ကောန်ဒပ် KIA (၂) တၠ လုပ်စိုပ်ဖျေံလွဟ် ဇရေၚ်ကံၚ်ဇြဳပၞာန်ဂှ်ဝွံ တြးဝါဒသ္ပကေတ်ရောၚ်ဂှ် KIA ခၠေဝ်ပလန်

တနာၚ်၊ ဂျောန် (၁၄)

ကံၚ်ဇြဳပၞာန် အစောံစရာဲပရေၚ်စန်ဒက် ပ္ဍဲပရေၚ်ပၞာန်ကဵု ပရေၚ်အုပ်ဓုပ် မသဝ်စှ်ေကၠုၚ်တံဂှ် ကောန်ဒပ်ပၞာန်ဗၠးၜးကချေၚ် မၞုံအပ္ဍဲတွဵုရးကချေၚ်တံ (၂) တၠ လုပ်စိုပ်ကၠုၚ်လဝ် အပ္ဍဲဗွိုၚ်သၞောဝ် နကဵုလွဟ်လက်နက်မကမ်တံရောၚ် ပ္ဍဲဂိတုဂျောန် (၁၂) တေံ လလောၚ်ပ္တိတ်လဝ်ပရိုၚ်ရ။

အတိုၚ်ကံၚ်ဇြဳပၞာန်တံ ထ္မံက်ထ္ၜးလဝ်ဂှ်မ္ဂး ကောန်ဒပ်ပၞာန်ဗၠးၜးကချေၚ် ၜါတၠ မလုပ်စိုပ်ကၠုၚ်လဝ် အပ္ဍဲဗွိုၚ်သၞောဝ်တံဂှ် ကလေၚ်ဒုၚ်တဲ ပ္ဍဲၝောံခန်တမ်ဒပ်တိဍာ် မၞုံဍုၚ်မျေတ်ကျဳနာတံဂှ်တုဲ ကလေၚ်လှဲပြံၚ်ပအပ်ကဵုလဝ် ဇရေၚ်မိမ ညးမၚ်မွဲတံရောၚ်ဂှ် သ္ဂးရ။

ကောန်ဒပ်ပၞာန်ပၠန်ဂတးကချေၚ် (KIA) ၜါတၠ နူကဵုအပ္ဍဲဍုၚ်တနာၚ် မလုပ်စိုပ်ကၠုၚ် အပ္ဍဲဗွိုၚ်သၞောဝ်ဂှ်ဝွံ သေနာတ် KA-25 (၂) ဇကိုအ်၊ ဖျေဲလွဟ် (၂) ၊ မကမ် (၅၀) ဒကောၚ် ကေုာံ ဗမ်တဲ (၂) မ မပါကၠုၚ်ကရောံညးတံဂှ် ပအပ်ကဵုလဝ် ဇရေၚ်ညးတာလျိုၚ်တံရောၚ် ကံၚ်ဇြဳပၞာန် လလောၚ်ပ္တိတ်လဝ်ရ။

ကောန်ဒပ် KIA ၜါတၠ မကလေၚ်လုပ်စိုပ်ကၠုၚ် အပ္ဍဲဗွိုၚ်သၞောဝ် သီုကဵုလွဟ်လက်နက်မကမ်တံဂှ် နဒဒှ်လာပ်သကာတုဲ လ္ပာ်ကံၚ်ဇြဳပၞာန် ပအပ်ကဵုလဝ် သြန်ဒ္ကေဝ် ၁၀၆ ကိုဋ်ရောၚ် သ္ဂးရ။

ညးဒုၚ်တာလျိုၚ် လလောၚ်ပရိုၚ် ဂကောံဗၠးၜးကချေၚ် (KIO/KIA) သ္ကိုပ်ပၞာန်ဇၞော်နဝ်ဗူဂှ် သ္ဇိုၚ်ဝန်ညးတံ လုပ်စိုပ်အာ ဇရေၚ်ကံၚ်ဇြဳပၞာန် နကဵုလွဟ်လက်နက်မကမ်တံ ဟွံမွဲတုဲ လၟေၚ်ဒဒှ်ဏံဝွံ ဒှ်ဆသ္ပကေတ်တြးဝါဒမွဲရောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“ညးယိုက်ဝန်ပိုယ်တံ လုပ်စိုပ်အာပ္ဍဲဍေံတံ နကဵုလွဟ်လက်နက်မကမ်ဟွံလုပ်သၞောဝ်တံဟီုဂှ် ဟွံမွဲပုဟ်။ လ္ပာ်ဍေံတံ ရပ်ဒက်ဂှ်နွံ။ ရပ်ဒက်အကြာဂၠံၚ်တံဂှ် နွံရ။ ဆ္ဂး လုပ်စိုပ်အာ နကဵုလွဟ်လက်နကမ် ကမ်တံရောၚ်ဟီုဂှ် ပ္ဍဲကဵုပိုယ်တံဏံ ဟွံမွဲပုဟ်။ ဟိုတ်ဂှ်ရ နူကဵုမွဲမွဲဒၞါဲ ဗ္ဂပ်လဝ်လွဟ်လက်နက်တံမုတံတုဲ နကဵုဗီုပြၚ်ပရိုၚ်လဝ်ဗဳတံဂှ် ကလေၚ်တက်ပ္တိုန်ဒၟံၚ်ဗီုဓာတ်တံ ဒှ်မာန်ဏောၚ်။ မိက်ဂွံသ္ဂးဂှ်တှ်ေ ဒှ်ပရိုၚ်လဝ်ဗဳဏောၚ်၊ သၞာဲဒဴပိုယ်တံ လုပ်စိုပ်အာ နကဵုလွဟ်လက်နက်မကမ်တံ ဟွံမွဲပုဟ်ဂှ် မိက်ဂွံဟီုရ” သာ်ဝွံ ညးသ္ဂးရ။

ဂကောံပၠန်ဂတးကချေၚ် (KIO/KIA) ဂှ်ဝွံ ပ္ဍဲကဵုဂကောံရပ်လွဟ်ကောန်ဍုၚ်အရၚ်တံဂှ် ဒှ်ဂကောံ ရပ်လွဟ်ဇြဟတ်ခိုဟ်မွဲတုဲ ပ္ဍဲကဵုပေါဲဗ္တိုက်ထပိုတ်ရိုဟ်ကၞက် သၞောတ်တၠအဝဵုပၞာန်ဂှ်လေဝ် ပါလုပ်ဒၟံၚ် ဂံၚ်ၚ်သ္ကာသ္ကာအိုတ်ရ။

ကံၚ်ဇြဳပၞာန်ဝွံ ကြဴနူဒပ်ပၞာန်သီအဝဵုတုဲ ပ္ဍဲကဵုမုက်ပၞာန် မ္ဒးဆေၚ်ဒၟံၚ်မုက် ကုဂကောံဒပ်ရပ်လွဟ် ကောန်ဍုၚ်အရၚ် (EAOs) တံကီု သီုကဵုဂကောံဒပ်စဵုဒၞါညးဍုၚ်ကွာန် (PDF) တံဂှ် ကရောံဇြဟတ် ဒပ်လေၚ်ဒိုက်တံဂှ် ကောန်ပၞာန်သ္ပဇြဳဒဳအာမ်တံလေဝ် နွံဒၟံၚ်ဂၠိုၚ်ကဵုကၠံရ။

အကာဲအရာသာ်ဏံဂှ် နကဵုဂကောံဒပ်စဵုဒၞါညးဍုၚ်ကွာန် (PDF) တံ ယဝ်ရလုပ်စိုပ်ကၠုၚ် အပ္ဍဲဗွိုၚ် သၞောဝ်မ္ဂး ဖျေံအာလာပ်ဗဇဴ အောန်အိုတ် နူကဵုၜါကိုဋ်ဒ္ကေဝ် စဵုကဵု ၇၅ ကိုဋ်ဒ္ကေဝ်ရောၚ် တုဲကၠုၚ်ပ္ဍဲဂိတုမေ (၉) တေံ ကံၚ်ဇြဳပၞာန် လလောၚ်တြးလဝ်ရ။

သ္အာၚ်နူဂှ်ပၠန် နကဵုညးမလုပ်စိုပ်ကၠုၚ် နကဵုလွဟ်လက်နက်မကမ်တံဂှ် ယဝ်ရဒှ်မၞိဟ်ကလိလောန် လဝ်ဒုဟ်ဒဏ်မွဲမွဲ မသ္ကဵုဇီုကပိုက်တဴ ညးသ္အာၚ်၊ အမှုဂစိုတ်မၞိဟ်၊ အမှုပလီုကောန်သမ္ဘာတံဂှ်မ္ဂး ဒးဆေၚ်မုက်သောၚ်ကလးအာ ပ္ဍဲရုၚ်သၞောဝ်ဓဝ်ရောၚ်ဂှ် သ္ဂးရ။

ပ္ဍဲအရာဆေၚ်မုက်သောၚ်ကလးဂဗုတ်သာ်ဏံဂှ်လေဝ် ကံၚ်ဇြဳပၞာန်ဂှ် တန်တဴကဵုလ္တူဒုဟ်ဒဏ်တုဲ ကၠောန်သ္ပအာ ပရေၚ်ဖအောန်ဖျေံ အရာမနွံပၟိက် လ္ဂောံကဵုသၞောဝ်တံရောၚ်တုဲ ပရေၚ်ရီုဗၚ်ထံက်ပၚ် မၞုံပၟိက်တံဂှ်လေဝ် ရေၚ်တၠုၚ်ကဵုအာဏောၚ် လလောၚ်ပ္တိတ်လဝ်ရ။

ညးခါတ်အကာဲပရေၚ်ဍုၚ်ကွာန်တံဂှ် နကဵုကံၚ်ဇြဳပၞာန် ပ္တိတ်လာပ်သကာတုဲ စန်ဒက် ညံၚ် PDF တံ ဂွံလုပ်စိုပ်အပ္ဍဲဗွိုၚ်သၞောဝ်ဂှ်ဝွံ ဒှ်သဘဴဗ္တိုက်အာလ္ပာ်စိုတ်ဓာတ် အကြာဂကောံဇြဟတ်ပၠန်ဂတးတံ ရောၚ်ဂှ် ထံက်ထ္ၜးလဝ်အိုတ်ရ။

ပ္ဍဲကဵုထလဳဂရာမ်ချာန်နေဝ် မထံက်ဂလာန်ဒပ်ပၞာန်တံဂှ် မၞိဟ်မလုပ်စိုပ်ကၠုၚ်အပ္ဍဲဗွိုၚ်သၞောဝ် သၞာံဏံ စဵုကဵုဂိတုဂျောန် (၅) ဏံဂှ် ကောန်ဂကောံ PDF မၞိဟ်တြုံ၊ မၞိဟ်ဗြဴ အပံၚ်ဖအိုတ် ၅၃၀ တၠ နွံရောၚ် ထ္မံက်ထ္ၜးလဝ်အိုတ်ရ။

လ္ပာ်ဂကောံဇြဟတ်ပၠန်ဂတးတံဂှ် ညးမလုပ်စိုပ်ဖျေံလွဟ် ဇရေၚ်ကံၚ်ဇြဳပၞာန် ဗွဲမဂၠိုၚ်ဂှ်ဝွံ ကောန်ဂကောံဒပ်ညးတံ ဟွံသေၚ်ပုဟ်ဂှ် ညးဒုၚ်တာလျိုၚ် ဂကောံဒပ်စဵုဒၞါညးဍုၚ်ကွာန်ဒေသ (PDF) တံ ဟီုဂးလဝ်အိုတ်ရ။

ပရိုၚ်−သြၚ်လောန်တိုၚ်(မ်)

ဗီုဓာတ်−MOI

Leave a Reply

Your email address will not be published. Required fields are marked *