သာလေန်ကျဳ၊ ဂျောန် (၁၀)
ပ္ဍဲကဵုပေါဲဗ္တိုက်သီဗ္ဒိုပ် ဗ္ဒိုပ်ဗၠာဲသၟိၚ်ညံၚ်ပေန်ကျဳ ပွိုၚ်ဍုၚ်သာလေန်ကျဳ၊ ရးသက်ကိုၚ်ဂှ် လ္ပာ်ကံၚ်ဇြဳပၞာန် (၁၂) တၠ ချိုတ်တုဲ သီဂိုၚ်ဂွံလဝ် လွဟ်လက်နက် (၇) ဇကိုအ်ရောၚ် ဌာနဝန်ဇၞော်ကာစဵုဒၞါ NUG လလောၚ်ပ္တိတ်လဝ်ပရိုၚ်ရ။
ပ္ဍဲကဵုပေါဲဗ္တိုက်သီဗ္ဒိုပ်ဒတုဲဂှ် လ္ပာ်ကံၚ်ဇြဳပၞာန် ၜိုန်ရကၠောန်သ္ပလဝ် ပရေၚ်ဗ္တိုက်တရဴကျာ နကဵုက္ၜၚ်ကျာ Mi-35 မတိုန်ကၠုၚ် နူကဵု ဂအုပ်ဌာန်ရးပၞာန်ဗာယပ်တံကီုလေဝ် လုပ်စိုပ်ဍိုက်ဗ္တိုက်လဝ် ဗ္ဒိုပ်ဗၠာဲသၟိၚ်ညံၚ် ပေန်ကျဳတုဲ စံၚ်ပလီုပလာ်တုဲ ဆုတ်စ္ဍးမာန်လဝ်ဂှ် သ္ဂးလဝ်ရ။

တုဲကၠုၚ်ပ္ဍဲဂိတုဂျောန် (၉) အခိၚ်ဇိုၚ်သဝ်တ္ၚဲဂှ် ဒပ်ပၞာန်စဵုဒၞါညးဍုၚ်ကွာန် (PDF) နူကဵုပရေၚ်ကောပ်ကာဲ ဒေသပၞာန် စၟတ် (၁) ဂှ်ကဵု တမ်ဒပ်ခရိုၚ်ယေန်မာပေန် (၁) ၊ ဂကောံစဵုဒၞါညးဍုၚ်ကွာန် (သာလေန် ကျဳ−ပကဖ) ကေုာံ Alpha (သာလေန်ကျဳ−ပကဖ) တံ ဗ္တိုက်လဝ်ရ။
ဗ္ဒိုပ်ဗၠာဲသၟိၚ်ညံၚ်ပေန်ကျဳ ဇြဟတ်ၜိုတ် (၄၀) နူကဵုသၟဝ်သ္ကိုပ်သ္က ဂအုပ်ဗၠာဲသၟိၚ် ဇြဝ်ဌေမျေတ် နူကဵုပွိုၚ်ဍုၚ် သာလေန်ကျဳ၊ ခရိုၚ်ယေန်မာပေန်၊ ရးသက်ကိုၚ်ဂှ် ဒပ်ပၞာန်စဵုဒၞါညးဍုၚ်ကွာန်တံ ဗ္တိုက်လဝ် ပေါဲဗ္တိုက် သီဗ္ဒိုပ်ရ။

အပ္ဍဲပေါဲဗ္တိုက်သီဗ္ဒိုပ်ဂှ် လ္ပာ်ကံၚ်ဇြဳပၞာန် (၁၂) တၠ ချိုတ်တုဲ၊ သီဂိုၚ်ဂွံလဝ် MA-13 (၂) ဇကိုအ်၊ G-3 (BA-63) (၄) ဇကိုအ်၊ Shortgun (၁) ဇကိုအ်၊ မကမ် 7.62 ဂှ် (၂၀၄၀) ဇကိုအ်၊ မကမ် 5.56 (၅၀) ဇကိုအ်၊ မဗုမ် M-79/40 MM ဂှ် (၂၉) မ၊ ဗုမ်တဲ (၁၃) မ၊ သြန် (၁၁၄) ကိုဋ်တံတုဲ လ္ပာ်ဒပ်စဵုဒၞါ ညးဍုၚ်ကွာန်တံဂှ် (၁) တၠ ပြဟ်လလုဲတုဲ (၂) တၠ ဇီုကပိုက်ကလိဂွံလဝ်ဝပ်ရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီုဓာတ်−MOD

