လွိုၚ်ကဝ်၊ ဂျောန်(၁၃)
ဟိုတ်နူထပိုတ်(၄)ထပိုတ်ကံၚ်ဇြဳပၞာန်တုဲ ပ္ဍဲဗ္ဒပ်ပါဲဒဴဘဲပၞာန် ဖျေံသဇိုၚ်တွဵုရးကရေၚ်ဍာဲကဵု ဒေသကွာန် ရးတံဂှ် မၞိဟ်ဗြဴမၞုံကဵုဒၟုၚ်ဒၠေၚ်ကေုာံ ကောန်ၚာ်သၟတ်အယဲကဵုဂိတုတံ ပရေၚ်ချိုတ်ဂျိုၚ်ဂၠိုၚ်ကၠုၚ်မံၚ်ဂှ် ဂွံတီကေတ် နူဂကောံမၞိဟ်ဗြဴပ္ဍဲဒေသတံရ။
ပ္ဍဲတွဵုရးကရေၚ်ဍာဲ ပေါဲဗ္တိုက်သ္ကာတ်မြဟ်မံၚ်ဂှ် ဟိုတ်နူထပိုတ်ပန်ထပိုတ်ဒပ်ကံၚ်ဇြဳပၞာန်တုဲ မၞိဟ်ဗြဴမၞုံ ကဵုဒၟုၚ်ဒၠေၚ်တံ ဂိတုတ္ၚဲဟွံစိုပ်မွဲသာ် ပွမသၠးကၠုၚ်ဂဝ်ဂၞဴတံ က္တဵုဒှ်ကၠုၚ်မွဲဏှမွဲဏှတုဲ ပွကောန်ၚာ်ချိုတ် တံနွံမံၚ်တုဲ လၟေၚ်ဒဒှ် သီုကောန်ၚာ်သီုမိဒးချိုတ်အာတံလေဝ်နွံမံၚ်ရ။
အတိုၚ်တၚ်နၚ် ဂကောံညးဗြဴကယျာန် KyWO ကံက်ကပှ်လဝ်ဂှ်မ္ဂး နူသၞာံ၂၀၂၃ အခိၚ်ပြဟ်ဟ်တေံ စဵုကဵုဂိတုဨပရဴဂှ် ပ္ဍဲတွဵုရးကရေၚ်ဍာဲ လၟေၚ်ဒဒှ်ဂဝ်ဂၞဴလီုစှ်ေကဵု အခိၚ်သၠးဂဝ်ဂၞဴ ဒးချိုတ်သီုကောန် သီုယာဲတံ နွံကၠုၚ်လဝ်ဟွံအောန်နူကဵု(၅)ဝါဂှ် ထ္မံက်ထ္ၜးလဝ်ရ။

မၞိဟ်ဗြဴမၞုံကဵုဒၟုၚ်ဒၠေၚ်တံကဵု ကောန်ၚာ်သၟတ်တံဂှ် မ္ၚးနူထပိုတ်ပန်ထပိုတ်ကံၚ်ဇြဳပၞာန်ဂှ် ဟိုတ်နူပြဿနာ ဂဥုဲဇဗဟွံရုမ်ဂမ်တုဲ ဒးချိုတ်ကၠုၚ်ဂၠိုၚ်အိုတ်ရဂှ် ကောန်ဂကောံညး ရေၚ်တၠုၚ်ကေၚ်ကာဗဟဵု ဂကောံညးဗြဴကယျာန်(KyWO) ခရေဿတေန်ဂှ် ဟီုကဵုဌာန်ပရိုၚ်သြၚ်လောန်တိုၚ်မ်ရ။
“အခိၚ်လၟုဟ်ဂှ် ကၠောန်မံၚ်နကဵုဗီုပြၚ်ထပိုတ်ပန်ထပိုတ်ရ။ ဂဥုဲဇဗတံတှ်ေ ပဵုပရေံရ။ မၞိဟ်သွံတံဂှ်လေဝ် အခေါၚ်သွံဗွဲမလုပ်သၞောဝ်ဟွံမွဲပုဟ်။ အေဗီုတံဏံ တုဲပၠန် ဗ္ဒမ်ကဵုဂဥုဲညးဍုၚ်ကွာန်တံသုၚ်စောဲမံၚ်တံ၊ ဘာဗ္တောန်လိက်တံဂှ် ဟိုတ်နူဒှ်မံၚ်အကာဲအရာ ဒးဒုၚ်ဗ္တိုက်ဂြာတ်မံၚ်မခတိုဟ်တံဂှ်ရ သွက်မၞိဟ်ဗြဴ ဒးကရေက်သၠးကေတ်တံဂှ် ဒှ်မံၚ်အကာဲအရာပိုဲတံဒးဂွိၚ်မံၚ်ကွေံကွေံရ။ မိယာဲပက္ကတိတံဂှ်လေဝ် ဣမိဂွံသၠးကဵုတံဟွံမွဲပုဟ်။ ဟိုတ်နူဒှ်ဒၟံၚ်အကာဲအရာ ပွမၚ်မွဲပရေၚ်ထတ်ယုက်က္ဍဟွံစိုပ်တံဂှ်ရ လၟုဟ်ဂှ် အသိၚ်မၞိဟ်ဗြဴဒးချိုတ်တံ၊ ဂဝ်ဂၞဴလီုတံ ဂၠိုၚ်ကၠုၚ်ရဒှ်” သာ်ဝွံသ္ဂးရ။
မၞိဟ်ဗြဴမၞုံကဵုဒၟုၚ်ဒၠေၚ်တံဂှ် ဟိုတ်နူလွဟ်ဇၞော်ကေုာံ ပွဗတိုက်တရဴကျာကံၚ်ဇြဳပၞာန်တံဂှ်တုဲ သၠးဂဝ်ဂၞဴတုဲ ဒးချိုတ်အာလွာဲဂှ်တံနွံမံၚ်တုဲ ကောန်ၚာ်သၠးပ္တိတ်နၚ်တံဂှ်လေဝ် ဇိုၚ်တဲအဝဲအၚ်္ဂဟွံဍိုက်ပေၚ်တံ သၠးပ္တိတ်နၚ်ကောန်ၚာ်လမျီုဟွံပါတံလေဝ် က္တဵုဒှ်မံၚ်ရဂှ် လလောၚ်ပ္တိတ်လဝ်ရ။

ဟိုတ်နူပွဗ္တိုဟ်ထ္ကး ဇြဟတ်သ္ကာတ် လွဟ်လက်နက်ဇၞော်ကေုာံ ပ္ဍဲလၟေၚ်ဒဒှ် ဂြာတ်မခတိုဟ် ကဵုက္ၜၚ်ကျာတံဂှ်တုဲ မၞိဟ်ဗြဴမၞုံကဵုဒၟုၚ်ဒၠေၚ်တံ ဟိုတ်နူဂွိၚ်ဂွါဲဖေက်လကိုတ်တုဲ ဇီုကပိုက်ဒးလ္ပာ်စိုတ်ဂှ်ရ ကောန်ၚာ်ပ္ဍဲဂဝ်ဂၞဴတေံ ပရေၚ်ချဳဒရာၚ်ဟွံမွဲရဂှ် သ္ဂးလဝ်ရ။
ဒပ်ကံၚ်ဇြဳပၞာန်ဂှ် ပ္ဍဲတွဵုရးကရေၚ်ဍာဲဂှ် မ္ၚးနူ ရုၚ်ဂဥုဲ၊ ဗ္ဒမ်ကဵုဂဥုဲဂှ် သီုကဵုဘာဗ္တောန်လိက်တံဂှ်လေဝ် ဟိုတ်နူဗတိုက်ဂြာတ်မံၚ်မခတိုဟ်နကဵုတရဴကျာဂှ်ရ ညးဍုၚ်ကွာန်တံ သွက်ပရေၚ်မၚ်မွဲပရေၚ် ထတ်ယုက်ကေုာံ သွက်ဂွံလေပ်ပညာဂှ် ဒးဆေၚ်မံၚ်မုက် ကုအကာဲအရာပရေံအိုတ်တံရ။
လၟေၚ်ဒဒှ်တ္ၚဲ ဟိုတ်နူဒးဒုၚ်စသိုၚ်မံၚ် ကုပွဝးပ္ကဝ်အခေါၚ်အရာမၞိဟ် ကေုာံ ပွပကီုပရာပ် ဒပ်ကံၚ်ဇြဳပၞာန် သီအဝဵုတံဂှ်ရ မၞိဟ်တြုံနူတွဵုရးကရေၚ်ဍာဲတံ ဗွဲမဂၠိုၚ် ဟိုတ်နူလုပ်မံၚ်ပေါဲဗ္တိုက် နကဵုလွဟ်လက်နက် မဂွံမဂြဲကေတ်တံဂှ်ရ မၞိဟ်ဗြဴတံဂှ် ပြဿနာပရေၚ်ထတ်ယုက်၊ ပရေၚ်စသုၚ်မံၚ်စံၚ်၊ ပရေၚ်ဂီုကၠီုသီု ဖအိုတ်တံဂှ် ဒှ်ကၠုၚ်အကာဲအရာ ဒးဆေၚ်မုက်ဒးပသောၚ်မံၚ် နအလဵုဇကုဇကုတံအိုတ်ရ။
ပရိုၚ်- သြၚ်လောန်တိုၚ်မ်
ဗီု- CJ

