞး လ္တူညးဍုၚ်ကွာန်တအ်ဂှ် သွက်ဂွံဘာတ်ပ္တိတ်ထောံ နူလ္တူဂၠးတိဏံပေၚ်ၚ်မာန် သီုညးဖအိုတ် ဂစာန်ရေၚ်တၠုၚ်ပ္တိတ်ဒၟံၚ်ဇြဟတ်ရ၊ မွဲဒမြိပ်ဝၚ်ပၠန်ဂတးကၠုၚ်ဒၟဴၚ်ကဵု ကံၚ်ဇြဳပၞာန်ပ္ကီုပရာပ်ဏံ ရေၚ်တၠုၚ်မာန်လဝ် စဵုကြပ်ဒေါံခရိုဟ်မာန်ကၠုၚ်ဏံဂှ် ဟိုတ်နူကဵုစိုတ်ဓာတ်ညဳသၟဟ် စိုတ်ဓာတ်ကတိုၚ်ကၟဟ်ညးဍုၚ်ကွာန်တအ်ဟီုဂှ် အကာဲအရာလၟုဟ်ဏံ ထ္ၜးဒၟံၚ်သက်သဳရ” ဂှ် သ္ကိုပ်ဝန်ဇၞော် မာန်ဝေန်ခိုၚ်တာန် ဟီုသ္ဂးလဝ်ရ။ 

သ္အာၚ်နူဂှ်ပၠန် ကိစ္စဆေၚ်စပ်ကဵုပရေၚ်အုပ်ဓုပ် အတိုၚ်အကာဲအရာကာလအကြာ သွက်ဂွံစွံအာရီုကဵုလၟေၚ်ကမၠောန် ပရေၚ်အုပ်ဓုပ် မဒှ်အထံက်အရံၚ်ပၞာန်ပၠန်ဂတးမာန်တုဲ ဒပ် PDF တအ် ဇြဟတ်ခိုဟ်တုဲ ညံၚ်ဂွံစဵုဒၞာကဵု ညးဍုၚ်ကွာန်တအ်ပေၚ်ၚ်မာန်ဂှ် ၜိုန်တာလျိုၚ် ပ္ဍဲဌာနဝန်ဇၞော်ပရေၚ်စဵုဒၞာမၞုံဒၟံၚ်ကီုလေဝ် ပ္ဍဲကဵုညးမၞုံကဵုတၚ်ရန်တၟံ သွက်ဂွံဗတိုက်ပ္တိတ်ထောံ တၠအဝဵုသီုညးဖအိုတ်တအ်ဂှ်လေဝ် တာလျိုၚ်နွံဒၟံၚ်ရဂှ် သ္ကိုပ်ဝန်ဇၞော် ဟီုသ္ဂးလဝ်ဏီရ။  

နကဵုဂကောံ ပ.အ.ဖ၊ ပ.က.ဖ၊ ပ.လ.ဖ၊ PDF တအ်ဂှ် သွက်ဂွံဒှ်အထံက်အရံၚ် မွဲဂကောံကဵုမွဲဂကောံလေဝ် ဟီုဗတိုက်ဖ္အောဝ်လဝ်ကီု နကဵုဌာနဝန်ဇၞော်တအ်ဂှ် ဟိုတ်နူဒးရေၚ်တၠုၚ်ဒၟံၚ် အကြာအကာဲအရာ (၂)ဂကူဏံဂှ်ရ ခက်ခုဲဒၟံၚ်တုဲ သွက်ဂွံဖျေံမူဝါဒ ဟွံလောဲသွာဂှ် ၜိုန်ရကၠိုဟ်ကေတ်ဒၟံၚ်ကီုလေဝ် ဟိုတ်နူဒှ်အကာဲအရာဒေါံဟွံဂွံ ဒးတတ်ကၠောံဂှ်ရ နကဵုအလဵုအသဳက္ဍိုက်က္ဍိုပ်ပၠန်ဂတး ဟိုတ်နူဒှ်ကမၠောန် မဒးပ္တိုန်စၟတ်သမ္တီဂှ်ရ သွက်ဂွံပ္တိတ်ဇြဟတ် ရေၚ်တၠုၚ်ကဵုဂှ်လေဝ် ဟီုဗတိုက်ဖ္အောဝ်လဝ် ပ္ဍဲပေါဲကောံဓရီုဂှ်ရ။ 

ဆက်တုဲ ညးလုပ်ဂကောံကဝ်မတဳဗဟဵု ဓမံက်ရုပ်ရဴပရေၚ်အုပ်ဓုပ်ညးဍုၚ်ကွာန် ဒေသန္တရကာလအကြာဂှ် စပ်ကဵုတၚ်သ္ဂုတ်သွာတ်၊ လၟေၚ်ကမၠောန် ဖျေံလဝ် ပ္ဍဲဂကာံဓရီု (၂၂/၂၀၂၃) တုဲ သဳကၠဳလဝ် အကာဲအရာ လၟေၚ်ကမၠောန် အာစိုပ်လဝ်ဒတုဲ ကေုာံလၟေၚ်ကမၠောန် သွက်ဂွံဒးဆက်ကၠောန်ရေၚ်တၠုၚ်အာ မသှ်ေသၟေဟ်ဒၟံၚ်ဂမၠိုၚ်ရဂှ် ဂွံတီကေတ်ရ။ 

ကောံဓရီုဂှ် သ္ကိုပ်ဝန်ဇၞော်မာန်ဝေန်ခိုၚ်တာန် က္ဍိုက်က္ဍိုပ်တုဲ ဝန်ဇၞော်ကၟိန်ဍုၚ်ဂမၠိုၚ်၊ ဒုတိယဝန်ဇၞော်ဂမၠိုၚ်၊ ဝန်ပ္ဍဲဒ္တန်ဂမၠိုၚ် ကေုာံ ညးတာလျိုၚ် ဌာနမဆေၚ်စပ်ဂမၠိုၚ် တိုန်စိုပ်လဝ်ရဂှ် ဂွံတီကေတ်လဝ်ရ။ 

ပရိုၚ်-သြၚ်လောန်တိုၚ်(မ်)

ဗီုရုပ်- NUG

Leave a Reply

Your email address will not be published. Required fields are marked *