ဂျာကာတာ၊ ဂျောန် (၁၁)
ဒဵုပၟတ် အာနက်ကာရာကာတာအိုဝ် နူကဵုဍုၚ်အေန်ဒိုဝ်နဳယှာဂှ်ဝွံ ပ္ဍဲဂိတုဂျောန် (၉) တေံ ဗ္တိုဟ်အာလဝ်တုဲ ဗတေၚ်ဒဵုပၟတ်တံဂှ်ဝွံ စိုပ်အာလဝ် လ္တူမှဲအကး ၃ မဳတာပြၚ်ရောၚ် သၟိၚ်တၠအဝဵုတံ ဟီုဂးလဝ်ရ။
ဒဵုပၟတ် အာနက်ကာတာအိုဝ်ဂှ်ဝွံ ပ္ဍဲကဵုသၞာံ ၁၈၈၃ တေံဂှ်လေဝ် ကေၚ်ဗ္တိုဟ်လဝ်တုဲ က္တဵုဒှ်လဝ် ရံၚ်အာပ္ဍဲ ဝၚ်မ္ဂး ဒှ်လဝ်ပရေၚ်ချိုတ်ဂျိုၚ် ကေုာံ အရာမလီုလာ်တံ ဂၠိုၚ်အိုတ်ရ။
ဒဵုပၟတ် အာနက်ကာရာကာတာအိုဝ်ဂှ် ပံက်အဓိပ္ပာယ်မ္ဂး ကောန်ၚာ်သၟတ် ကာရာကာတာအိုဝ် မဒှ်ရ။
ဟိုတ်နူဒဵုပၟတ်ဗ္တိုဟ်ထ္ကးတုဲ ပ္ဍဲကဵုကလိုဟ်ၜဳ မပိုၚ်ခြာလဝ် တ္ကအ်ဂျာဗာကဵု တ္ကအ်သူမာတြာတံဂှ် ဗတေၚ်ဂြောပ်ဓလီုအာလဝ်ရ။
ကြဴနူပရေၚ်ဗ္တိုဟ် ပ္ဍဲအခိၚ်ဍုၚ်အေန်ဒိုဝ်နဳယှာ ပယျာံဂယး ၈ နာဍဳ ၄၆ မိနေတ်တုဲဂှ် အရာမလီုလာ် ကေုာံ ဇီုကပိုက်ချိုတ်ဂျိုၚ် ဗွဲလစှ်ေတံဂှ် ဟွံဂွံတီကေတ်ဏီရ။
ဟိုတ်နူပရေၚ်ဗ္တိုဟ်ထ္ကးဂှ်တုဲ ဗတေၚ်၊ ယက်ဂမၠိုၚ်ဝွံ နူကဵုက္ဍဟ်ဒဵုဂှ် စိုပ်အာလဝ် စဵုကဵုလ္တူ ၃၀၀၀ မဳတာတုဲ ဗတေၚ်ဒဵုပၟတ် မၞုံသာ်ဗ္စံက်၊ သာ်ယက်တံဂှ်ဝွံ ပ္ဍဲကဵုဗွဲဒိုဟ်နေရတိကၟိန်ဍုၚ်ဂှ် က္တဵုဒှ်ဒၟံၚ်တီုတီုကၠီု ကၠီုရောၚ် သၟိၚ်တၠအဝဵုဂမၠိုၚ် ဟီုဂးလဝ်ရ။
နကဵုညးဍုၚ်ကွာန်ဒေသတံလေဝ် ညံၚ်ဂွိုအ်အာကၠုၚ်ချဳဒရာၚ် အပ္ဍဲပွဳပွူဒဵုပၟတ်ဗ္တိုဟ်ထ္ကးအာလဝ် နူကဵု ၅ ကဳလောမဳတာဂှ် တာဒၞါလဝ်ရ။
ကြဴနူသၞာံ ၂၀၂၂ တုဲဂှ် ပ္ဍဲကဵုတၚ်ကဵုသတိစပ်ကဵုဒဵုပၟတ် သၟိၚ်တၠအဝဵုတံ မလလောၚ်ပ္တိတ်ဒၟံၚ် အဆက်က် ဂမၠိုၚ်ဂှ် အကာဲအရာဒဵုပၟတ် ကာရာကာတာအိုဝ်ဂှ်ဝွံ ဒှ်လဝ်တၚ်ကဵုသတိ ကဆံၚ်သၠုၚ်အိုတ်ဒုတိယရ။
ဍုၚ်အေန်ဒိုဝ်နဳယှာဝွံ ဒှ်ဍုၚ်တ္ကအ်အာယှဒိုဟ်အဂၞဲတုဲ တိကုန် ဒဵုပၟတ်၊ တိချဳတံ လေပ်က္တဵုဒှ်သၠုၚ်အိုတ်တံ နွံတုဲ ပ္ဍဲမွဲဒမြိပ်အေန်ဒိုဝ်နဳယှာဂှ် လၟိဟ်ဒဵုပၟတ်ဒမျိုၚ် နွံဒၟံၚ် စဵုကဵု (၁၃၀) ရောၚ် မဒှ်ရ။
Ref: AFP

