ဟိုတ်နူဒးဒုၚ်ကၟာတ်လဒဵုလဝ်အရီုဗၚ်ဂမၠိုၚ်တုဲ ဒေသဒးဘဲလဗိုတ်ကျာတံ ဂွံကလေၚ်ယိုပ်ယာကၠုၚ်ဂှ် သာတုဲခက်ခုဲအာယျ

သေတ်ဒိုဲ၊ ဂျောန် (၁၁)

ကံၚ်ဇြဳပၞာန် ဟိုတ်နူကၟာတ်လဒဵုထောံ အခေါၚ်အာကၠုၚ်တရဴ ကုဂကောံမှာဇန် ကေုာံ ဂကောံဍုၚ်သ္အာၚ် မရီုဗၚ်ကဵုဒၟံၚ် ဇရေၚ်ညးဒေသဒးဘဲလဗိုတ်ကျာတံဂှ်ရ သွက်ဂွံရေၚ်တၠုၚ် လၟေၚ်ကမၠောန်သ္ဂောံ ကလေၚ်ပ္တန်ပ္တူဂမၠိုၚ်ဂှ် သာတုဲခက်ခုဲအာယျဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

စနူဂိတုဂျောန် (၇) တုဲ ဒဒှ်ရကၟာတ်ထောံ အခေါၚ်အာကၠုၚ်တရဴ ကုဂကောံမှာဇန် ကေုာံ ဂကောံဍုၚ် သ္အာၚ်နာနာ မရီုဗၚ်ကဵုဒၟံၚ် ဇရေၚ်ဒေသ မ္ဒးဂဗလဝ်လဗိုတ်ကျာမိုဝ်ခါဂှ် ဝန်ဇၞော်ပရေၚ်ဂီုကၠီု ကေုာံ ကေၚ်ကာပယျဵု သ္ကိုပ်ဗိုလ်ဇၞော်ကျဝ်တူရ မဒှ်ကောန်ဂကောံတွဵုရးရခေၚ်ကံၚ်ဇြဳပၞာန်ဂှ် ထ္ပက်စၟတ်တဲတုဲ ကၟာတ်ထောံလဝ်ရ။

ဟိုတ်နူပရေၚ်ကၟာတ်လဒဵု အခေါၚ်အာကၠုၚ်တရဴကံၚ်ဇြဳပၞာန်တံဂှ်တုဲ ဒေသဒးဘဲလဗိုတ်ကျာဂမၠိုၚ်ဝွံ သာတုဲအကာဲအရာပရေံကၠုၚ်မာန်တုဲ လၟေၚ်ကမၠောန် မကဵုဒၟံၚ်အရီုဗၚ်ဂမၠိုၚ်ဂှ် ဒးဒေါအ်ဒေၚ် အာယျရောၚ် ရုၚ်ပ္ညဳပ္ညပ်စပ်ကဵုပရေၚ်ဗ္စာရဏာမၞိဟ် ကုလသမဂ္ဂ UNOCHA လလောၚ်ပ္တိတ်ကၠုၚ် ပ္ဍဲဂိတုဂျောန် (၉) တေံရ။

ညးဒေသကျံက်ဖျူမွဲတၠဂှ် အခိၚ်ကဵုဒၞါဲမံၚ် ကေုာံ ဇွောံမစၞစ ကုဒေသဒးဘဲလဗိုတ်ကျာတံ ရုမ်မ်ဂပ်ပ် ဟွံမာန်ဂှ် ဒၟါနူပရေၚ်ကၟာတ်လဒဵု အခေါၚ်အာကၠုၚ်တရဴ ကုဂကောံမရီုဗၚ်ကဵုဒၟံၚ်တံဂှ်တုဲ ညးဍုၚ်ကွာန်တံ သာတုဲဇီုကပိုက်ကၠုၚ်မာန်ရောၚ်ဂှ် ဟီုရ။

“ညးဍုၚ်ကွာန်ဒးဘဲလဗိုတ်ကျာတံ ဇီုကပိုက်အာတၟာဂလိုၚ်ဏောၚ် ဟီုဂွံရ။ မူဟိုတ်ရောတှ်ေ ဒဵုကဵုအခိၚ်လၟုဟ်ဂှ် မၞိဟ်ဇီုကပိုက်ဍာံဍာံတံဂှ် ၜိုတ်ဒၞါဲမံၚ်၊ ဇွောံမစၞစတံဓဝ်ရဂှ် ကဵုရုမ်မ်ဂပ်ပ် ဟွံမာန် ဏီပုဟ်။ ကဵုဟွံမာန်ဏီပုဟ်ဟီုဂှ်လေဝ် နူကဵုကၠာတေံရ တၚ်သၞောတ်ဗ္ၜတ်တံဂှ် နွံဒၟံၚ်တၟာဂလိုၚ်ရ။ ဟိုတ်နူတၚ်သၞောတ်ဗ္ၜတ်တံဏံကီုဏောၚ် မဒှ်ရ။ မွဲပၠန်ဂှ် ဗြဲဂှ်ဂူဒၟံၚ်ယျဟီုတှ်ေ ပ္ဍဲကဵုဒၞါဲအာကၠုၚ် ကျာတ်တံ ပ္ဍဲကဵုဒၞါဲမုမှရီုဗၚ်ထံက်ပၚ်ကဵုဟွံဂွံတံဂှ် ဒှ်အခက်အခုဲရ။ ကြဴနူလဗိုတ်ကျာတုဲဂှ် ဗြဲကလေၚ် ဂူဒၟံၚ်ယျဟီုတှ်ေ သွက်မၞိဟ်သ္ဇက်ဂွံမံၚ်ဟွံမွဲတံဂှ် ဒှ်အခက်အခုဲကွေံကွေံဏောၚ်။ ညံၚ်ရဴယ တေအ်ဒံၚ်တံ၊ ပုဏ္ဏာကျောန် ဒၞါဲဇီုကပိုက်အာဂၠိုၚ်ၚ်တံဂှ် မုအရီုဗၚ်မှ ဟွံစိုပ်ဏီပုဟ်။ ပ္ဍဲကဵုဒၞါဲလဗိုတ်ကျာဟွံဒှ်လ္ၚဵုတံဂှ် အခိၚ်ပံက်ဘာဂှ် ပံက်ဘာဟွံမာန်ဏီပုဟ်” သာ်ဝွံ ညးဒေသကျံက်ဖျူမွဲတၠ မဗက်ရီုဗၚ်ကဵုဒမံၚ် ပရေၚ်ဟံၚ်ပြာ်မှာဇန်တံ ဟီုရ။

ကံၚ်ဇြဳပၞာန်ဂှ် မူဟိုတ်ဂွံကၟာတ်လဒဵု အခေါၚ်အာကၠုၚ်တရဴ ဂကောံမှာဇန်ပရေၚ်မၞိဟ် ကေုာံ ဂကောံ ဍုၚ်သ္အာၚ် မရီုဗၚ်ကဵုဒၟံၚ် ဇရေၚ်ညးဒေသဒးဘဲလဗိုတ်ကျာတံရောဟီုဂှ် လလောၚ်ပ္တိတ်လဝ် ဟွံမွဲဏီရ။

ဟိုတ်နူကၟာတ်လဒဵုထောံ အခေါၚ်အာကၠုၚ်တရဴတံဂှ်ရ ကဵုအာအရီုဗၚ် ကုညးဒေသ ဒးဘဲလဗိုတ်ကျာ နူကဵုတွဵုရးချေၚ် သီုကဵုတွဵုရးရခေၚ်တံ ဟွံမာန်ရပုဟ်ဂှ် UNOCHA ဟီုဂးလဝ်ရ။

ဟိုတ်နူဘဲလဗိုတ်ကျာတုဲ အခိၚ်ညးဍုၚ်ကွာန်တံ ဒှ်ဒၟံၚ်ဒဒိုက် ဂကောံမကဵုဒၟံၚ် အရီုဗၚ်တံဂှ် ကၟာတ်ထောံ အခေါၚ်အာကၠုၚ်တရဴတံဂှ်ရ ကၠောန်သ္ပလဝ် ညံၚ်ညးဍုၚ်ကွာန်တံ ဂွံဂိရောၚ် ညးလ္ၚတ်သ္ၚဳဂၠိပ် ပရေၚ် ဍုၚ်ကွာန်ဝှ်ကြံၚ် ဥူဖေတာန် ပါ်ပါဲလဝ်ရ။

“ညအ်ဂှ် အတိုၚ်တီဒၟံၚ်ညးသ္ကအ်ရ ဟိုတ်နူမိုဝ်ခါတုဲ ပ္ဍဲရခေၚ်ဂှ် ဒဵုကဵုၜါစှော်တ္ၚဲပြၚ်ဂှ် ညးဍုၚ်ကွာန်တံ ဒှ်ဒဒိုက် ဟွံစိုပ်သၟဝ်ကၟဳဒဒၚ်အိုတ်ဏီပုဟ်။ ပုၚ်ဗ္ဂါပ်ဂွံမှာန်ဂှ် လ္ၚဵုတံဟွံဂွံစဏီပုဟ်။ အခိၚ်ကံၚ်ဇြဳပၞာန် ကၟာတ်ထောံ အရီုဗၚ်အပ္ဍဲဍုၚ်၊ မ္ၚးဍုၚ်တံ ကၠုၚ်ဟွံဂွံပုဟ်ဂှ် ညးဍုၚ်ကွာန်တံဂှ် စိုတ်ဍောတ် သ္ဂောံညာတ် ဟွံမွဲတုဲ ပွမဒုၚ်ဟွံမာန်နာနာသာ် က္တဵုဒှ်ဒၟံၚ်ရ။ အခိၚ်ဒှ်ဒၟံၚ်ဒဒိုက်အိုတ်ဍာ်ဂှ် အလဵု အလဵုအသဳတာလျိုၚ်နွံ မ္ဒးရီုဗၚ်ကဵုတံဂှ် ကၟာတ်ထောံ အရီုဗၚ်ဍုၚ်သ္အာၚ်တံဂှ်ရ ပြဝကံၚ်ဇြဳပၞာန်ဂှ် ညးဍုၚ်ကွာန်တံ ဒုၚ်ဟွံမာန်ဒှ်ဒၟံၚ်အိုတ်ရ” သာ်ဝွံ ညးဟီုဂးလဝ်ရ။

ကံၚ်ဇြဳပၞာန်ဂှ် ၜိုန်ရဟီုဂးလဝ် စရေၚ်တၠုၚ်ဒၟံၚ် လၟေၚ်ကမၠောန်ကလေၚ်ပ္တန်ပ္တူ ဒေသဒးဘဲလဗိုတ် ကျာတံဂှ်ကီုလေဝ် ဗလးတိဏံဂှ် ကဵုက္ဍိုပ်တုဲ ပလေဝ်ပလေတ်ဒၟံၚ် ရုၚ်နူကဵုဌာနမဆေၚ်စပ်တံ ကေုာံ ဗ္ဒိုပ်ဒပ်၊ တမ်ဒပ်ဍေံတံသၟးရောၚ်ဂှ် ညးဒေသတံ ဟီုဂးကၠုၚ် ညဳညဳသၟဟ်ဟ်အိုတ်ရ။

ဟိုတ်နူလဗိုတ်ကျာမိုဝ်ခါ မလုပ်စိုပ်လဝ် ဍုၚ်ဗၟာ ပ္ဍဲဂိတုမေ (၁၄) တုဲကၠုၚ်တေံဂှ်တုဲ ပ္ဍဲကဵုရးဒေသ ကေုာံ တွဵုရး (၇) ပါလုပ်သီုကဵုတွဵုရးရခေၚ်တံဂှ် အပံၚ်မၞိဟ် (၄၀၀) ပြၚ် ချိုတ်တုဲ လၟိဟ်မၞိဟ်ဂၠိုၚ်ကဵုကိုဋ် နွံပၟိက်ဒၟံၚ် အရီုဗၚ်ပရေၚ်ဗ္စာရဏာမၞိဟ်တံရ။

ပရိုၚ်−သြၚ်လောန်တိုၚ်(မ်)

ဗီုဓာတ်−WFP

Leave a Reply

Your email address will not be published. Required fields are marked *