သေတ်ဒိုဲ၊ ဂျောန် (၁၁)
သွက်တွဵုရးရခေၚ် ဒးလဝ်ဘဲလဗိုတ်ကျာမိုဝ်ခါဂှ် နူကဵုကမ္မတဳပ္ညဳပ္ညပ်သဳကၠဳ ပရေၚ်ဍုၚ်ကွာန်ကၟိန်ဍုၚ် (FPNCC) ကေုာံ အလဵုအသဳတွဵုရး “ဝ” UWSA တံ ကဵုလဝ်ဒါန် မွဲဠက်ကိုဋ်ဒ္ကေဝ်ရောၚ်ဂှ် ERRCA လလောၚ်ပ္တိတ်လဝ်ပရိုၚ်ရ။
သွက်ပရေၚ်ဟံၚ်ပြာ်ရီုဗၚ်ကာတၟေၚ် ကောန်ဍုၚ်ကောန်ကွာန်ရခေၚ်တံဂးတုဲ FPNCC ဂှ် ကဵုလဝ်ဒါန် (၅၀၀၀) ကိုဋ်၊ UWSA ဂှ် (၅၀၀၀) ကိုဋ်ရ။

ဥူကျံက်ကဝ်အာန် မဒှ်သ္ကိုပ်ဌာန၊ ဌာနပရေၚ်ဆက်ဆောံဍုၚ်သ္အာၚ် သီုကဵုဒှ်ဒုဥက္ကဌ UWSA ဂှ် ပအပ် ကဵုလဝ် စၞး UWSA ကဵု FPNCC ပ္ဍဲဍုၚ်ပါန်ခါန်၊ တွဵုရး “ဝ” ဂှ်တုဲ ဥက္ကဌ ERRCA ဒံက်တာညဵု ထောန်အံၚ်ကဵု ဇၞော်သ္ကိုပ် HDCO ဥူထောန်မေန်နာၚ်တံ ဂွံဒုၚ်လဝ်တဲရ။
အခိၚ်လၟုဟ်ဂှ် သွက်တွဵုရးရခေၚ်ဂှ် လ္ပာ်ကံၚ်ဇြဳပၞာန် ဟိုတ်နူကၟာတ်လဒဵုလဝ် အရီုဗၚ်ပရေၚ် ဗ္စာရဏာမၞိဟ် အပ္ဍဲဍုၚ်၊ မ္ၚးဍုၚ်တံဂှ်ရ ဒပ်ပၞာန်ရခေၚ် AA ဂှ် ကၠောန်သ္ပဒၟံၚ်အထံက်အပၚ်ရီုဗၚ် ကုညးဍုၚ်ကွာန်တံရောၚ် မဒှ်ရ။
ဟိုတ်နူကံၚ်ဇြဳပၞာန် ကၟာတ်လဝ်အခေါၚ်အာကၠုၚ်တရဴတံဂှ်တုဲ ညးဒေသဒးဘဲလဗိုတ်ကျာတံဝွံ အကာဲအရာသာပရေံကၠုၚ်မာန်တုဲ လၟေၚ်ကမၠောန် မ္ဒးကဵုဒၟံၚ်အရီုဗၚ်တံသီုဖအိုတ် ဒးဒေါအ်ဒေၚ် အာယျဂှ် ရုၚ်ပ္ညဳပ္ညပ်စပ်ကဵုပရေၚ်ဗ္စာရဏာမၞိဟ် ကုလသမဂ္ဂ UNOCHA လလောၚ်ပ္တိတ်ကၠုၚ် ပ္ဍဲဂိတုဂျောန် (၉) တေံရ။

ဂကောံဇြဟတ်ပၠန်ဂတးမဟာမိတ်ဂမၠိုၚ် KIA, MNDAA, TNLA, NDAA ကေုာံ SSPP တံဂှ် သွက်ညးဍုၚ်ကွာန်ဒးဘဲလဗိုတ်ကျာ တွဵုရးရခေၚ်တံဂှ် ကဵုလဝ်ဒါန် ဇရေၚ်ဒပ်ပၞာန်ရခေၚ် (AA) ရ။
တုဲကၠုၚ် ပ္ဍဲဂိတုမေ (၁၄) တေံ ဟိုတ်နူလဗိုတ်ကျာမိုဝ်ခါ မလုပ်စိုပ်ပိုက်ကၠုၚ် ပ္ဍဲဍုၚ်ဗၟာဂှ်ရ သီုကဵုတွဵုရး ရခေၚ်ကီု ပ္ဍဲကဵုတွဵုရး ကေုာံ ရးဒေသ (၇) တံဂှ် အပံၚ်မၞိဟ် (၄၀၀) ပြၚ် ချိုတ်အာလဝ်တုဲ လၟိဟ်မၞိဟ် ဂၠိုၚ်ကဵုကိုဋ် နွံပၟိက်ဒၟံၚ် အရီုဗၚ်ပရေၚ်ဗ္စာရဏာမၞိဟ်ရောၚ်ဂှ် ထ္မံက်ထ္ၜးလဝ် ပ္ဍဲပရိုၚ်အပ္ဍဲဒေသတံရ။
ပရိုၚ်−သြၚ်လောန်တိုၚ်(မ်)
ဗီုဓာတ်−ERRCA

