သဓီု၊ ဂျောန် (၁၁)
အလဵုအသဳညဳသၟဟ်ဂကူဂှ် သၞာံ ၂၀၂၃ ဂှ် စၟတ်လဝ် နဒဒှ်သၞာံမကဵုသ္ဂုတ်သွာတ် ပရေၚ်ပၠန်ဂတးတုဲ အခိၚ်ဂွံကၠုၚ်ကဝက်သၞာံဂှ် ဗီုပြၚ်ပေါဲဗ္တိုက် ဒပ်ကံၚ်ဇြဳပၞာန် အပ္ဍဲဒေသသ္ကုတ်သၠုၚ်ကျာဍုၚ်ဗၟာတံ ပြံၚ်လှာဲကၠုၚ်ဂှ် ဂကောံရပ်လွဟ်အပ္ဍဲဒေသတံ သ္ၚဳဂၠိပ်လဝ်အိုတ်ရ။
ကြဴနူဒပ်ပၞာန်သီအဝဵုတုဲ ဟိုတ်နူပေါဲဗ္တိုက်ထပိုတ်ရိုဟ်ကၞက်သၞောတ်တၠအဝဵုပၞာန် ဂကောံဒပ်ရပ်လွဟ် ကောန် မမံက်ဂတဝ်ကၠုၚ် ဂၠိုၚ်ကဵုကၠံတံဂှ်တုဲ ဒဵုကဵုအခိၚ်လၟုဟ် ဒပ်ကံၚ်ဇြဳပၞာန်ဝွံ ဒးပံက်လဝ်မုက်ပၞာန် ကြပ်အလုံမွဲဍုၚ်ရ။
ဟိုတ်နူပရေၚ်ပၠန်ဂတးဒစဵုဒစး ဂကောံဒပ်စဵုဒၞါဒေသ ကေုာံ ဂကောံဒပ်ရပ်လွဟ် ကောန်ဍုၚ်အရၚ်တံဂှ် တုဲ အပ္ဍဲကာလပၞာန်သီအဝဵုပွိုၚ်ၜါသၞာံဏံ ဗီုပြၚ်က္တဵုဒှ်ပေါဲဗ္တိုက်တံ ပြံၚ်လှာဲကၠုၚ်တုဲ ဒပ်ကံၚ်ဇြဳပၞာန်ဝွံ နူကဵုပၞာန်ထ္ပက်ဂှ် ပြံၚ်လှာဲကၠုၚ် ဗီုပြၚ်ပၞာန်ဒုၚ်ရ။
ပ္ဍဲကဵုတွဵုရးကရေၚ်၊ တွဵုရးမန် ကေုာံ ရးတၞၚ်သဳ မဒှ်ဒေသသ္ကုတ်သၠုၚ်ကျာကၟိန်ဍုၚ်တံဂှ် ဂကောံဒပ် ရပ်လွဟ် ဂကောံဇြဟတ်ပၠန်ဂတးတံ အာစိုပ်ဗ္တိုက်လဝ် မၞိဟ်ကံၚ်ဇြဳပၞာန်တံဂှ် ဂၠိုၚ်ကၠုၚ်တုဲ လ္ပာ်ကံၚ် ဇြဳပၞာန်ဂှ်လေဝ် သုၚ်စောဲလွဟ်ဇၞော် ကေုာံ ဗ္တိုက်တရဴကျာတံ သာရပ်စပ်ကၠုၚ်ဒၟံၚ်ရ။
စပ်ကဵုအကာဲအရာဏံတုဲ ဥက္ကဌ ကမ္မတဳကောပ်ကာဲကေၚ်ကာမိတ်ခရိုၚ် ဗော်သွးကောန်ဂကူကရေၚ် KNU သ္ကိုပ်ဗိုလ်သဝ်ကျဝ်မျေတ်ဂှ် ပြဟ်ဟ်ဏံ နူကဵုဒပ်ကံၚ်ဇြဳပၞာန် ၜိုန်ရထ္ပက်ဒၟံၚ်ကရောၚ်ပၞာန်တံ ဟွံမွဲကီုလေဝ် ပန်ပှော်ဒၟံၚ်လွဟ်ဇၞော် နူကဵုသ္ၚောဲသ္ၚောဲတေံကီု ပရေၚ်ပလေဝ်ပလေတ်ပၞာန်ဒုၚ်တံလေဝ် သာတုဲကၠောန်သ္ပကၠုၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“လ္ပာ်ကံၚ်ဇြဳပၞာန်ဂှ် အခိၚ်လၟုဟ် ထ္ပက်ကရောၚ်ပၞာန်တံ မုတံဂှ် ဟွံမွဲစအှ်ေရ။ ဆ္ဂး ဍေံတံ ထ္ပက်ကရောၚ် ပၞာန်ဟွံမာန်တုဲ နူကဵုသ္ၚောဲသ္ၚောဲတေံဂှ်ရ အရာမပန်ပှော်ဒၟံၚ် နကဵုအမၠံက်လွဟ်ဇၞော်တံ ကြာန်န်ဂှ် ဒှ်ဒၟံၚ်ညံၚ်ကဵုဓမ္မတာယျ။ ပန်ပှော်အပ္ဍဲကွာန်တံဂှ် ဒှ်ဒၟံၚ်ညံၚ်ကဵုလၟိုန်ရဏောၚ်။ လ္ပာ်သ္ကုတ်ပၞာန် ထ္ပက်ဂှ် ပြဟ်ဟ်ဏံ လ္ပာ်ပိုယ်ဏံ ဟွံဂွံဆဵုကေတ်ရုပ်ရဴဏီပုဟ်”သာ်ဝွံ ညးသ္ဂးရ။
အပ္ဍဲခရိုၚ်သဓီု တိဍာ်ထိၚ်ဒဝ် ဗော်သွးကောန်ဂကူကရေၚ် KNU ဂှ် လ္ပာ်ကံၚ်ဇြဳပၞာန် ၜိုန်ရဗ္တိုက်တရဴ ကျာတံ ဟွံမွဲကီုလေဝ် နကဵုက္ၜၚ်ကျာထံၚ်ပရိုၚ်တံဂှ် ပဝ်ယာန်ဒၟံၚ် မွဲဒမြိပ်ဗ္ဒိုပ်မၞုံတံဂှ် နွံဒၟံၚ်ရောၚ် ညးဆက်ဟီုရ။
မွဲလ္ပာ်ပၠန်ဂှ် ပ္ဍဲကဵုတွဵုရးကရေၚ် တိဍာ်အုပ်ဓုပ် KNU ဂှ် လ္ပာ်ကံၚ်ဇြဳပၞာန် ထ္ပက်ကရောၚ်ပၞာန်ဂှ် စဵုကဵုဟွံ မွဲအောန်ကြဳစှ်ေကၠုၚ်တုဲ ဒပ်ပံၚ်ကောံ ဒပ်စဵုဒၞါဒေသ PDF တံကဵု KNLA တံဟေၚ် ဍိုက်ဗ္တိုက်ကၠုၚ် ဗ္ဒိုပ်ဒပ်ဍေံတံဂှ် သာဂၠိုၚ်ကၠုၚ်ရ။
ဒပ်ကံၚ်ဇြဳပၞာန် ထ္ပက်ကရောၚ်ပၞာန်ဗလးတိဟွံမာန်ဏီတံဂှ်ဝွံ ဇၟာပ်ပ်ဗ္ဒိုပ်ဒပ်ဍေံတံ ဒးဒုၚ်ဍိုက်ဗ္တိုက်ဂှ် ကၠောန်ကၠုၚ်ပရေၚ်ပန်ပှော်လွဟ်ဇၞော် ကေုာံ ဗ္တိုက်ဂြာတ်မခတိုဟ် နူကဵုတရဴကျာတံ အဆက်က်ရ။
ညးခါတ်အကာဲပရေၚ်ပၞာန်ဂမၠိုၚ်ဂှ် ဒပ်ကံၚ်ဇြဳပၞာန်ဝွံ ပ္ဍဲကဵုဒၞါဲပၟိက်ဇၞော် သွက်ပရေၚ်ပၞာန်တံဂှ် ဖျေံသ္ဇိုၚ် ဗ္ဒိုပ်ပၞာန်တံဂှ်တုဲ သ္ပပဓာန်ကဵု လွဟ်ဇၞော် ကေုာံ ပရေၚ်ဗ္တိုက်တရဴကျာတံဂၠိုၚ်တုဲ သွက်ဂွံဗ္တိုက်သၠေက် ဂကောံဒပ်ပၠန်ဂတးတံ နကဵုဇြဟတ်လွဟ်လက်နက်သာသာဂှ် ကၠောန်ၜိုတ်ကၠုၚ်ရောၚ် ထံက်ထ္ၜး ဒၟံၚ်အိုတ်ရ။

ပ္ဍဲတွဵုရးဍုၚ်မန်ဂှ် ဇြဟတ်ချဳဒရာၚ် ဂကောံဒပ်စဵုဒၞါဒေသတံခိုဟ်တုဲ ပ္ဍဲကဵုပွိုၚ်ဍုၚ်သဓီု၊ ကျာ်ထဝ်၊ ၜဳကလေၚ် ကေုာံ ပွိုၚ်ဍုၚ်ရေဝ် ဒၞါဲပေါဲဗ္တိုက်ပန်ပှော်တံ က္တဵုဒှ်ဒၟံၚ်အဆက်က်ဂှ် ဒပ်ကံၚ်ဇြဳပၞာန်တံ ပန်ပှောန်ဂစိုတ်ဒၟံၚ် ညးဒေသတံကီု၊ မ္ၚးနူပန်ပှော်လွဟ်ဇၞော် အပ္ဍဲကွာန်တံဂှ် စံၚ်ပလီုပလာ်သ္ၚိဒၟံၚ် တံဂှ်လေဝ် ကၠောန်ဒၟံၚ်အဆက်က်ရ။
အတိုၚ်တၚ်နၚ် လိက်စံၚ်ကံက်ကပှ်လဝ်တၚ်နၚ်မွဲဂှ်မ္ဂး ပ္ဍဲတွဵုရးဍုၚ်မန်ဂှ် အပ္ဍဲဂိတုမေတုဲကၠုၚ်တေံ အကြာဒပ်ကံၚ်ဇြဳပၞာန်ကဵု ဒပ်စဵုဒၞါဒေသတံဂှ် ပေါဲဗ္တိုက်ဆေၚ်မုက် က္တဵုဒှ်လဝ် (၁၀) ဝါဟွံကတုဲ လၟေၚ်ဒဒှ် ရေၚ်ကွဳစက်ကံၚ်ဇြဳပၞာန် ဒးဒုၚ်ကြတ်ဗ္တိုက်ဂှ်လေဝ် က္တဵုဒှ်လဝ်အဆက်က်ရ။
သ္အာၚ်နူဂှ်ပၠန် လ္ပာ်ကံၚ်ဇြဳပၞာန် ဟိုတ်နူပန်ပှော်လဝ် လွဟ်ဇၞော် အပ္ဍဲကွာန်ညးဒေသကောန်အရာပ်တံ မသ္ပဒတဴတံဂှ်တုဲ မ္ၚးနူကောန်အရာပ်ချိုတ် သ္ၚိဌာန်လီုလာ်တံဂှ် ညးဒေသဂၠိုၚ်ကဵုလ္ၚီ ဒးဂြိပ်ဒဴပါဲဒလေတ် ဒၟံၚ် ဒၞါဲဗၠးဘဲတံ နွံဂှ် သ္ဂးရ။
ညးဒုၚ်တာလျိုၚ်လလောၚ်ပရိုၚ် ပကဖ ရးတၞၚ်သဳဂှ်လေဝ် ဒပ်ကံၚ်ဇြဳပၞာန်ဝွံ မ္ၚးနူဇြဟတ်အောန်ကၠုၚ်ဂှ် ပ္ဍဲကဵုမုက်ပၞာန်တေံကီု အပ္ဍဲဂကောံဒပ်တမ်ဒပ်တံဂှ်လေဝ် ဒးဒုၚ်ဗ္တိုက်ဒၟံၚ်ဂှ်ရ ဒှ်ဒၟံၚ်အကာဲအရာ ထ္ပက်က ရောၚ်ပၞာန်ဟွံမာန်ရောၚ်ဂှ် သ္ၚဳဂၠိပ်လဝ်ရ။
“ ဒးဟီု နကဵုရးတၞၚ်သဳမ္ဂး ဂကောံဒပ်ဒမၠုက်ပၞောန်လက္ကရဴဍေံတံ ဗ္ဒိုပ်ဒပ်ဍေံတံရဂှ် ဒးဒုၚ်ဗ္တိုက်ဒၟံၚ်တုဲ မုက်ပၞာန်သၟးရဂှ် ဍေံတံစွံအာရီုဟွံဂွံရတုဲ လ္ပာ်လက္ကရဴဏံဂှ်လေဝ် ဒးပလေဝ်ပလေတ်ကၠုၚ် ဒှ်ကၠုၚ်အကာဲ အရာဏံရ။ ဟိုတ်ဂှ်ရ ဇြဟတ်အောန်ကၠုၚ်ကီု၊ မုက်ပၞာန်တေံသၟးဟွံက သီုကဵုတမ်ဒပ်တံဏံဂှ်လေဝ် ပေါဲဗ္တိုက်တံ အခိၚ်ဟွံရုဲက္တဵုဒှ်ကၠုၚ်မာန်ဂှ်ရ အကာဲအရာထ္ပက်ပၞာန်ဟွံမာန်ဂှ် ဂၠိုၚ်ကၠုၚ်သိုက်က်ရ။ ညအ်ဂှ်လေဝ် ပါလုပ်ဒၟံၚ် နဒဒှ်မွဲကီုဏောၚ်ဂှ် ဟီုဂွံရ” သာ်ဝွံ ညးသ္ဂးရ။
အခိၚ်ကာလလၟုဟ်ဝွံ ဟိုတ်နူဒှ်ရာသဳဗြဲဂှ်ရ နကဵုကံၚ်ဇြဳပၞာန် သွက်ဂွံထ္ပက်ကရောၚ်ပၞာန် နဒဒှ်ပၞာန်ထ္ပက် ဂှ် ဟွံပလေဝ်ပလေတ်လေဝ် ဒှ်မာန်တုဲ ပ္ဍဲကဵုဒေသကရေၚ်ဍာဲ ကေုာံ ရးသက်ကိုၚ်တံဂှ်လေဝ် ဒးပံက် လဝ်မုက်ပၞာန်တံဂှ်ရ ဒးတြးလဝ်ဇြဟတ်ဒပ်ရောၚ်ဂှ် ညးထံက်ထ္ၜးလဝ်ရ။

အပ္ဍဲရးတၞၚ်သဳ ပ္ဍဲဂိတုမေဂှ် ပၞောဝ်ကဵုပေါဲဗ္တိုက် ၃၅ ဝါ၊ ပရေၚ်ဗ္တိုက်ဗ္တိုဟ်မာၚ် ၁၄ ဝါ ကေုာံ ပရေၚ်ဆေၚ်မုက် က္တဵုဒှ်လဝ် စဵုကဵု ၄၉ ဝါဂှ် နူကဵုဂကောံဒပ်စဵုဒၞါဒေသတံ ထ္မံက်လဝ်ပေါဲဗ္တိုက်ဂှ် လၟိဟ်လ္တုန်သာဂၠိုၚ်တုဲ ပ္ဍဲကဵုပရေၚ်ဗ္တိုက်ဆေၚ်မုက် အပံၚ်ဖအိုတ်ဂှ် (၇၀) တၟံကၠံပြၚ် နွံရောၚ်ဂှ် နူကဵုလိက်ကံက်ကပှ်တၚ်နၚ်မွဲ ထ္မံက်ထ္ၜးလဝ်ရ။
ပ္ဍဲကဵုတွဵုရးကရေၚ်၊ ဍုၚ်လှာဒကှ်ဂှ်လေဝ် အပ္ဍဲသတ္တာဟတုဲကၠုၚ်တေံ ဗ္ဒိုပ်ဗၠာဲသၟိၚ်ပွိုၚ်ဍုၚ်၊ တမ်ဒပ် ခလရ (၂၈၄) ကေုာံ ရုၚ်အုပ်ဓုပ်ကာနာနာ၊ ရုၚ်လဝက၊ ရုၚ်ပရေၚ်ဆက်စၠောံ၊ ရုၚ်အကံက်အခေါန် ကေုာံ ရုၚ်နာဲဗ္စာ လ္ပာ်ဒပ်ပၞာန်တံ မဖျေံလဝ်ဒပ်တံဂှ် ပ္ဍဲဂိတုဂျောန် (၂) တေံ ဂကောံဒပ်ပံၚ်ကောံ ရပ်လွဟ်ကရေၚ်တံ လုပ်စိုပ်ဍိုက်ဗ္တိုက်လဝ်မွဲအခိၚ်ဓဝ်ရ။
အပ္ဍဲပရေၚ်ဗ္တိုက်ဏံဂှ် လ္ပာ်ကံၚ်ဇြဳပၞာန် ကောန်ပၞာန် ကေုာံ ကောန်ဒပ်ဗၠာဲသၟိၚ် ဗ္ဒါဲ (၁၀) တၠ ချိုတ်အာလဝ် တုဲ (၁၅) တၠ ဇီုကပိုက်ကလိဂွံလဝ်ဝပ်ရောၚ် ပ္ဍဲဂိတုဂျောန် (၃) တေံ နူကဵုဂကောံဒပ် ပြုပြေၚ်ပၞာန် ဗွဲတၟေၚ် S.O.F တံ လလောၚ်ပ္တိတ်လဝ်ရ။
ညးဒုၚ်တာလျိုၚ်ပရေၚ်ပၞာန် ဂကောံဒပ်စဵုဒၞါဒေသလ္ၚဵုတံဂှ် ဒပ်ကံၚ်ဇြဳပၞာန်ဝွံ စိုပ်ကၠုၚ်ရာသဳတၟးဇးဗက် ပ္ဍဲကဵုဒေသဂကောံပၠန်ဂတး ဇြဟတ်ဍိုန်တံဂှ် ထ္ပက်ကရောၚ်ပၞာန်တုဲ ပ္ဍဲကဵုဒေသ ဂကောံဇြဟတ်ပၠန် ဂတး ဇြဟတ်ခိုဟ်တံဂှ် ပလေဝ်ပလေတ်အာ သွက်ပၞာန်ဒုၚ်မာန်ရောၚ် သ္ၚဳဂၠိပ်ချိၚ်ဆဒၟံၚ်အိုတ်ရ။
ပရိုၚ်−သြၚ်လောန်တိုၚ်(မ်)
ဗီုဓာတ်−Social Media

