သွံထဳ နကဵုသၞောတ်အောန်လိုၚ်တုဲ သွက်ဂွံထပ်ဂၠါဲအကံက်အခေါန်ဂှ် ကံၚ်ဇြဳပၞာန် ဂ္စါန်ကၠုၚ်၊ ဟွံကံက်ထဳမွဲသာ် သွက်ဂွံဆက်ဗကပ်ကဵုဗဗေၚ်ဂှ် ဖ္တိုက်ဖ္အောဝ်

လ္ဂုၚ်၊ ဂျောန် (၁၀)

သုၚ်စောဲဖုၚ်မိုဝ်ဗိုၚ်တံတုဲ နူကဵုအပလဳကေယှေန် အံၚ်ဗာလေထဳဂှ်မွဲကဆံၚ် ဟွံဒးရုဲဒၞါဲ ဟွံဒးရုဲအခိၚ် ထ္ပက်ကေတ်ထဳ နကဵုသၞောတ်ထဳအောန်လာၚ်တံမာန်ဂှ် ကံၚ်ဇြဳပၞာန် စထ္မံက်ရုပ်ရဴ ရေၚ်တၠုၚ်ကၠုၚ်ရ။

အသေအဟာန်စပံက် သၞောတ်ထဳအောန်လိုၚ်ဂှ် ပ္ဍဲဂိတုဂျောန် (၈) တေံ က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် တိုန်စိုပ်လဝ်တုဲ အနာဂတ်ဏံ ညံၚ်အကံက်ခေါန်ဘဏ္ဍာကၟိန်ဍုၚ် ဂွံတောတက် ကၠုၚ်ဂှ်ကဵု ညံၚ်စမြိုၚ်သ္ဇိုၚ် စပ်ကဵုပရေၚ်ပိုန်ဒြပ်ဒေတ်ဂျေတ်ဒဴတံ ဂွံဖောအ်ဗြေဝ်တောတက်ကၠုၚ် ဖဵုဂုဏ်တံဏံဂှ် သ္ကဵုဒှ်အထံက်အပၚ်မာန်ရောၚ် သ္ဂးရ။

ကံၚ်ဇြဳပၞာန်ဂှ် နူကဵုအပလဳကေယှေန် အံၚ်ဗာလေဝ်ထဳဂှ် ရာန်ကေတ်စၟတ်တဲထဳတံ၊ ပသောၚ်ကလးသၠုဲ ၚုဟ်ထဳတံ ကေုာံ ပ္တိတ်သြန်လာဘ်တံဂှ် ကၠောန်မာန်တုဲ အခိၚ်ပံက်ထဳမ္ဂး နူကဵုဖုၚ်မိုဝ်ဗိုၚ် မၞိဟ်ကုသိုလ် ခိုဟ်တံဂှ် ကဵုကၠုၚ်ပရိုၚ် ပလံၚ်နၚ် SMS ဏောၚ်ဂှ် သ္ဂးရ။

ပ္ဍဲအရာပ္တိတ်ကေတ်သြန်လာဘ်ထဳတံဂှ်လေဝ် ညံၚ်ဂွံဍာံပြလောဲသွာဂှ် သြန်လာဘ် ပမာဏဍေံအောန်ဂှ် လှဲပြံၚ်အာကဵု နူကဵုအောန်လိုၚ်ဏောၚ်တုဲ ပလံၚ်ကဵု ပ္ဍဲအကံက်ဗာန် ညးကုသိုလ်ခိုဟ်တံတုဲ ရေၚ်တၠုၚ် အာဏောၚ်ဂှ် ကံၚ်ဇြဳပၞာန် လလောၚ်ပ္တိတ်လဝ်ရ။

မခေတ်တေတ်နွေဥူ မပါလုပ်ဒၟံၚ် ပ္ဍဲပၠန်ဂတးက္ညၚ်ဂှ် ထဳ ကံၚ်ဇြဳပၞာန် မသွံတြးကဵုဂှ်ဝွံ ဒှ်သွက်ဂွံရာန်လွဟ် သွက်ဂွံဂစိုတ်ညးဍုၚ်ကွာန်တံဏောၚ်ဂှ်ရ နကဵုညးဍုၚ်ကွာန်ဂမၠိုၚ် သွက်ဂွံဆက်ဒစဵုဒစးအိုတ်ဂှ် ဖ္တိုက်ဖ္အောဝ်လဝ်ရ။

“ညးဍုၚ်ကွာန်ထ္ပက်ဒး ထဳအောန်လိုၚ် ကံၚ်ဇြဳပၞာန် မသွံတြးကဵုဒၟံၚ်တံဂှ် အဓိကဂှ်တှ်ေ ထ္ပက်ဏာထဳဏံ တုဲ ဂုဏ်ဖဵုမဂွံကၠုၚ်တံဂှ် ဒှ်အရာကဵုဒၟံၚ်ဇြဟတ် သွက်ဂွံရာန်လွဟ် သွက်ဂွံဂစိုတ်ညးဍုၚ်ကွာန် သွက်ဂွံ ပလီုဍုၚ်ကွာန်ဏောၚ်ဂှ် မိက်ဂွံဟီုရ။ ဟီုမ္ဂး ကၠာပၟတ်ဟွံစိုပ်ဂတမုက်သ္ၚိဇကုဏီ၊ ကၠာဂွိုအ်ခဍံက်တြၚ် ဇကုဏီဂှ် ပွမကြမ်ကြဓဇန် ကံၚ်ဇြဳပၞာန်တံဂှ် ဂွံညာတ်ကေတ်နမတ်မာန်မှ ညာတ်ဏောၚ်။ ဆ္ဂး သီုညးဖအိုတ်ဂှ် ၜိုန်ဟွံဆက်စပ်တိုက်ရိုက်ကီုလေဝ် မွဲနဲမွဲဗီုဂှ် ဒးဆက်စပ်ဒၟံၚ်တံ သာ်ဏံဂှ်ရ ညံၚ်ဂွိုအ် ကဵုဒးကံၚ်ဇြဳပၞာန် ပၞော်ယီုဂှ် မိက်ဂွံဖ္တိုက်ဖ္အောဝ် ညးဍုၚ်ကွာန်တံရ” သာ်ဝွံ ညးသ္ဂးရ။

ကြဴနူဒပ်ပၞာန် သီအဝဵုတုဲ ညးဍုၚ်ကွာန်မၞုံပၟိက် ဒဳမဝ်ကရေဇြဳတံဝွံ ဟိုတ်နူဗကပ်လဝ်ဗဗေၚ် ကုစၟတ်တဲထဳ အံၚ်ဗာလေဝ် မသ္ကဵုဇွောဝ်တဴ နဒဒှ်အကံက်အခေါန်သြန်လုပ် ကံၚ်ဇြဳပၞာန်တံဂှ်တုဲ နကဵုကံၚ်ဇြဳပၞာန်ဂှ် ဒးပဆုဲလဝ်တ္ၚဲပံက်ထဳတံ၊ ဒးဖအောန်ဖျေံလဝ်သြန်လာဘ်ထဳတံ ကေုာံ ဒးကဵုကၠုၚ်သြန်လာဘ်ထဳတံ ကဵုပွူတံဂှ် ဒးကၠောန်ကၠုၚ်လဝ်ရ။

မွဲလ္ပာ်ပၠန်ဂှ် နူကဵုအလဵုအသဳညဳသၟဟ်ဂကူ NUG စသွံတြးလဝ် ထဳနွေဥူ နူကဵုအောန်လာၚ် ပ္ဍဲသၞာံ ၂၀၂၁ ဂိတုအဝ်ဂါတ်တေံဂှ် မၞိဟ်ကၠုၚ်ကံက်တံ ဂၠိုၚ်လောန်ဂှ်ရ အပ္ဍဲအခိၚ်သွံထဳ ဂွံမွဲၜါနာဍဳဂှ် အိုတ်အာလဝ်ရ။

ပ္ဍဲကဵုအကာဲအရာသာ်ဏံဂှ် ပ္ဍဲကဵုသၞာံ ၂၀၂၁ ဂိတုအံက်တဝ်ဗာဂှ် ကံၚ်ဇြဳပၞာန် အာတ်မိက်ပ္တိုန်လဝ်ဂလာန် ကုကမ္ပဏဳ မထံက်ပၚ်ကဵုနဲကွတ်ပညာမာန် သွက်ဂွံသွံတြးကဵုထဳအံၚ်ဗာလေဝ် နူကဵုအောန်လာၚ်တံဂှ် ရေၚ်တၠုၚ်လဝ်ရ။

အခိၚ်လၟုဟ်ဂှ် သၞောတ်အောန်လာၚ် ထဳအံၚ်ဗာလေဝ်တံဂှ် နူကဵုသၟဝ်ပၠတရဴ ဌာနဝန်ဇၞော်ပရေၚ်ဘဏ္ဍာ ကေုာံ ကိုန်စဳမာန်တံဂှ်ကီု၊ သီုကဵုဌာနဝန်ဇၞော် မဆေၚ်စပ်ဂမၠိုၚ် ဌာနက္ဍိုက်ပ်ဂမၠိုၚ်တံ သီုကမ္ပဏဳဒပ်ပၞာန် ပိုၚ် ညံၚ်ရဴ Mytel တံဂှ်လေဝ် ပါလုပ်ဒၟံၚ် နဒဒှ်ပါတနာကီုရ။

ညးချဳဒရာၚ်ကတိုၚ်ကၟဟ်ပရေၚ်ဒဳမဝ်ကရေဇြဳမွဲတၠဂှ်လေဝ် နကဵုညးဍုၚ်ကွာန်တံ လ္ပရာန်ကဵုဇြဟတ် ကုထဳကံၚ်ဇြဳပၞာန်ဂှ်တုဲ သွက်ဂွံဆက်ဗကပ်ဗဗေၚ်ဂှ် ဖ္တိုက်ဖ္အောဝ်လဝ်ရ။

“ကပေါတ်ဆက်စပ်ကဵု ကံၚ်ဇြဳပၞာန်တံ အရာအိုဿီုဂှ် ညးဍုၚ်ကွာန်တံ ရာန်ဟွံထေက်ပုဟ်၊ ကဵုဇြဟတ် ဟွံထေက်ပုဟ်။ မုဒှ်ရောဟီုမ္ဂး သြန် နူကဵုသွံဂွံထဳတံ၊ ဗဳယျာတံဂှ် ကံၚ်ဇြဳပၞာန် သွက်ဂွံကလေၚ် ဂစိုတ် ညးဍုၚ်ကွာန်တံတုဲ ဒှ်အာခရိတ် မကမ်လွဟ်ဇၞော်တံရ။ ဟိုတ်ဂှ်ရ ထဳကံၚ်ဇြဳပၞာန် မဟီုဒၟံၚ် သွံကဵုညးဍုၚ် ကွာန်တံဏောၚ်ဂှ်လေဝ် လ္ပကဵုဇြဟတ်အိုတ်ညိဂှ် မိက်ဂွံဟီုရ” သာ်ဝွံ ညးသ္ဂးရ။

ကြဴနူဒပ်ပၞာန်သီအဝဵုတုဲ ခရိတ်အရပ်စပ်ကာစဵုဒၞါဒပ်ပၞာန်ဂှ်ဝွံ ပပဵုပ္တိုန်ရပ်စပ်စကာလဝ် ဂၠိုၚ်နူကဵုကဏ္ဍ ပရေၚ်ပညာ၊ ပရေၚ်ထတ်ယုက်၊ ပရေၚ်ဇြဟတ်ဓာတ်လလဳ မဒှ်တၚ်နွံပၟိက်သ္ဇိုၚ် သွက်ညးဍုၚ်ကွာန် တံဂှ်တုဲ ခရိတ်အရပ်စပ်ကာစဵုဒၞါ သွက်သၞာံဘဏ္ဍာ ၂၀၂၃−၂၀၂၄ တံဂှ်ဝွံ သၠုၚ်ပ္တိုန်ရပ်စပ်ကၠုၚ် စဵုကဵု (၅၆၀၀) ဗဳလျာန်ဒ္ကေဝ်ပြၚ်ရ။

ညးမၞုံပၟိက်ဒဳမဝ်ကရေဇြဳ မဒစဵုဒစးလဝ် သၞောတ်တၠအဝဵုပၞာန်တံဂှ်ဝွံ ညံၚ်ဂွံထပိုတ်ဂၠံၚ်တရဴ သြန်လုပ် ကံၚ်ဇြဳပၞာန်၊ ညံၚ်ဂွိုအ်ကဵုဇြဟတ် ကုကပေါတ်ဗၞိက်ဒပ်ပၞာန်ပိုၚ်တံဂှ်တုဲ ဒဵုကဵုတ္ၚဲဏံ ကၠောန်ဒၟံၚ်ပရေၚ် ချဳဒရာၚ် ထပိုတ်ရိုဟ်ကၞက်သြန်ဆီဍုက်တံရ။

ပရိုၚ်−သြၚ်လောန်တိုၚ်(မ်)

ဗီုဓာတ်−MOI

Leave a Reply

Your email address will not be published. Required fields are marked *