လံၚ်လုၚ်၊ ဂျောန် (၁၄)
ပ္ဍဲဂိတုဂျောန် (၁၃) အခိၚ်နူဂယးဂှ် ဒပ်ကံၚ်ဇြဳပၞာန် လုပ်စိုပ်ဍိုက်ဗ္တိုက် ရပ်ဒက်ဏာလဝ် ညးဒေသ (၈) တၠ ဒၟံၚ်ကွာန်တဗျာ ကေုာံ ကွာန်အေန်သံက်၊ ပွိုၚ်ဍုၚ်လံၚ်လုၚ်၊ ရးဒေသဇၞော်တၞၚ်သဳတံ နကဵုဇြဟတ် ဒပ်ဗွဲမဂၠိုၚ်ဂၠေၚ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဒပ်ကံၚ်ဇြဳပၞာန် ဇြဟတ်ဒပ် (၂၀) ပြၚ်ပါဂှ်ဝွံ ပ္ဍဲကဵုတ္ၚဲဂှ် အခိၚ်နူဂယး ၜိုတ် (၁၀) နာဍဳဂှ် လုပ်စိုပ်ဍိုက် ဗ္တိုက်လဝ် ဆေၚ်စသုၚ်မွဲဆေၚ် မၞုံကွာန်တဗျာ ဂၠံၚ်လုပ်ဍုၚ်လံၚ်လုၚ်ဂှ် နကဵုဇြဟတ်ဒပ်ဗွဲမဂၠိုၚ်ဂၠေၚ်ရ။
ဒပ်ကံၚ်ဇြဳပၞာန် မလုပ်စိုပ်ဍိုက်ဗ္တိုက်လဝ် ဆေၚ်စသုၚ်ကွာန်တဗျာဂှ်ဝွံ ရပ်ဒက်ကော်ဏာလဝ် မၞိဟ်တြုံ ၄ တၠ၊ မၞိဟ်ဗြဴ ၂ တၠ ပါလုပ်သီုကဵုတၠဆေၚ်ဂှ်ရောၚ် မဒှ်ရ။

ညးမဒးဒုၚ်ရပ်ဒက်ဂမၠိုၚ်ဝွံ ကိုဝ်တေဇြာကျဝ်၊ ကိုဝ်အဳကျာကွေ၊ ကိုဝ်ဌေအံၚ်၊ ကိုဝ်တိုဝ်၊ မတေန်န်၊ မမဳမုၚ် အာယုက်မၞုံအကြာ ၂၀ ကဵု ၃၀ တံဂှ်ရ။
အခိၚ်မရပ်ဒက်ဏာ ညးဒေသတံဂှ် ဒပ်ကံၚ်ဇြဳပၞာန်ဝွံ ကေတ်ဏာလဝ် သီုကဵုကွဳလိုန်ဓာတ် ကိုဝ်တေ ဇြာကျဝ်တံ မဍိုက်ကၠုၚ် (၂) ဖ္ဍိုက်ဂှ်တုဲ မၞိဟ်မရပ်ဒက်ဏာတံဂှ် ကော်ဏာလဝ် ဗ္ဒိုပ်ဗၠာဲသၟိၚ် ၝောံဍုၚ်လံၚ်လုၚ်ရောၚ် ဂွံတီကေတ်ရ။
ကြဴနူကော်ဏာ ညးဒေသ ၆ တၠတုဲဂှ် ဒပ်ကံၚ်ဇြဳပၞာန်ဝွံ ထပ်ရပ်ဒက်ဏာလဝ် ညးဒေသ (၂) တၠ နူကဵုကွာန်အေန်သံက်ဂှ်တုဲ မူဟိုတ်ဂွံရပ်ဒက်လဝ် ညးတံသီုဖအိုတ်ရောဟီုဂှ် ဟွံဂွံတီကေတ်ဏီရ။

အတိုၚ်ဂလာန်ညးဒေသတံဂှ်မ္ဂး ညးမဒးဒုၚ်ရပ်ဒက်ဂမၠိုၚ်ဝွံ ဒှ်ညးဍုၚ်ကွာန်ဓမ္မတာတံရတုဲ ဆက်စပ်ဒၟံၚ်ကဵု ဂကောံပၠန်ဂတးတံ ဟွံမွဲပုဟ်ဂှ် သ္ဂးရ။
ပ္ဍဲရးတၞၚ်သဳဂှ် တုဲကၠုၚ်အပ္ဍဲဂိတုမေတေံ ဒပ်ကံၚ်ဇြဳပၞာန်ဝွံ ရပ်ဒက်လဝ် ညးဒေသ (၄၀၀) ပြၚ်တုဲ ပ္ဍဲကဵုဏံ ကောန်အရာပ် (၃) တၠဂှ်ဝွံ ကြဴနူဒးဒုၚ်ရပ်ဒက်တုဲဂှ် ချိုတ်အာလဝ် ပ္ဍဲဒၞါဲဍေံစၟဳစၟတ်ဂှ်ရောၚ် ဂွံတီကေတ် အတိုၚ်တၚ်လလောၚ်တြး ဂကောသုတေသနတံရ။
ပရိုၚ်−သြၚ်လောန်တိုၚ်(မ်)
ဗီုဓာတ်−CJ

