တၞၚ်သြဳ၊ ဂျောန်(၁၄)
ရးဒေသဇၞော်တၞၚ်သြဳ၊ ပွိုၚ်ဍုၚ်တၞၚ်သြဳ၊ ပ္ဍဲဗ္ဒာဲကွာန်ကျွဲထုၚ်ဂှ် ဒပ်ကံၚ်ဇြဳပၞာန်ပြံၚ်သၠာဲဒပ်တုဲ အခိၚ်ပေၚ်က္လေၚ်စဴကၠုၚ်ဂှ် ဒးဒုၚ်ကြတ်ဗတိုက်လဝ်တုဲ ကောန်ဒပ်ကံၚ်ဇြဳပၞာန် ဒးချိုတ်လဝ် (၁)တၠ ဒးလဝ်ဘဲဝပ် (၆) တၠရဂှ် ဒပ်ဒမၠုက်ဗေတ်မလိုက် (ဘက်မလိုက်ပျောက်ကျား) ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
တံဒပ်ပၞာန်တိုက်ကံၚ်ဇြဳပၞာန် ခလရ (၁၀၁) ဇြဟတ်နွံ (၄၀)ပြၚ် ပြံၚ်သၠာဲဒပ်တုဲ အခိၚ်ကလေၚ်စဴကၠုၚ် နူကွာန်သိန္နောဂှ် ဒပ်ပံၚ်ကောံ ဒပ်စဵုဒၞာဒေသတအ် ပံၚ်တောဲ ကြတ်ဗတိုက်လဝ်တုဲဂှ် အဃောကလေၚ် ဆုတ်တိတ်ဂှ် ထပ်ဒးဒုၚ်တံၚ်ခတိုဟ်လဝ်မာၚ်ရ။
ဟိုတ်နူပရေၚ်ဗတိုက်ပန်ဏံတုဲ မွဲတ္ၚဲဓဝ်ပေါဲဗတိုက်က္တဵုဒှ်လဝ် ၜါဝါတုဲ လ္ပာ်ဒပ်ကံၚ်ဇြဳပၞာန် ပန်ပှော်လဝ် လွဟ်ဇၞော် ဟွံအောန်နူ (၂၀)ဝါ ကြာန်ကြာန်ရဂှ် ညးတာလျိုၚ်လလောၚ်ပရိုၚ် ဒပ်ဒမၠုက်ဗေတ်မလိုက် ဟီုသ္ဂးလဝ်ရ။
ကြဴနူပေါဲဗတိုက်တုဲဂှ် ဒပ်ကံၚ်ဇြဳပၞာန် ယိုက်ကေတ်ဏာ ညးဇီုကပိုက် ဒးလဝ်ဘဲဝပ်တအ်ဂှ်တုဲ လုပ်အာ ပ္ဍဲတံဒပ်ပၞာန်တိုက်ကံၚ်ဇြဳပၞာန် ခလရ (၅၆၁) ဖျေံသ္ဇိုၚ်ညံၚ်ပေန်ကွေန်တုဲ စဵုကဵုဂိတုဂျောန် စၟတ်တ္ၚဲ (၁၃) အခိၚ်သဝ်တ္ၚဲဏံ ဟွံဂွံကလေၚ်တိတ်ကၠုၚ်ဏီရဂှ် ဂွံတီကေတ် နူဂကောံဇြဟတ်ပၠန်ဂတးတအ်ရ။
ပရေၚ်ချဳဒရာၚ်ပၞာန်ဂှ် ဒပ်ဒမၠုက်ဗေတ်မလိုက်၊ ပကဖတၞၚ်သြဳ၊ SWDF ကေုာံ ဒပ်ပံၚ်ကောံမဟာမိတ် တံဒပ်(၂) ခရိုၚ်ဗိက် ဂကောံဇြဟတ်ပၠန်ဂတးတအ် ပံၚ်တောဲဗတိုက်လဝ်ရ။
ပ္ဍဲရးဒေသတၞၚ်သြဳဂှ်မ္ဂး ဂိတုမေ တုဲကၠုၚ်တေံ အကြာဒပ်ကံၚ်ဇြဳပၞာန်ကဵု ဂကောံဇြဟတ်ပၠန်ဂတးတအ် ပေါဲဗတိုက် (၃၅)ဝါ က္တဵုဒှ်လဝ်တုဲ ပရေၚ်ဒဒှ်တံၚ်ခတိုဟ်မာၚ် က္တဵဒှ်လဝ် (၁၄)ဝါ နွံကၠုၚ်လဝ်ရ။
ဆ္ဂးပ္ဍဲရးဒေတၞၚ်သြဳ ပ္ဍဲမွဲကာလသီအဝဵု ပွိုၚ် (၂)သၞာံဏံ ဗီုပြၚ်ပေါဲဗတိုက်က္တဵုဒှ် ပြံၚ်သၠာဲကၠုၚ်ဒၟံၚ်တုဲ ဒပ်ပၠန်ဂတးတအ် စထ္ပက်ကၠုၚ်ပၞာန်တုဲ လ္ပာ်ကံၚ်ဇြဳပၞာန် ပြံၚ်သၠာဲကၠုၚ်ဗီုပြၚ်ပၞာန်ဒုၚ်ရဂှ် ဂွံတီကေတ် အတိုၚ်တၚ်လလောၚ်တြး ဂကောံသုတေသန ပ္ဍဲဒေသဂှ်မွဲဂကောံရ။
ပရိုၚ်-သြၚ်လောန်တိုၚ်(မ်)
ဗီုရုပ်-ဒပ်ဒမၠုက်ဗေတ်မလိုက်

