ဂေတ်ကွာန်တုဲ ဒပ်ကံၚ်ဇြဳပၞာန် ဗက်စံၚ်ပလီုပလာ်ဒၟံၚ်

တယိတ်ချံၚ်၊ ဂျောန် (၁၃)

ဒပ်ကံၚ်ဇြဳပၞာန် မထ္ပက်ကၠုၚ်ကရောၚ်ပၞာန် အပ္ဍဲပွိုၚ်ဍုၚ်တယိတ်ချံၚ် ရးဒေသဇၞော်တၞၚ်သဳဂှ်ဝွံ ဂေတ် ကွာန်တုဲ ဗက်ကၠောန်သ္ပ စံၚ်ပလီုပလာ်ဒၟံၚ်တုဲ သီုကဵုပန်ဂစိုတ်ဏာလဝ် ညးသၟတ်ပါဲဒဴ ဘဲပၞာန်မွဲတၠ ရောၚ်ဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ကရောၚ်ပၞာန်ကံၚ်ဇြဳပၞာန် ဇြဟတ်ဒပ် ၜိုတ် (၁၀၀) ပြၚ်ပါဂှ်ဝွံ စနူဂိတုဂျောန် (၉) တုဲကၠုၚ်တေံတုဲ ပန်ပှော်လဝ် လွဟ်ဇၞော် အပ္ဍဲကွာန်နာတ်သုက် ကေုာံ ကွာန်ကနက်သဳရိ ပွိုၚ်ဍုၚ်တယိတ်ချံၚ်တံဂှ်တုဲ ကရောၚ်ပၞာန်လုပ်စိုပ်ကၠုၚ်လဝ်ရ။

ဗွဲကြဴဂှ် ဒပ်ကံၚ်ဇြဳပၞာန်ဝွံ ရပ်ဒက်လဝ် ညးဒေသ နူကဵုကွာန် (၂) ကွာန် ဗ္ဒါဲ (၄၀) တၠ နဒဒှ်ဇွောံစဵုဒၞါပၞာန်တုဲ စံၚ်ပလီုပလာ်လဝ် ကွာန်ကနက်သဳရိဂှ်ရ။

ဂေတ်ကွာန်တုဲ ဒပ်ကံၚ်ဇြဳပၞာန် ဗက်စံၚ်ပလီုပလာ်ဒၟံၚ်

ဒပ်ကံၚ်ဇြဳပၞာန် မစံၚ်ပလီုပလာ်လဝ် ကွာန်ကနက်သဳရိဂှ်ဝွံ ပ္ဍဲဂိတုဂျောန် (၁၁) အခိၚ်ဗ္တံဂှ် လုပ်စိုပ်ကၠုၚ် ပ္ဍဲကွာန်ယၚေဝ်တုဲ ပန်ဂစိုတ်ဏာလဝ် ကိုဝ်ဝေယာန်ဟုၚ် ကောန်ကွာန်ယၚေဝ် အာယုက် ၂၃ သၞာံ ညးသၟတ်ပါဲဒဴဘဲပၞာန် မကၠုၚ်ကေတ်ဂဥုဲဇဗ သွက်မိယာဲ ပ္ဍဲသ္ၚိဒၟံၚ်ဂှ်ရ။

ကရောၚ်ပၞာန်ကံၚ်ဇြဳပၞာန်ဝွံ ပ္ဍဲဂိတုဂျောန် ၁၂ အခိၚ်နူဂယးဂှ် စံၚ်ပလီုပလာ်လဝ် ကွာန်ယၚေဝ်တုဲ အကာဲအရာသ္ၚိတူ ဗွဲလစှ်ေ ဂှ် ဟွံဂွံတီကေတ်ဏီပုဟ်ဂှ် ညးဒေသမွဲတၠ သ္ဂးရ။

ဒပ်ကံၚ်ဇြဳပၞာန် ဂေတ်ကွာန်တုဲ ထ္ပက်ဒၟံၚ်ကရောၚ်ပၞာန် ပ္ဍဲကွာန်ဂမၠိုၚ် နူကဵုပွိုၚ်ဍုၚ်တယိတ်ချံၚ်ဂှ်ရ ညးဒေသ ၜိုတ် ၄၀၀၀ နူကဵုကွာန် ၇ ကွာန် ပါလုပ်သီုကဵုကွာန်ယၚေဝ်၊ ကနက်သဳရိ၊ ဝါယျေတ်၊ ဒုၚ်ကုန်တံ ဒးဂြိပ်ဒဴပါဲဒလေတ်ဒၟံၚ်ရောၚ် ဂွံတီကေတ်ရ။

ပ္ဍဲရးဒေသဇၞော်တၞၚ်သဳဂှ် အပ္ဍဲဂိတုမေ တုဲကၠုၚ်တေံ မ္ၚးနူပေါဲဗ္တိုက်တံဂှ် ဟိုတ်နူပရေၚ်ပန်ပှော်လွဟ်ဇၞော် ဒပ်ကံၚ်ဇြဳပၞာန်တံတုဲ ညးဒေသ ၃၄၀၀၀ ပြၚ် ဒးဂြိပ်ဒဴပါဲဒလေတ်ဒၟံၚ်ရောၚ် ဂကောံသုတေသန အပ္ဍဲဒေသတံ လလောၚ်ပ္တိတ်လဝ်ရ။

ပရိုၚ်−သြၚ်လောန်တိုၚ်(မ်)

ဗီုဓာတ်−CJ

Leave a Reply

Your email address will not be published. Required fields are marked *