ပ္ဍဲကအ်ကြိက် ဟိုတ်နူလွဟ်ဇၞော်တုဲ ညးဒေသ(၃)တၠ ဇီုကပိုက်ဒးလဝ်ဝပ်

ကအ်ကြိက်၊ ဂျောန်(၁၁)

ပ္ဍဲကွာန်ကမိုၚ်ကုမ် ပွိုၚ်ဍုၚ်ကအ်ကြိက် တိဍာ် KNU ဒပ်မဟာ(၆)ဂှ် ဟိုတ်နူဒပ်ကံၚ်ဇြဳပၞာန် ပန်ဖျေံလွဟ် ဇၞော်တုဲ ကောန်အရာပ်ညးဍုၚ်ကွာန် (၃)တၠ ပါလုပ်သီုညးဗြဴ (၂)တၠ ဒးလဝ်ဘဲဝပ်ရဂှ် ဌာနလလောၚ် ပရိုၚ် ခရိုၚ်ဒူပလာယာ လလောၚ်တြးလဝ်ရ။

ပ္ဍဲဂိတုဂျောန် တုဲကၠုၚ် စၟတ်တ္ၚဲ (၉) အခိၚ်ဗ္တံ (၉)နာဍဳကဝက်ဂှ် နူဒပ်အမၠံက်ကံၚ်ဇြဳပၞာန်လှိုၚ်ဝ ဍုၚ်ကအ် ကြိက် ဟိုတ်နူပန်ဖျေံလဝ် လွဟ်ဇၞော် ပ္ဍဲကွာန်ကမိုၚ်ကုမ် သီုရန်တၟံနွံနွံရဂှ် ဓမံက်လဝ် ပ္ဍဲတၚ်လလောၚ်တြးရ။

ဟိုတ်နူလွဟ်ဇၞော် ဒတုံစှ်ေပါ်ခတိုဟ်လဝ်တုဲ ညးဗြဴ အာယုက် (၄၂)သၞာံ (၁)တၠ၊ ညးဗြဴအာယုက်(၂၉)သၞာံ (၁)တၠ ကေုာံ ညးတြုံ (၁)တၠ အပံၚ်ကောန်ကွာန်ကမိုၚ်ကုမ် (၃)တၠ ဒးလဝ်ဝပ် ကဝေက်မကမ် လွဟ်ဇၞော်ရဂှ် လလောၚ်တြးလဝ်ရ။

ပ္ဍဲပွိုၚ်ဍုၚ်ကအ်ကြိက် တိဍာ် KNU ဒပ်မဟာ (၆)ဂှ် ဟိုတ်နူဒပ်ကံၚ်ဇြဳပၞာန် ပန်ဖျေံဒၟံၚ်လွဟ်ဇၞော် အရိုဟ်ဒဒှ်တ္ၚဲတုဲ ဇၟာပ်ပ်တ္ၚဲ ညးဍုၚ်ကွာန် ကောန်ဒေသတအ် ဒးမံၚ်ဒၟံၚ် သီုစိုတ်ဖေက်ဂၟံက်ရဂှ် တၚ်လလောၚ်တြးဏံ ဟီုသ္ဂးလဝ်ရ။

ပ္ဍဲဂိတုဂျောန် တုဲကၠုၚ် စၟတ်တ္ၚဲ (၇)တေံဂှ် သီုပေါဲဗတိုက်ဟၟဲမွဲသာ် ဟိုတ်နူဒပ်ကံၚ်ဇြဳပၞာန် ပန်ဖျေံလွဟ် ဇၞော် ပ္ဍဲကွာန်ယွာတာန်ယှေ ပွိုၚ်ဍုၚ်ကအ်ကြိက်တုဲ ကောန်ၚာ် (၁)တၠ ဒးချိုတ်လဝ်တုဲ ကောန်အရာပ် (၂)တၠ ဇီုကပိုက်ဒးလဝ်ဘဲဝပ်ရ။

သ္အာၚ်နူဂှ်ပၠန် ပ္ဍဲဂိတုဂျောန် စၟတ်တ္ၚဲ (၆)ဂှ်လေဝ် ဒပ်ကံၚ်ဇြဳပၞာန် ဂြာတ်ထောံဖျေံလဝ်ဗုမ် ပ္ဍဲကွာန်သာန်ဖလာ၊ ပွိုၚ်ဍုၚ်ကအ်ကြိက် ကဵုက္ၜၚ်ကျာတုဲ ဘာဗ္တောန်လိက်ကီု သီုကဵုစမြိုၚ်သ္ၚိဒၟံၚ်လ္ၚဵု ဇီုကပိုက် ဒးလီုလာ် နွံကၠုၚ်လဝ်ရ။

ပရိုၚ်-သြၚ်လောန်တိုၚ်(မ်)

ဗီုရုပ်- ဌာနလလောၚ်ပရိုၚ် ခရိုၚ်ဒူပလလာယာ

Leave a Reply

Your email address will not be published. Required fields are marked *