ကျောက်ဂျဳ၊ ဂျောန်(၁၁)
ပ္ဍဲပွိုၚ်ဍုၚ်ကျောက်ဂျဳ တိဍာ်ဗော်သွးကောန်ဂကူကရေၚ် KNU ဒပ်မဟာ(၃) မ္ၚးနူပေါဲဗတိုက်က္တဵုဒှ်ဒၟံၚ်ဂှ် ဟိုတ်နူဒပ်ကံၚ်ဇြဳပၞာန် ပန်ဖျေံလွဟ်ဇၞော်တုဲ ညးဍုၚ်ကွာန်မွဲဠက်ပြၚ် ထောံသ္ၚိဌာန်တုဲ ဒးဂြိပ်ဒဴပါဲ ဓလေတ်ဒၟံၚ်ရဂှ် ဂွံတီကေတ် နူကဝ်မတဳ ရီုဗၚ်ဟံၚ်ပြာ်ကာတၟေၚ်ကရေၚ် ပွိုၚ်ဍုၚ်ကျောက်ဂျဳရ။
ပ္ဍဲပွိုၚ်ဍုၚ်ကျောက်ဂျဳ တိဍာ် KNU ဒပ်မဟာ (၃) ခရိုၚ်ညံၚ်လေဝ်ပေန်ဂှ် ဒၞာဲဒပ်ကံၚ်ဇြဳပၞာန် ဖျေံလဝ်ဗဒိုပ် (၅)ဒၞာဲ ပါလုပ်သီု ဗဒိုပ်ဗၠာဲသၟိၚ် ဍုၚ်နာတ်တာန်ကွေန် ဂကောံဒပ်ပံၚ်ကောံ ဒပ်ပၞာန်ဗၠးၜးကောန်ဂကူ ကရေၚ် KNLA သၟဝ်တဲဒပ်မဟာ(၃)တအ် လုပ်စိုပ်ဗတိုက်လဝ် ပ္ဍဲဂိတုဂျောန် စၟတ်တ္ၚဲ (၆)တုဲဂှ် ပရေၚ် ပၞာန်ၜါလ္ပာ် ကြံၚ်မ္ၚိုဟ်သ္ကာတ်မြဟ်ကၠုၚ်ဒၟံၚ်ရ။
ကြဴနူပေါဲဗတိုက်ဂှ်တုဲ ပ္ဍဲဂိတုဂျောန် စၟတ်တ္ၚဲ (၉) အခိၚ်ဗ္တံဂှ် ဟိုတ်နူဒပ်ကံၚ်ဇြဳပၞာန် ပန်ဖျေံလဝ်လွဟ်ဇၞော် ပ္ဍဲကွာန်ဗ္ဒာဲနာတ်တာန်ကွေန် အဆက်ဟွံပိုတ်သ္ကုတ်တုဲ ညးဍုၚ်ကွာန် ဒၟံၚ်ကွာန်အုမ်ပေန်သု မွဲတၠကဵု ညးဍုၚ်ကွာန် ဒၟံၚ်ကွာန်ဗောဓိကုမ် မွဲတၠ ဒးလွဟ်တုဲ ဒးချိုတ်လဝ်ရ။

သ္အာၚ်နူဂှ်ပၠန် ပ္ဍဲဂိတုဂျောန် စၟတ်တ္ၚဲ (၈)ဂှ်လေဝ် ဒပ်ကံၚ်ဇြဳပၞာန် လုပ်စိုပ်ကၠုၚ် ပ္ဍဲကွာန်တဝ်ကျောၚ်ပေါက် ကွာန်လ္တူ၊ ကွာန်ဝါပေန်သု သၠုၚ်ကျာဍုၚ်နာတ်တာန်ကွေန်တုဲ စံၚ်ပလီုလဝ် သ္ၚိဒၟံၚ် မၞုံပ္ဍဲကွာန်တအ်ဂှ်ရ။
ဒပ်ကံၚ်ဇြဳပၞာန် စံၚ်ပလီုဒၟံၚ် သ္ၚိဌာန်ညးဍုၚ်ကွာန်တအ်ကီု၊ ပ္တဝ်လဝ်ကဵုကောန်အရာပ်ညးဍုၚ်ကွာန်တုဲ ပန်ဖျေံဒၟံၚ် လွဟ်ဇၞော်ဍောတ် ပ္ဍဲကွာန်ကီု၊ ဂြာတ်ထောံဖျေံဗုမ် ကဵုက္ၜၚ်ကျာကီု ဟိုတ်နူကၠောန် သ္ပကၠုၚ်ဒၟံၚ် ကမၠောန်ပ္ကီုပရာပ် မပ္တံသာ်ဏံတုဲ ညးဍုၚ်ကွာန်တအ် ဒးဒုၚ်ဒၟံၚ်ဘဲဒဏ် သ္ကာတ်တ်မြဟ်ဟ်ရဂှ် ဓမံက်လဝ် ပ္ဍဲတၚ်လလောၚ်တြးရ။
ဟိုတ်နူကမၠောန်ပြဝကံၚ်ဇြဳပၞာန်တုဲ ညးဍုၚ်ကွာန် နူကွာန် (၁၈) ကွာန် လၟိဟ် ၁၀၀၀၀ ပြၚ်တအ် ထောံသ္ၚိ ဌာန်တုဲ ဒးဂြိပ်ဒဴဒၟံၚ် ပ္ဍဲဒၞာဲဗၠးဘဲကီု ဟိုတ်ဒှ်ဒၟံၚ်ရာသဳကသီုဂှ်ရ အခက်ခုဲပြသၞာပရေၚ်ထတ်ယိုတ်၊ ပရေၚ် ဆက်စၠောံဂၠံၚ်ဍာန်၊ ဟိုတ်နူဘဲဒဏ် ဗြဲကျာတုဲ စမြိုၚ်ဂီုကၠီုဟၟဲ၊ ပရေၚ်ဂီုကၠီုစိုတ်ဓာတ်ဟၟဲ ဒးဒုၚ်ဒၟံၚ် ဘဲဒဏ်ရဂှ် ဓမံက်လဝ်ပ္ဍဲတၚ်လလောၚ်တြးရ။

ပ္ဍဲပွိုၚ်ဍုၚ်ကျောက်ဂျဳ တိဍာ်ဒပ်မဟာ (၃) ခရိုၚ်ညံၚ်လေဝ်ပေန် KUN ဟိုတ်နူဒပ်ကံၚ်ဇြဳပၞာန် ချဳဒရာၚ် ဒၟံၚ်ပၞာန် သီုဖံက်ပ္ကဝ်က္လိလောန်ဒၟံၚ် အခေါၚ်အရာမၞိဟ်တုဲ သွက်ညးဒေသ ဒးဂြိပ်ဒဴပါဲဓလေတ် ဒၟံၚ်တအ် ပြဟ်ဟ်ဏံ နွံဒၟံၚ်ပၟိက်ကဵု အရီုဗၚ်ဗ္စာရဏာပရေၚ်မၞိဟ် နဒဒှ်ကာတၟေၚ်ရဂှ် KNU လလောၚ် တြးကဵုလဝ်သမ္တီရ။
ပရိုၚ်- သြၚ်လောန်တိုၚ်(မ်)
ဗီုရုပ်-KNU

