ပံၚ်၊ ဂျောန်(၁၅)
တွဵုရးဍုၚ်မန်၊ ပ္ဍဲဒဒန်သြန်လောန်(မတ်မလီု) လ္ပာ်မုဟ်တၟံဂှ် ကွဳစက်ပၞာန် လုပ်ဇီုဒးတုဲ ညးဒဳကွဳလိုန်ဓာတ်မွဲတၠ ဒးချိုတ်လဝ်ရဂှ် ညးဒေသတအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ပရေၚ်ဒဒှ်ဂှ် ပ္ဍဲဂိတုဂျောန် တုဲကၠုၚ် စၟတ်တ္ၚဲ(၁၃) အခိၚ်ဇိုၚ်သဝ်တ္ၚဲဂှ် ပ္ဍဲဒၞာဲဂၠံၚ်တိုန်ဒဒန် လ္ပာ်မုဟ်တၟံ ဒဒန်သြန်လောန်(မတ်မလီု)ဂှ် ကွဳစက် FAW ကောန်ဒပ်ပၞာန်မောၚ်မောၚ်ဥူ နူမုဟ်တၟံ ဒဳကၠုၚ်လ္ပာ် မတ်မလီု မွဲဖ္ဍိုက်ဂှ် အသိၚ်လောန် ဗကပ်အာတုဲ လုပ်ဇီုဒးလဝ် ကွဳလိုန်ဓာတ်ၜါဖ္ဍိုက်ရ။
ကွဳစက် FAW ဂှ် ဃောတတ်တိုန် ကွဳစက်ပ္ဍိုက်ဗၞိက် သၠာ(၆)ဂှ် လုပ်ဇီုဒး ကွဳလိုန်ဓာတ်ကိုဝ်တုၚ်ဥူ ဒဳကၠုၚ်လ္ပာ်မုဟ်တၟံ နူမတ်မလီုကဵု ကွဳလိုန်ဓာတ်ကိုဝ်ကျဝ်ထောန်မောၚ် ဒဳကၠုၚ်တုဲ လကြဴဂှ် ဥူသူရဍိုက် ပါဗက်ကၠုၚ် ၜါဖ္ဍိုက်ဂှ်ရ။

ဟိုတ်နူဂဗုတ်ယာဉ်ဇီုတေက်တုဲ ကိုဝ်တုၚ်ဥူ ဒၟံၚ်အရာပ် (၃) သ္ကုတ်အရာပ်တၟိ၊ ဍုၚ်မုဟ်တၟံ ဒးချိုတ်အာ လဝ်ရဂှ် ညးဒေသမွဲတၠ ဟီုသ္ဂးလဝ်ရ။
“ကွဳလိုန်ဓာတ်ဂှ် နူလ္ပာ်မတ်မလီု ဃောကၠုၚ်ဒၟံၚ် လ္ပာ်မုဟ်တၟံ ကွဳစက်ပၞာန် လုပ်ဇီုဒးလဝ်ရ။ ကဵုအသိၚ် ကွဳစက်ပၞာန်လုပ်ဇီုဒးလဝ်ဂှ် ကိုဝ်တုၚ်ဥူ သဝဝ်ဒတုံစှ်ေသၟဝ်ဒဒန်တုဲ ဒးချိုတ်အာရ” ဂှ် ညးဒေသမွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
သ္အာၚ်နူဂှ်ပၠန် ကောန်ဒပ်ကံၚ်ဇြဳပၞာန်မွဲတၠလေဝ် ဟိုတ်နူပရေၚ်ဒဒှ်ဂှ် ဒးလဝ်ဘဲဝပ်တုဲ ပလံၚ်ဗစိုပ်ဏာ လဝ်ရုၚ်ဂဥုဲရဂှ် ပရိုၚ်ပြးတိတ်ဒၟံၚ်ကီု ဒဒှ်ရချိုတ်အာယျဂှ်လေဝ် ပရိုၚ်ပြးတိတ်ဒၟံၚ်ရ။

ကြဴနူပရေၚ်ယာဉ်ဇီုတေက် က္တဵုဒှ်လဝ်တုဲ ကၟာတ်လဝ်ဒဒန် မွဲခနခေတ္တတုဲ ပ္ဍဲအခိၚ်သဝ်တ္ၚဲ ၜိုတ်(၅)နာဍဳ ကလေၚ်ပံက်ကဵုလဝ်ရဂှ် ဂွံတီကေတ်ရ။
ကွဳစက်သၟဝ်တဲကံၚ်ဇြဳပၞာန်တအ်ဂှ် ဒဳဗက်ဒၟံၚ်သီုကဵုအသိၚ်ကီု သီုကဵုဒဳဗက်ဒၟံၚ် အသိၚ်လောန်ၜက်လၟိုန်ရဂှ် ညးဒေသတအ်ဟီုသ္ဂးလဝ်ရ။
ပရိုၚ်-သြၚ်လောန်တိုၚ်(မ်)
ဗီုရုပ်- CJ

