ပျုၚ်ယာန်၊ ဂျောန် (၁၃)
ပ္ဍဲကဵုလိက်သဝဏ်ကေန်ဂျုၚ်အာန် က္ဍိုပ်သ္ကိုပ်ကိုဝ်ရဳယျာသၟဝ်ကျာ သွက်စၟတ်သမ္တီတ္ၚဲကောန်ဂကူ ဍုၚ်ရုယှာဂှ် အပ္ဍဲပေါဲပၞာန်ယူကရုၚ်ဂှ် ဒဒှ်ရထံက်ဂလာန် ကုသမ္မတရုယှာဗလာဒဳမာပူတေန်ဂှ် ဟီုဂးလဝ်တုဲ ညံၚ်ပရေၚ်ပံၚ်တောဲရေၚ်တၠုၚ် မစှ်ေကဵုမဟာဗျူဟာတံ ဂွံအံၚ်ဇၞးဂှ် နကဵုညး ဒဒှ်ရဆန္ဒမၞုံဂှ် ဟီုပ္တိတ်ကၠုၚ်လဝ်ရ။
ကေန်ဂျုၚ်အာန်ဝွံ ညံၚ်ရဴလိက် မပလံၚ်ဗစိုပ်လဝ် ဇရေၚ်ပူတေန်ကၠာတေံကီုရ ဒဒှ်ရထိုၚ်သးတဴ တၚ်သ္ဂုတ်သွာတ် ကေုာံ တၚ်စၞောန်ထ္ၜး သမ္မတရုယှာဂှ် ချူစုတ်လဝ်ကီုရ။
ပရေၚ်ရုန်ဂ္စါန် ညးဍုၚ်ကွာန်ရုယှာ သွက်ဂွံတာဒၞါ ပွဘပဠ ကေုာံ တၚ်ကော်ဆဴ မသ္ကာတ်မြဟ် ဂကောံဇြဟတ် ဂၠါဲဒၟံၚ်သၞကုရုယှာတံဂှ် အခိၚ်လၟုဟ်ဝွံ စိုပ်ဒၟံၚ်ကဆံၚ်တၟိ မကဵုသ္ဂုတ်သွာတ် ကုပရေၚ်ဂီုကၠီု ကေုာံ ကုဘဝၜိုဟ်လလမ်တံယျဏောၚ်ဂှ်လေဝ် ပ္တိုန်စရာဲချူဇန်လဝ်ရ။

ပ္ဍဲကဵုလိက် အေဂျေန်ဇြဳပရိုၚ် ကၟိန်ဍုၚ်ပိုၚ် KCNA ဂှ် ကေမ်ဝွံ “ ဗဗွဲဓဝ် ဂွံဂွံဇၞးဂှ် ချိုတ်ပၠိုတ်ဒၟံၚ်တုဲ ညးဍုၚ်ကွာန်ရုယှာတံဝွံ ဝၚ်ပေါဲအံၚ်ဇၞးဏံဂှ် ဆက်ကေတ်အာစရာဲ နဒဒှ်အခိုက်ကၞာပြဝေဏဳညးတံ တၟေၚ်ၚ်တၟဟ်ဟ်မွဲရောၚ်” ဂှ် ထံက်ထ္ၜးလဝ်ရ။
နကဵုကိုဝ်ရဳယျာသၟဝ်ကျာ ဒစဵုဒစး ကုပွသၟာသၠဲတိ မသ္ပမာန်ဍဵုဍိုက်တံဂှ်တုဲ သွက်အခေါၚ် အဝဵုအပိုၚ် အခြာကၟိန်ဍုၚ်၊ သွက်ပရေၚ်တောတက်ဖောအ်ဗြေဝ် ကေုာံ သွက်ဂွံမၚ်မွဲထိၚ်ဒက် ဒတုဲဖဵုဂမၠိုၚ်၊ သွက်ဂွံထ္မံက်ရုပ်ရဴ တၚ်ရန်တၟံမပြဲပြဲ ပ္ဍဲအရာပ္တိတ်ဇြဟတ်တံဂှ်လေဝ် ထံက်ဂလာန်ကု ညးဍုၚ်ကွာန် ရုယှာတံ ပေၚ်ၚ်တုဲ သၠဲပ္တိုန်လဝ် ပရေၚ်ညဳသၟဟ်ကောံကလောံတံရောၚ် ထ္မံက်ထ္ၜးလဝ် ပ္ဍဲလိက်သဝဏ်ဂှ်ရ။

တုဲပၠန် ဒဒှ်ရဆန္ဒမၞုံ မိက်ဂွံပ္တိတ်ဇြဟတ် သွက်ပရေၚ်ပံၚ်တောဲရေၚ်တၠုၚ် မစှ်ေကဵုဗျူဟာ အကြာ ရုယှာကဵု ကိုဝ်ရဳယျာသၟဝ်ကျာတံဂှ်လေဝ် ဟီုဂးလဝ်ရ။
နူစရုယှာ စလုပ်ၜက်ၜေတ် ယူကရုၚ်တုဲဂှ် ပျုၚ်ယာန်ဝွံ ဒဒှ်ရထံက်ဂလာန် ကုမဝ်သကိုဝ် ဗွဲမဗိုန်ဗတ်ဂှ် ထ္ၜးပျးလဝ်တုဲ ကိယျေပ် ကေုာံ ဍုၚ်ပလိုတ်ဂမၠိုၚ်ဝွံ ဂ္စါန်ဒၟံၚ် ညံၚ်အဝဵုအပိုၚ်အခြာရုယှာ ဂွံလီုလာ်အာဏောၚ် သာ်ဝွံ စောတ်စောဲလဝ်ရ။
ပ္ဍဲကဵုလက္ကရဴ ပရေၚ်ကၟိုန်ဍာ် သရိုဟ်စှ်ေအာ ခြာဟွံလအ်ဏံဂှ် အလဵုအသဳယူကရုၚ်ဝွံ ဒဒှ်ရနွံလဝ် လက္ကရဴပရေၚ်ဖံက်ဗ္တိုဟ် မသ္ကဵုဇီုကပိုက်တဴ မၞိဟ်ဂၠိုၚ်ကဵုလ္ၚီ မၞုံရေၚ်ၜဳဒဳနဳပါတံရောၚ်ဂှ် စောတ်စောဲ ချူတြးလဝ်ရ။
Ref: laprensalatina

