လွိုၚ်ကဝ် – ဂျောန်(၁၄)
စပ်ကဵုဒက်ပ္တန်လဝ် ကံၚ်ဇြဳပရေၚ်အုပ်ဓုပ်ကာလအကြာကရေၚ်ဍာဲ ပ္ဍဲကာလပၠန်ဂတး ဗွဲမကိတ်ညဳကဵု အကာဲအရာတုဲ ဂကောံမဟာမိတ်ကောဒေံ(၃)ဂကောံ ကေုာံ ကံၚ်ဇြဳဖေတ်ဒရေဝ်ပအိုဝ် မဒှ်ဂကောံ ဇြဟတ်ပၠန်ဂတးတအ် လလောၚ်တြးကၠုၚ်လဝ်ရ။
ကံၚ်ဇြဳပရေၚ်အုပ်ဓုပ်ကာလအကြာဂှ် ဒက်ပ္တန်လဝ် အတိုၚ်ပရေၚ်က္ဍိုက်က္ဍိုပ်ပရေၚ်ဍုၚ်ကွာန် ကံၚ်ဇြဳကဵုကသပ်တွဵုရးကရေၚ်ဍာဲ ကေုာံ အတိုၚ်တၚ်စၞောန်မူဝါဒလၟေၚ်ဂၠံၚ်တရဴတုဲ ပ္ဍဲကံၚ်ဇြဳဂှ် ဌာနဆေၚ်စပ်ကဵုတွဵုရး အောန်အိုတ် (၁၂)ဌာန စွံပ္တန်အာရောၚ်တုဲ သွက်ကၟိန်ဍုၚ်ပံၚ်ကောံဖေတ်ဒရေဝ် ဂွံမံက်ဂတဝ်ကၠုၚ်ဂှ် ပံၚ်တောဲကဵုဂကောံဇြဟတ် မၞုံအလုံမွဲကၟိန်ဍုၚ် ပါလုပ်သီု CRPH၊ NUCC ကေုာံ NUG ရောၚ်ဂှ် ဂွံတီကေတ်ရ။
သွက်ဂွံဓမံက်အာရုပ်ရဴ ပရေၚ်အုပ်ဓုပ်အလဵုအသဳကာလအကြာ ပ္ဍဲတွဵုရးကရေၚ်ဍာဲ မွဲတန်ဂှ် ပ္ဍဲဂိတုဂျောန် စၟတ်တ္ၚဲ (၆) တုဲကၠုၚ်တေံ စဒက်ပ္တန်ကၠုၚ် ကံၚ်ဇြဳပရေၚ်အုပ်ဓုပ်ကာလအကြာရ။

နကဵုကောန်ဂကူကရေၚ်ဍာဲတအ် ရေၚ်တၠုၚ်ကဵုလဝ် သွက်ဂကူဇကု၊ ကံၚ်ဇြဳဇကု၊ ဂကောံဇကု ဍိုက်က်ပေၚ်ၚ်တုဲ ညံၚ်ဂွံဓမံက်အာရုပ်ရဴ ပရေၚ်ပၞာန် ပရေၚ်ဍုၚ်ကွာန် စၟဳပတှ်ေလဝ် ဗွဲမပြဟ်မာန် ရာဒနာမိက်ကဵုဏာရဂှ် ဓမံက်လဝ် ပ္ဍဲတၚ်လလောၚ်တြးမဟာမိတ်ကောဒေံ (၃)ဂကောံဂှ်ရ။
သ္အာၚ်နူဂှ်ပၠန် တွဵုရးကရေၚ်ဍာဲဂှ် ပံၚ်တောဲကဵု ယူနေတ်ဖေတ်ဒရေဝ်တၞဟ်တအ်တုဲ ပံၚ်တောဲကဵုဂကောံဇြဟတ်ဂစာန်ပ္တိတ်ဒၟံၚ်ဇြဟတ် သွက်ဂွံဒက်ပ္တန်အာကၟိန်ဍုၚ်ပံၚ်ကောံဖေတ်ဒရေဝ် မၞုံအလုံမွဲကၟိန်ဍုၚ်အလုံသီုဖအိုတ်တုဲ သွက်ပရေၚ်ပြံၚ်သၠာဲအကာဲအရာကၟိန်ဍုၚ် က္တဵုဒှ်လီုလာ်ဒၟံၚ် အခိၚ်တ္ၚဲဏံသီုဖအိုတ် ညံၚ်ဒှ်ကၠုၚ်ပရေၚ်ပြံၚ်သၠာဲမွဲတန် ကံၚ်ဇြဳပရေၚ်အုပ်ဓုပ်ကာလအကြာကရေၚ်ဍာဲ ရေၚ်တၠုၚ်ကၠောန်အာရောၚ် တၚ်လလောၚ်တြးဟီုလဝ်ဂှ် ဒုၚ်ဒၟံၚ်တၠုၚ်ဇြိုဟ်ဇြိုဟ်နက်က်တုဲ ကံၚ်ဇြဳဖေတ်ဒရေဝ်ပအိုဝ်ကီု သီုကဵုညးဍုၚ်ကွာန်ပအိုတ်တအ် ပံၚ်တောဲရေၚ်တၠုၚ်အာမွဲစွံရောၚ်ဂှ် ဓမံက်ထ္ၜးလဝ် ပ္ဍဲတၚ်လလောၚ်တြး PNFC ရ။
ပ္ဍဲကံၚ်ဇြဳပရေၚ်အုပ်ဓုပ်ကာလအကြာဂှ် နဒဒှ်ဉက္ကဋ္ဌ ခူဥူယျေဝ်၊ နဒဒှ် ဒုဥက္ကဋ္ဌ ခွောန်ဗဳထူ၊ ညးအုပ်ကာနာနာ ခူပလုယျေဝ်၊ ညးအုပ်ကာ (၁) ဇြူပဒုမ္မာ၊ ညးအုပ်ကာ(၂) ဗညာခွောန်အောၚ် ကေုာံ နဒဒှ်သ္ကိုပ်ဘဏ္ဍာ မဝ်ဖိုဝ်မျာတအ် ကေတ်လဝ်တာလျိုၚ်ရဂှ် ဂွံတီကေတ်ရ။

ကံၚ်ဇြဳပရေၚ်အုပ်ဓုပ်တွဵုရးကရေၚ်ဍာဲ ကာလအကြာ (IEC)ဂှ် ဓမံက်အာရုပ်ရဴ ပရေၚ်အုပ်ဓုပန် နဒဒှ်အလဵုအသဳတွဵုရး ကာလအကြာ နကဵုပရေၚ်ပံၚ်ကောံအာက္ဍိုပ်ရောၚ်ကီု ကဏ္ဍပရေၚ်ချူခၞံသၞောဝ်၊ ပရေၚ်အုပ်ဓုပ်၊ ပရေၚ်စဳရေၚ်သၞောဝ်ဓဝ်တအ် ထိၚ်ပ္ညဳအာရေၚ်သ္ကအ်တုဲ ပ္တိတ်အာဇြဟတ် သွက်ပရေၚ်ညိၚ်ဝတ်ၜိုဟ်လလံတွဵုရးရောၚ်ဂှ် ဂွံတီကေတ်ရ။
သမ္မတအလဵုအသဳပရေၚ်ညဳသၟဟ်ကောန်ဂကူ ဒူဝါလယှဳလလေဝ် ဒက်ပ္တန်ကၠုၚ် ကံၚ်ဇြဳပရေၚ်အုပ်ဓုပ်တွဵုရးကရေၚ်ဍာဲ မာန်ကၠုၚ်လဝ်ဏံ ဒှ်အထံက်အရီု သွက်ပရေၚ်ဒက်ပ္တန်ဖေတ်ဒရေဝ်ဒဳမဝ်ကရေဇြဳအနာဂတ်ရောၚ်ဂှ် ဟီုသ္ဂးလဝ်ရ။
ပရိုၚ်-သြၚ်လောန်တိုၚ်(မ်)
ဗီုရုပ် – PNFC၊AA

