ဆေၚ်ထဝ်ပ္ဍဲရေဝ် ​ဒးဒုၚ်ပၠံၚ်ၜးလဝ်တုဲ ပါအာ ဗ္ဒာဲ (၈၀၀) ကိုတ်

ရေဝ် – ဂျောန်(၁၄)

တွဵုရးဍုၚ်မန်၊ ပွိုၚ်ဍုၚ်ရေဝ် ပ္ဍဲဆေၚ်ထဝ် အရာပ်ယာန်ဂျဳအောၚ်ဂှ် ဂဗုတ်ပၠံၚ်ၜး က္တဵုဒှ်လဝ်တုဲ သြန်ပါအာ ဗ္ဒာဲ (၈၀၀)ကိုတ်ဒ္ကေဝ်ရဂှ် တၠဆေၚ်ထဝ်တအ် ဟီုကဵုဌာန်ပရိုၚ်သြၚ်လောန်တိုၚ်(မ်)ရ။

ပရေၚ်ဒဒှ်ဂှ် တ္ၚဲဏံ ဂိတုဂျောန် စၟတ်တ္ၚဲ(၁၃) အခိၚ်နူဂယး ၜိုတ်(၈)နာဍဳ မၞိဟ်တြုံ နူလ္တူကွဳစက်မွဲတၠဂှ် လုပ်စိုပ်ပၠံၚ်ၜးကေတ်လဝ် ပ္ဍဲဆေၚ်ထဝ် မၞုံယၟုၚိုဲလဝန် ပံၚ်လဝ်ဖျာထဝ်ဂှ်ရ။

“ကွဳစက်မွဲဖ္ဍိုက်ဂှ် နွံဒၟံၚ် နူကဵုနူဂယးပြဟ်တေံရ၊ အခိၚ်ဂှ် ပၟတ်လေဝ်ပၠိုတ်ဒၟံၚ်၊ တ္ၚဲလေဝ်ဂၠုဒၟံၚ် စှ်ေကၠုၚ်နူကွဳစက်တုဲ ပၠံၚ်ၜးကေတ်ဏာ ပ္ဍဲဆေၚ် နွံမံၚ်ပါၚ်ဂၠံၚ်ဖျာဂှ် ထိုၚ် နွံဒၟံၚ်(၃)ထိုၚ် ပါအာမွဲထိုၚ်၊ ပါအာကိုတ် (၇၀၀) ပြၚ် ဗ္ဒာဲ (၈၀၀)” ရဂှ် တၠဆေၚ်ထဝ်မွဲတၠ ဟီုသ္ဂးလဝ်ရ။

ပရေၚ်ဒဒှ် ဒးဒုၚ်ပၠံၚ်ၜး သြန်ကိုတ်ကဵုကၠံ ဗီုလၟုဟ်ဏံ ၜိုန်ရဟွံကေၚ်က္တဵုဒှ်မွဲလှ်ေကီုလေဝ် ဇၟာပ်ပ်ဗ္တံ ဒးဒုၚ်ဆေၚ်ဒၟံၚ်မုက်ကဵု ပရေၚ်ပၠံၚ်ၜးကွဳလိုန်ဓာတ် နွံဒၟံၚ်ရဂှ် ညးဟီုသ္ဂးလဝ်ရ။

နူကၠာဒပ်ပၞာန်ဟွံဂွံသီအဝဵုဏီ ပွိုၚ်ဍုၚ်ရေဝ် ညိၚ်ဝတ်ၜိုဟ်သြိုဟ်ဒၟံၚ်ဂှ် ကြဴနူပရေၚ်သီအဝဵုတုဲ သ္ကုတ်လကြဴဏံ ညးပရေၚ်စသုၚ်မံၚ်စံၚ် ကြေပ်ဂြတ်တအ်၊ ညးထံက်ဂလာန်ကဵု ကံၚ်ဇြဳပၞာန်တအ် သ္ပမာန်ဍဵုဍိုက်ညးဍုၚ်ကွာန်တုဲ ကၠောန်သ္ပကၠုၚ် ပရေၚ်ပၠံၚ်ၜး ကပေါတ်ကညောတ်ရ။

“လ္တူဍုၚ်လေဝ် ဒးဆဵုဂဗဒၟံၚ်ကဵု ပရေၚ်ကၠတ်ဂၠံက်ပၠံၚ်ၜးဏီတှ်ေ ပ္ဍဲရးပၠန် ဂကောံရပ်လွဟ် ဂကောံပၠန်ဂတးဟွံသေၚ် မုမုဂကောံဟွံတီ အကံက်ခေါန်ညံၚ်ညံၚ် မုညံၚ်ညံၚ်ကံက် ကေတ်ဒၟံၚ် ဒးဆဵုဂဗဒၟံၚ်ရ။ ကြဴနူပရေၚ်အုပ်ဓုပ်ပၞာန်တုဲ သာတုဲ ညံၚ်ကဵုပရေံကၠုၚ်ဒၟံၚ်ရ” ဂှ် ညးဒေသ မံၚ်တန်တဴဒၟံၚ် ရေဝ်သၟဝ်ကျာမွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။

သ္အာၚ်နူဂှ်ပၠန် ဒပ်ကံၚ်ဇြဳပၞာန်ဂှ် ဟိုတ်နူကၠောန်သ္ပ ပန်ဖျေံဒၟံၚ်လွဟ်ဇၞော် ပ္ဍဲကွာန်ဒၞာဲကောန်ညးဍုၚ်ကွာန်တအ်မံၚ်တန်တဴဒၟံၚ်တုဲ ညးဍုၚ်ကွာန်ဂမၠိုၚ် ဒးဆဵုဂဗဒၟံၚ်ကဵု တၚ်ခက်ခုဲရ။

ဂဗုတ်ပၠံၚ်ၜး က္တဵုဒှ်လဝ်တုဲ အခိၚ်ဒေါဝ်တ္ၚဲဂှ် ဒပ်ဗၠာဲသၟိၚ် သၟဝ်တဲကံၚ်ဇြဳပၞာန်၊ သ္ကိုပ်ပရေၚ်အုပ်ဓုပ်နာနာ၊ သ္ဇိုၚ်ဝန်သာယျာဍိုပ်ဍဴတအ် ဗက်ဂၠာဲစၟဳစၟတ်ဒၟံၚ် ပ္ဍဲဆေၚ်နွံအကြာဍုၚ်တအ်ရဂှ် ဂွံတီကေတ်ရ။

ပရိုၚ်-သြၚ်လောန်တိုၚ်(မ်)

ဗီုရုပ် – CJ

Leave a Reply

Your email address will not be published. Required fields are marked *