တံဒပ်ကံၚ်ဇြဳပၞာန် ဖျေံသ္ဇိုၚ်ပွိုၚ်ဍုၚ်သဓီု (၂) တံဒပ် ဒးဒုၚ်ဗတိုက်လဝ်

သဓီု၊ ဂျောန်(၁၁)

တွဵုရးဍုၚ်မန် တံဒပ်ကံၚ်ဇြဳပၞာန် ခမရ (၂) ကဵု ဒပ်အမၠံက် စၟတ်(၄၀၂) ဖျေံသ္ဇိုၚ်ပွိုၚ်ဍုၚ်သဓီုတအ်ဂှ် ဒပ်ပံၚ်ကောံ KNLA အာစိုပ်ဗတိုက်လဝ်တုဲ ပရေၚ်ဇီုကပိုက်ချိုတ်ဂျိုၚ် လ္ပာ်ကံၚ်ဇြဳပၞာန် နွံဒၟံၚ်ရဂှ် ညးတာလျိုၚ် KNU ခရိုၚ်သဓီုဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။

တံဒပ်ကံၚ်ဇြဳပၞာန် ဖျေံသ္ဇိုၚ်သဓီု ပန်ဖျေံဒၟံၚ်လွဟ်ဇၞော်ပ္ဍဲကွာန် အရိုဟ်ဒဒှ်တ္ၚဲ (၂) တံဒပ်ဂှ် ပ္ဍဲဂိတုဂျောန် စၟတ်တ္ၚဲ (၇) တုဲကၠုၚ် အခိၚ်နူဂယးဂှ် ဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNU ဒပ်ဗလး တိကဵု ဒပ်ဒရုမ်တအ် ပံၚ်တောဲတုဲ အာစိုပ်ဗတိုက်လဝ်ရ။

ပ္ဍဲပရေၚ်ပန်ဗတိုက်လဝ်ဏံ ကောန်ဒပ်ပၞာန်တိုက်ကံၚ်ဇြဳပၞာန် ခမရ (၂) ဒးလဝ်ဘဲဝပ် (၄)တၠတုဲ ကောန်ဒပ် နူဒပ်အမၠံက် စၟတ်(၄၀၂) ဒးချိုတ်လဝ် (၅)တၠတုဲ သ္ကိုပ်တံဒပ် ပြံၚ်စိုပ်ကၠုၚ်လဝ် အခိၚ်တုဲကၠုၚ် ဟွံလအ်ဏီ ဒးလဝ်ဘဲဝပ်သ္ကာတ်မြဟ်ရဂှ် ဟီုသ္ဂးလဝ်ရ။

ပရေၚ်ပန်ဗတိုက်ဏံဂှ် သ္ကိုပ်တံဒပ် ဒပ်အမၠံက်ကံၚ်ဇြဳပၞာန် စၟတ်(၄၀၂) ပြံၚ်စိုပ်ကၠုၚ်လဝ်တၟိဂှ် ဟိုတ်နူပန် ဖျေံလွဟ်ဇၞော် ပ္ဍဲကွာန်တအ်တုဲ ဒၟာနူကောန်အရာပ်ဂမၠိုၚ် ဇီုကပိုက်ဒးဒၟံၚ်ဘဲဝပ်ဂှ်ရ နဒဒှ်ကလေၚ် ပလန်တဲ ဗတိုက်လဝ်ရဂှ် ညးတာလျိုၚ် KNU ခရိုၚ်သဓီုမွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။

ဟိုတ်နူဒပ်ပံၚ်ကောံ KNLA ဗတိုက်ပန်ပှော်လဝ်တုဲ သ္ကိုပ်တံဒပ် ဒပ်အမၠံက် ဒးလဝ်ဘဲဝပ်သ္ကာတ်မြဟ်ဂှ် ကံၚ်ဇြဳပၞာန် ကၠုၚ်ပ္ဍိုက်ကေတ်ဏာ ကဵုက္ၜၚ်ကျာတုဲ ပလံၚ်ဗစိုပ်လဝ် ရုၚ်ဂဥုဲနေပျဳဒဝ်ရဂှ် ဒပ်ပံၚ်ကောံ တအ် ဟီုသ္ဂးလဝ်ရ။

တံဒပ်ကံၚ်ဇြဳပၞာန် ဖျေံသ္ဇိုၚ် ဒးဒုၚ်ဗတိုက်လဝ်တအ်ဂှ် ပ္ဍဲဂိတုဂျောန် စၟတ်တ္ၚဲ (၉)ဂှ် ထ္ပက်ဒိကဵု ဗူဒိုဝ်ဇြာ တုဲ ပလီုပလာ်လဝ် ဒဒန် ပ္ဍဲလ္တူဂၠံၚ်တုၚ်ဇြုက်-လေကေမွဲတၞုၚ်ရဂှ် ကဝ်မတဳကောပ် ကာဲကေၚ်ကာမိတ် KNU ခရိုၚ်သဓီု ဟီုသ္ဂးလဝ်ရ။

ဟိုတ်နူဒးဒုၚ်ပလီုပလာ်လဝ်ဒဒန်တုဲ ညးဒေသ နူကွာန်လေကေ၊ ဝေန်တာပါန်၊ ပုယျေတ်ခိုဝ်၊ ထုံဖိုဝ်ဂျဳ၊ ထုံဖိုဝ်လေဝ်တအ် သွက်ဂွံအာကၠုၚ် ပ္ဍဲလ္ပာ်ဍုၚ်သဓီု၊ ဍုၚ်သုဝဏ္ဏဝတဳကီု သီုသွက်ဂွံပလံၚ် ဗစိုပ်သွံ ရာန်ဗၞိက် ဒှ်ဒၟံၚ်အခက်ခုဲရဂှ် ဂွံတီကေတ် နူညးဒေသတအ်ရ။

ပ္ဍဲဂိတုမေ တုဲကၠုၚ်တေံဂှ် ဒပ်ကံၚ်ဇြဳပၞာန် ထ္ပက်ဒိကဵုဗေတ်ဟိုဝ်တုဲ ပလီုလဝ် ဂၠံၚ်ဆက်စၠောံ ခရိုၚ်မွဲကဵုမွဲ ကေုာံ ကွာန်မွဲကဵုမွဲ ပ္ဍဲပွိုၚ်ဍုၚ်ၜဳကလေၚ်ကဵု ပွိုၚ်ဍုၚ်ကျာ်ထဝ်ရ။

ပရိုၚ်-သြၚ်လောန်တိုၚ်(မ်)

ဗီုရုပ်-Social Media

Leave a Reply

Your email address will not be published. Required fields are marked *