ညံၚ်လေဝ်ပေန်၊ ဂျောန်(၁၃)
ပ္ဍဲတိဍာ်အုပ်ဓုပ် KNU ခရိုၚ်ညံၚ်လေဝ်ပေန် ဒပ်မဟာ(၃)ဂှ် ဒပ်ကံၚ်ဇြဳပၞာန် ပ္တဝ်လဝ်ကဵု ကောန်အရာပ် ညးဍုၚ်ကွာန်တုဲ ဟိုတ်နူပန်ဖျေံလွဟ်ဇၞော် ရပ်ဒက်ပြိုက်ဂစိုတ်လဝ်တုဲ မွဲတ္ၚဲဓဝ် ကောန်အရာပ် ညးဍုၚ်ကွာန် (၄)တၠ ဒးချိုတ်လဝ်ရဂှ် ဗဟဵု KNU လလောၚ်တြးလဝ်ရ။
ပ္ဍဲဂိတုဂျောန် စၟတ်တ္ၚဲ (၉)အခိၚ်ဇိုၚ်သဝ်သဝ်တ္ၚဲ (၃)နာဍဳ ဒပ်ကံၚ်ဇြဳပၞာန် နူဒဵုဇြေန်မ၊ ပွိုၚ်ဍုၚ်ကျောက်ဂျဳ KNU ဂှ် ပန်ဖျေံဏာလွဟ်ဇၞော် ပ္ဍဲကွာန်ပေတူဂှ်ရ ညးဗြဴကောန်ဒေသ (၁)တၠ ဒးလွဟ်မကမ်တုဲ ဒးချိုတ်လဝ်ရဂှ် ဓမံက်လဝ် ပ္ဍဲတၚ်လလောၚ်တြးရ။
သ္အာၚ်နူဂှ်ပၠန် တ္ၚဲဂှ် နူအခိၚ်ဗ္တံ (၇) နာဍဳ စဵုကဵု (၉)နာဍဳကဝက်ဂှ် ဒပ်ကံၚ်ဇြဳပၞာန် ပန်ဖျေံဏာလွဟ်ဇၞော် နူကွေန်ချောၚ်ဝ ပွိုၚ်ဍုၚ်မုမ် KNU ပံၚ်လၟိဟ် (၁၂)မတုဲ လွဟ်ဇၞော်(၄) မဂှ် ဒတုံစှ်ေခတိုဟ်လဝ် ပ္ဍဲကွာန်ယျေတွောန်ကုမ်တုဲ မ္ၚးနူသ္ၚိဒၟံၚ်ညးဒေသ ဇီုကပိုက်ဒးခရိုဟ်လဝ် (၁)မတုဲ မၞိဟ်တြုံ အာယုက် (၃၆)သၞာံ (၁)တၠ လေဝ် ဒးကဝေက်မကမ်တုဲ ဒးချိုတ်အာလဝ်ရဂှ် ဓမံက်ထ္ၜးလဝ်ရ။

ပ္ဍဲတ္ၚဲဂှ်ပၠန် ဒပ်ကံၚ်ဇြဳပၞာန် လုပ်စိုပ်ကၠုၚ် ကွာန်ဝါပေန် ပွိုၚ်ဍုၚ်ကျောက်ဂျဳဂှ် ပန်ဂစိုတ်လဝ် ညးတြုံ ကောန်ဒေသဂှ် (၁)တၠတုဲ ညးဗြဴ (၁)တၠဂှ်လေဝ် သ္ပအနိၚ်အထက် ပလီုပလာ်လဝ်တုဲ ပြိုက်ဂစိုတ်လဝ် ရဂှ် ဂွံတီကေတ် အတိုၚ်ပရိုၚ်ပလံၚ်ဗစိုပ်လဝ် ပ္ဍဲဗလးမုက်တိတုဲ ညးဒေသဒးဒုၚ်ပြိုက်ဂစိုတ်လဝ် (၂)တၠဏံ ဒှ်ညးလဵုရောဂှ် ၜိုန်ရသ္ပဒ္တန်ဟွံမာန်ဏီကီုလေဝ် ဒဒှ်ရညးဒေသတအ် ဟီုသ္ဂးလဝ် ဇွၜါတၠ ဟဳပါစှ်ေကၠုၚ် ပ္ဍဲက္ၜဳသေတ်တောၚ် ဂွံဆဵုညာတ်ကေတ်လဝ်ရဂှ် ဓမံက်လဝ် ပ္ဍဲတၚ်လလောၚ်တြး KNU ရ။
ပ္ဍဲပွိုၚ်ဍုၚ်ကျောက်ဂျဳ KNU ဂှ် ပ္တဝ်လဝ်ကဵုကောန်အရာပ်ညးဍုၚ်ကွာန်တုဲ ဟိုတ်နူဒပ်ကံၚ်ဇြဳပၞာန် ပန်ဖျေံလွဟ်ဇၞော်၊ ဗတိုက်ကဵုက္ၜၚ်ကျာ ကေုာံ ကၠောန်သ္ပဒၟံၚ်ကမၠောန်ပြဝဖံက်ပ္ကဝ်အခေါၚ်အရာမၞိဟ်တုဲ ကောန်အရာပ်ညးဍုၚ်ကွာန် (၁၀,၀၀၀) ပြၚ်တအ်ဂှ် ထောံဌာန်ဒၟံၚ်တုဲ ဒးဂြိပ်ဒဴပါဲဓလေတ်ဒၟံၚ်ရဂှ် ကဝ်မတဳရီုဗၚ်ဟံၚ်ပြာ်ကာတၟေၚ် ကရေၚ် (ပွိုၚ်ဍုၚ်ကျောက်ဂျဳ) လလောၚ်တြးဟီုသ္ဂးလဝ်ရ။

ညးဂြိပ်ဒဴပါဲဓလေတ်ဘဲပၞာန်တအ်ဂှ် ဟိုတ်နူစိုပ်ကၠုၚ်အခိၚ်ကသီုဂှ်ရ ပြသၞာအခက်ခုဲ ပရေၚ်ထတ်ယိုတ်၊ ပရေၚ်ဆက်စၠောံဂၠံၚ်ဍာန်၊ ဟိုတ်နူဘဲဒဏ်ဗြဲကျာတုဲ စမြိုၚ်ဒၞာဲမံၚ် ဟွံဂီုကၠီုကီု ဟိုတ်နူဒပ်ကံၚ်ဇြဳပၞာန် ထ္ပက်ဒၟံၚ်ကရောၚ်ပၞာန်ဂှ်ရ ဒးဆေၚ်ဒၟံၚ်မုက်ကဵု အကာဲအရာစိုတ်ဟွံဂီုကၠီုတုဲ အရီုဗၚ်ဗ္စာရဏာ ပရေၚ်မၞိဟ်တအ်လေဝ် ဆက်နွံဒၟံၚ်ပၟိက်ဏီရဂှ် ဂွံတီကေတ် နူကဝ်မတဳရီုဗၚ်ဟံၚ်ပြာ်ကာတၟေၚ် ကရေၚ် (ပွိုၚ်ဍုၚ်ကျောက်ဂျဳ)ရ။
ပရိုၚ်-သြၚ်လောန်တိုၚ်(မ်)
ဗီုရုပ်-KNU

